Thu Tuong Pham Minh Chinh brei pandap ka urang jakar di ban Can Tho 

Patui mbang ngak bruk di ban raya Hồ Chí Minh, mesup 24/1, Thủ tướng rajaei  Phạm Minh Chính, Akaok mban tacei jalan pakat negar pacang caga jit COVID-19 hu mai rivang,  tadhau yhut Tết song brei pandap ka dom urang jakar, y bác sĩ, urang ngak  y tế ban raya  Hồ Chí Minh. Brei panuac di  Sở Y tế ban raya  Hồ Chí Minh, lambaok urang pal akaok  Đảng, karja, Thủ tướng Phạm Minh Chính hu pok meyaom, tong yaom glong dom jak jeng bo ban raya  Hồ Chí Minh mek hu dalam thun  2021, abih di nyu nan lac dalam bruk pacang caga jit  COVID-19. Thủ tướng jeng brei thau, biak klah rabha  dom kan kandah, pandik harao di bhap bini ban raya  kayua jit ruak dalam thun 2021. Urang pal akaok rajaei ndom lac, ban raya kham merat yam tapa dom kan kandah, tavak tavaiy  biak prong , dalam nan hu dom kan kandah, tavak tavaiy kayua đặc thù di ban raya.

Bahrau ini, UB bhap bini tỉnh Bình Thuận hu harak brei angan 14 pandap OCOP tỉnh Bình Thuận thun 2021; dalam nan, hu 2 pandap mek hu tanut OCOP 5 patuk; 8 pandap mek hu tanut OCOP 4 patuk saong 4 pandap lac OCOP 3 patuk pakat tỉnh. Dom pandap OCOP pakat tỉnh njauk ndom tal mek hu angan OCOP lac rong nho saong rong nho pandam di Cty TNHH Hải Nam- Okinawa; ia iak thanh long di labik ngak alak thanh long Bảo Long Bình Thuận; daok kem thanh long haong alak patih thanh long di HTX thanh long hacih Hòa Lệ; ia mesin lavik thun di baoh sang ngak ia mesin pablei lavik thun lac Quang Long.

Dalam dom harei tapa, tuai nao mai meng jalan kapan haoh tagok glong, mblang kapan haoh Tân Sơn Nhất daok hu rilo menuac veik. Njauk caik hatai thau lac,. Mintri jalan mbak pajeng brei ramik veik bruk ngan saong tuai nao mai meng jalan kapan haoh, oh cang hu harak klauk ginup  vaccine pacang  COVID-19 atau hu harak lac abih ruak song harak dut iek  (lingiu dom tuai daok pak di labik hu jit pakat  4 atau brei dok karei). Yau nan,, uranaih umo ala  12 thun oh daok cang brei hu harak dut iek âm tính yau dahlau deih.

Harei 24/1, UBND phường 2, ban sit Mỹ Tho (Tiền Giang) brei thau, 3 urang taong ikan angaok kapal ikan tauk angan TG-93239-TS metai, mboh yau njauk jru mek. Tui dom urang nao haong gauk, tuk kapal daok taong ikan di labik pulao Côn Sơn hu hu 5 dalam 16 urang angaok kapal nan ba gauk menyum alak. Hadei di tuk menyum alak blaoh, 3 urang mboh biak glaih blaoh metai. Hadei di nan, urang pek kapal ini brei kapal tamegah piah khan brei đồn biên phòng Bình Đại, tỉnh Bến Tre thau, saong ba  2 urang menyum alak haong gauk nan tame sang iek ruak, kayua mboh yau njauk jru mek, min oh ka trak. Gah chức năng hu brei gauk gar ba urang metai nao kubo, saong daok duah thau, ngak brei cambaih laih makna ba tal metai menuac nan.

Harei pagaiy, lac harai palao patao ging (harei 23 bilan mac tui saka ia bilan). Mong rah tapa, yaom kaom drak pasa boh kayau, pandap mbang that, atau jien meh ja, ikan  chép piah palao patao Ging daok hu tani tanat, pandap panda rilo, oh hu bruk kurang pandap song oh hu bruk tagok yaom dut song yaok thun.

Mintri Y tế Lào brei thau, taneh ia ini ngak hu bruk ba tabiak lac klauk vaccine hu ka takik di abih lac meteh dom menuac sia di puac thun 2021 piah pasang iek bruk tamuh tabiak jit ruak, min cuang kandah jeng daok saong brei bac megru dom ilamu meng bruk tapa blaoh piah ka rilo rahra hu klauk jru dalam thun 2022. Piah patagok bruk klauk vaccine dalam thun 2022, kham merat hu takik di abih lac 80% rahra hu klauk vaccine dalam thun 2022, Mintri Y tế hu tacei pato dom jabat pambuak tal brei padang rilo jang dom pasak klauk jru di dom bilai y tế saong di dom puk palei piah ka menuac sia dalam palei hu mbuan lagaih jang dalam bruk nao klauk vaccine.

Urang jakar ngak praong gah quân sự Mỹ bahrau brei thau, Tổng thống Joe Biden dok sahneng kuhria bruk ba rilo jang urang lin, kapan mesruh song kapan haoh mesruh ka dom  đồng minh Tổ chức Hiệp ước Bắc Đại Tây Dương (NATO) song dom taneh ia Ban-tíc (Baltic) dalam tuk bruk di  Nga haong phương Tây pambuak tal bruk  Ukraine dok catang tagok.  Min, harei kabroi  (23/01), Mintri Ngoại giao Mỹ ndom lac negar ni urak ni dok duah dom jalan  ngoại giao ka bruk khủng hoảng Ukraine.

Gah khik iek takai tasik Hàn Quốc bahrau ini brei thau lac hu cap khik sa sruh kapal Trung Quốc taong cap ikan oh hu harak adat dalam bhum kinh tế (EEZ) di Hàn Quốc langiu tasik pulao Jeju, gah meraong negar ini. Dom kapal taong ikan di Trung Quốc hu adat tame EEZ gah pai Hàn Quốc piah taong cap ikan min brei khan brei thau bruk taong cap ikan saong tok hu adat brei taong cap di sa labik halei nan. Thun bloh, Hàn Quốc hu khik abih tih 108 sruh kapal taong ikan di Trung Quốc ngak suan dom adat ba tbaiak di taneh ia ini./.

Urang lang: Hanipha- Mousaphuong -24/1