Ngan haong kadha di Nyaom roya lac “Hatai khang kajap - Ngak dahlau hadah hadai - Caong khin ba drei daong ngak bruk - Ngak po harei hadei”, page ini (24/6), Nyaom roya pakat negar Doan Dam dara CSHCM mbang ka XIII peih ngak mbang ka I. Hu mbaok Nyaom roya hu 788 urang lambaok ka labaih 21 trieu urang ndoan, dam dara Viet Nam dalam saong langiu negar. Biar harei ini, Nyaom roya palih ruah BCH Trung uong Doan mbang XIII, vaktu 2026-2031, gam haong nan, dom urang lambaok vakil  pataom tame  ginum biai di 5 nyaom biai ka Harak Nyaom roya…

Tinh Dak Lak pambuak haong urang buh jien tame ngak mbang meng negar Prang page ini peih ngak Danak daka cụm 3 sang mac  dien hangin kuhria abih tih jien buh tame ngak labaih 2.000 ti dong, dalam nan hu Sang mac ndien hangin Buôn Hồ 1, Buôn Hồ 2 saong Sang mac ndien hangin Cư M’gar 2. Ong Trương Công Thái, Pha Chủ tịch UBND tỉnh Đắk Lắk khan lac UBND tỉnh tuk halei jeng pachreih saong uan raok dom po buh jien tame ngak mbang, njauk ndem tal gah nang luong. Ini lac gah bo Dak Lak  hu lagaih ralo abih hu Thu tuong Rajaei mbaoh harak.

Meng harei 1 bilan 7 tal abih thun 2026, TPHCM peih ngak danak dak daong 100% yaom harak ve ka 134 sruh radaih buyt piah pachreih bhap bini ndik radaih buyt, plaik njiak bruk gal tavak jalan saong jhul pakhang bruk khik brei hacih. Tui bruk ba tabiak, sarak brei ba ka taong abih tuai damuai hu pandar jit vu radaih buyt di TPHCM, dalam nan hu dom radaih daong meng kadung jien karja saong dom radaih oh ka hu daong jien. Yau nan min, danak dak oh hu pandar  ka dom radaih buyt nao dom tinh, radaih pajeng tuai jirah oh hu tabung, nao tal dom mblang kapal ahaok…

Sa dalam dom bruk praong gah ngak nong, palei pala di tinh Gia Lai dalam thun ini lac buh jien tame ngak 3 danak dak ribaong kraong, kuhria abih tih labaih 810 ti dong. Klau danak dak buh jien tame mbang ini piah ba ia pruh ka bruk pala drak ngak nong saong ia pandar ka bhap bini gah Pei tỉnh Gia Lai. Cambaic laic, danak dak binek ia Djang di xã Kbang, biek ia Ka Tung di xã Tơ Tung saong  binek ia Đăk Trau Dle di xã Kon Chiêng.

So Ilamo, Padhih The thao saong Yulit  tinh Lam Dong birau peih ngak danak dak “ Yulit hijao - Daong ka harei hadei khang kajap” di Dac khu Phu Quy. Danak dak piah  paglong jalan sahaneng ka bhap bini ka bruk khik caga alam moi truong, trun takik hareik katak nhựa, khik alam moi truong saong padang ngak labik padeih padei  hijao anit ranam, salamat. Di var peih bruk, lambaok doanh nghiep saong labik pablei salih yulit hu mbaoh tangin pachreih tui danak dak “ Yulit hijao - Daong ka harei hadei khang kajap”  

Philippines daok iew brei jhul pakhang dom bruk hatang “ pataom ia hajan” piah caga dom kan kandah kayua  El Nino di puac thun ini. Jabat Khi tuong Philippines kuhria hu 92%  langik El Nino khang ngak kan kandah tal taneh ia ini saong dui atah tal akaok thun 2027. Rajaei Philippines daok kham merat padang bruk ngak suai lavik saong ngak tui dom jalan piah pakhang  bruk pacang caga di taneh ia.

Yaok ribau urang takre nghe thuat par kalang meng 26 taneh ia mai kaoh pulao Fano di Đan Mạch piah hu mbaok roya par kalang hu peih ngak yaok thun, praong abih di dunya ngan haong labaih 25.000 baoh kalang praong sit, yaok thaik thaok karei di gauk. Meng dom baoh kalang  thaik binguk jantak, mực hu rilo takai tal dom kalang nghe thuat saong talang hu pagam jamraih, taong abih parang par tagok bak langik biak mekre meta.  

An Do hu jeng taneh ia nao dahlau di dunya ka bruk ngak gilai tathik dalam thun 2025. Hu labaih 16.000 gilai hu yah  klak di dunya dalam 10 thun anak tal, Rajaei An Do caong khin brei patui bruk khik labik dang akaok di gah ngak gilai tathik tui jalan khang kajap, salamat saong siam ka alm moi truong. Bruk ini daok ba bruk ngak, pachreih urang buh jien tame saong jhul pakhang bruk cakrok patagok kinh te hijao ka bruk ngak mbang kinh te anak tal./.