Mintri Lao động- Thương binh saong Xã hội daong ka dom uranaih sang kan kandah njom Covid-19

Pahadar Harei Dunya Uranaih 1/6 saong pahadar 80 thun Harei Padang Kapol Thiếu niên Tiền phong Hồ Chí Minh (15/5/1941 – 15/5/2021), Akok negar Nguyễn Xuân Phúc hu payua harak thư tadhau ayuh tal Kapol Đội, dom uranaih, dom kamuan, dom urang jakar ngak bruk uranaih dalam negar. Akaok negar taong yaom glaong bruk ngak di Đội saong bruk jak ba uranaih hu rilo salih birau siam mekre, bruk khik caga, iek glang, pato pakai uranaih hu sangka; patagok quyen hu mbaok uranaih tame dom bruk pambuak tal dak harei dak hu khik kajap. Akok negar Nguyễn Xuân Phúc iew dom pakat ủy, karja, dom mban, dom gah, kapol nyaom, dom amaik ame sangka ngak siam quyen di uranaih, daong dom kamuan praong tagok siam abih gah.

Mintri Lao động-Thương binh saong Xã hội brei thau tal urak ni hu labaih 4.000 uranaih lac F0 saong F1. Tukvak anak tal, bruk ni meda hu rilo jang tuk dom urang nao daok karei di labik ngak kong, labik chế xuất tagok glaong, dalam nan hu rilo ranaih sang biak kan kandah. Anak bruk ni, mintri Lao động- Thương binh saong Xã hội hu tabiak bruk daong ka dom uranaih njom Covid-19 saong ranaih njauk nao daok karei piah pacang caga jit. Yaok uranaih hu daong jien mbang lac 80.000 đồng/ sa harei dalam 21 harei. Tukvak peih ngak bruk ini tal puac harei 31/12/2021.

Page ini, Mentri Y tế brei thau, dalam 12 mong tapa, dalam negar hu veik 111 urang birau njom ruak Covid-19 di TPHCM, Bắc Giang saong Bắc Ninh. Kuhria tal 6 tuk page ini, Viet Nam hu abih tih 5.926 urang njom Covid-19 dalam negar saong 1.506 urang tame negar. Bruk taong ruak, dalam negar hu 13 urang taong dhit ruak, abih tih urang njom Covid-19 hu taong dhit ruak tagok tal 3.043 urang. Kuhria tal biar harei 31/5, abih tih hu klauk 1 trieu 100 rabau vaccine Covid-19 ka dom urang njauk brei klauk jru dahlau. Dalam nan hu 30.602 urang hu klauk ginup 2 mbang jru vaccine.

Tui pasak pasang iek ruak kik ban raya HCM (HCDC), bruk njom mbak pambuak tal Hội thánh Truyền giáo Phục Hưng lac sruh jit praong abih di dalam ban, hu 191 urang dalam 5 harei tapa. Langiu di nan, ban raya jeng mboh sruh jit pambuak tal dua diuk pasang daok di Tân Phú. Tapa pasang iek dịch tễ, HCDC mboh hu bruk pambuak gauk di dua sruh njom mbak ni. Kuhria gam sruh jit nan, tal melam 31/5, gah y tế mboh abih tih 212 urang njom saong medil lac njom di 7 tỉnh, bal.

Sở Y tế tỉnh Đồng Nai brei thau daok peih bruk dut iek ruak SARS-CoV-2 ka 200 urang ngak bruk di Khu công nghiệp Dầu Giây dalam huyện Thống Nhất. Tapa pasang iek mboh 3 c.ty hu urang ngak taom gaok urang ruak Covid-19. Urak ini, C.ty CP Khu công nghiệp Dầu Giây daok iew dom doanh nghiep samar pasang iek saong dauh thau ka urang ngak lac negar langiu jeng yau dalam taneh ia daok ngak bruk di c.ty.

Liên minh châu Âu (EU) hu jalan ngak aval ba tabiak paok daong pasiam veik hadei di jit Covid-19 yaom 750 tỷ đôla, dalam nan meda hu ba tabiak trái phiếu 10 tỷ EUR. Taphia di nan, EU jeng brei tapa paok kadung jien karja suai lavik tal thun 2027 yaom abih tih lac 1.800 tỷ ơrô piah langyah dom kan kandah di kinh tế - xã hội kayua jit praong Covid-19. Paok kadung jien karja ni meda daong ka dom negar dalam Liên minh châu Âu padang bruk salih tapa rilo sarak praong, abih di nyu nan lac sanya hijao, cách mạng số saong cak rok patagok khang kajap.

Harei 31/5, negar Prang peih bruk klauk jru pacang ruak ka taong abih urang umo mneg 18 thun tagok, dalam tuk jaik 50% urang praong hu klauk takik di nyu 1 mbang vaccine pacang caga Covid-19. Dom urang ranaih umo hu brei klauk jru vaccine Pfizer/Biontech atau Moderna, dalam tuk dom urang umo labaih 55 thun hu palih ruak karei. Yau nan min, ralo urang praong nao klauk jru jeng palih ruah 1 dalam 2 janih vaccine lac Pfizer/Biontech atau Moderna.

Mintri Quốc phòng Nga brei thau hu ba pabak 20 kapul di jalan tapen negar gah ia harei trun piah pacang caga haong bruk ngak di NATO. Gam haong nan hu panuac lac, tapon nyom bol par phao kraong daok ngak pasiam bruk pasram saong mesuh, Quân khu miền Tây meda pabak labaih 2.000 phao ndao dom janih dalam thun ni. NATO gam gam peih praong bruk hu mbaok tapa gah timur meng dom mbang pasram mesruh saong ba kapul nao jaik jalan tapen negar Nga meng di thun 2014, dalam tuk talei pambuak bruk di dua gah daok jhak nao./.

Urang lang: Ái Nghiêm – Thu Thảo – 01/06 10:18:57