Hu rilo jabat đơn vị hu mbaok di harei pataom ni 

Dalam dua harei, lac harei ini saong harei paguh, di Hà Nội hu peih Nyaom roya Kapol  Chữ thập đỏ Việt Nam pakat negar Mbang XI, tukvak 2022 - 2027 ngan haong kadha: “ Padang Hội Chữ thập đỏ Việt Nam dak harei dak khang kajap, patagok siam bruk ba akaok ngak pahala, kham merat peih ngak sarak an sinh XH di Đảng, Karja”. Nyaom roya ba tabiak 8 bruk dalam vaktu nan lac: Taong abih tỉnh, ban di Kapol peih ngak bruk: “ Urang siam, ngak bruk pahala – ba gauk dak padang bhap bini anit ranam” khik iek saong daong takik di abih lac 500.000 labik daong, dalam 5 thun Daong sa trieu uranaih kathaot rambah, jaoh jo dalam Danak “ Dinh dưỡng ka uranaih kathaot, jaoh jo” daong urang nao ngak mbang di tasik  labaih 90.600 gilai taong chap ikan…

Pamong tal pahadar  77 thun harei  padang rayo sap ndom  Việt Nam (7/9/1945 - 7/9/2022), harei ni,  Công đoàn rayo sap ndom Việt Nam pambuak  song  jabat dok di bhum taneran krong  CL peih  harei pataom pakacah the thao, daoh tamia bhum gah merong negar. Di harei pataom, dom vận động viên hu mbaok tame pakacah gauk  dom asal kadha yau cầu lông, bóng bàn, dui co, jack bao bố; daoh tamia ngan song 3 janih lac daoh ta-eng, dua dua urang – klau urang saong daoh kapul nyaom. Ni lac mblang main khang kadang, kein lagaih piah pabak pren yava, ngak jeng mbaok meta bahrau ka urang jakar, công chức, viên chức, urang ngak di rayo sap ndom VN. Ni jeng lac, tuk piah ka urang jakar, urang ngak labik gah merong negar taom gaok , bac megru, klah rabha ilamu, kak kajap talei jum pataom di dom jabat .

Tỉnh Bình Thuận birau taduan labaih 3 tỷ đồng meng 178 đơn vị, D.N hu mbaok tame saong tut angan pachreih tui bruk jak ba “Daong ka adei nao tal sang bac” brei ka dom adei anek saih hu raidiuk kan kndah. Tapa 12 thun peih ngak, bruk jak ba  “Daong ka adei nao tal sang bac” taduan hu jaik 305 tỷ đồng ( dalam nan gam hu pandap) meng buk rik daong di ralo bhap bini, D.N saong urang ngak pahala, bhap bini daok negar langiu. Meng kadung jien nan, Kadung jien pachreih bac brei ka labaih 700 ribau mbang anek saih takre bac; daong brei pandap bac da-a ka anek saih saong daong gru pato radiuk kan kandah.

Ninh Thuận hu  12 pandap meng kan yau taginui, medar, lasun, tỏi, măng tây xanh, kabec, pabe, hadang pajaih, ia mesin… Piah patagok bruk meriak gauk di pandap ngak nong, pabak dom pandap siam pablei ka urang pandar, thun ni, tỉnh Ninh Thuận jhul khang bruk ba ilamu  công nghệ, ilamu kỹ thuật tame bruk ngak mbang, piah patagok rilo jalan ngak nong hacih saat, ngak nong tui ilamu glong... Gam song nan, Ninh Thuận dok pandar dom jalan công nghệ piah duah thau ka asar di nyu; dong bruk pablei salih song yaih khan angan je, ba dom pandap nan tame dom labik pablei salih pandap panda bahrau.

Ban raya HCM brei peih iek radaih jalan metro ka 1 di puac bilan 8 ini. Ini lac mbang akok meti jalan metro ka 1 ba tame peih iek sa jalan katut lac Depot Long Bình. Tal urak ini, abih danak dak metro Bến Thành - Suối Tiên salah jaik  92%. Danak dak metro Bến Thành - Suối Tiên kuhria abih tih jien buh tame  43.700 tỷ đồng ngan haong jalan atah jaik 20km, meng Bến Thành ( Q1) tal Depot Long Bình (ban Thủ Đức). Danak dak peih ngak thun 2012 saong tui kuhria hu peih pajeng tuai nao mai di puac thun 2023.

Mintri pato megru song Thể thao Lào bahrau pandar dom sang bac  dalam taneh ia brei khik ramik bruk pacang caga  jit Covid-19 dahlau di tuk tame thun bac bahrau dalam harei  1/9 anak tali. Gah pato megru Lào cong dom urang gru, urang jakar, urang ngak dalam gah pato megru brei klauk vaccine mbang ka 3, ka 4 , piah khik ka siam bruk pacang caga jit di dom sang bac  ; tacei pato dom sang bac, labik pato pakai puk ramik hacih saat, pametai anek ruak dahlau di tuk yam tame thun bac bahrau … Mintri pato megru song Thể thao jeng batabiak 10 jalan ngak song  40 ieu kakei, piah peih pabah mbang sang bac hu siam mekre dalam taneh ia

Harei ini, bol lin Hàn Quốc saong Mỹ hu peih ngak binah ka 2 bruk pasram mesruh haong gauk “Lá chắn tự do Ulchi” daok iew lac UFS. Bol lin dua taneh ia hu padang tabiak saong pasram dom bruk mesruh karei di gauk dalam mbang pasram puac thun, min oh brei thau bruk mesruh dalm mbang pasram thun ini lac labik halei di Triều Tiên. Mbang pasram haong gauk “Lá chắn tự do Ulchi” oh padeih di bruk pasram tacei ba ngaok may jamraih vitinh bo daok pasram lin gah langiu.

Dom jabat chức năng di Mỹ hu mek veik labaih 1,4 tỷ USD jien paleik saleik dong urang njauk  COVID-19 meng thun  2020 mbiah tal ni. Jabat  Mật vụ Mỹ (USSS) brei thau, dom urang paleik saleik pandar harak gar di nhân viên, angan je ja atau co klaik  piah taduan hu dom pok jien dong dalam jit prong  COVID-19. Meng thun 2020, USSS peih hu labaih  3.850 mbang pasang iek pagam tal jit prong COVID-19, pataom hu jiak 2,3 tỷ USD jien dong dom janih njauk co klaik, khik hu tamo  pok jien pakat negar song chap dom kol kanyah jhak njauk taduan  trách nhiệm./.

Urang lang: Hanipha- Bhumi -29/8