UBND TP.HCM hu harak tacei Sở Pato Megru ka bruk oh peih pakacah tamat THPT mbang 2

Công điện ka 1063/CĐ-TTg harei 31/7 di Thủ tướng Rajaei ieu “Thei daok halei, daok nan”; oh tabiak truh puk palei, labik drei daok meng harei 1/8 mbiah tal abih tukvak pa-atah di gauk (langiu dom bruk hu karja brei adat), nan lac piah khik siam mekre salamat di abih ka rahra di tuk ini. Dalam tukvak urak ini, eng drei nao palei mbuan ba tal jit ruak njaom mbak, kan pasang iek hu, saong mbuan hu bala angaok jalan nao. Daok tỉnh Ninh Thuận brei thau, tuk rami ramik blaoh blai, UBND tỉnh meda khan brei thau saong peih bruk taduan mikva mai palei dalam siam mekre, salamat.

Ngak tui tacei pato di Thủ tướng Rajaei ka bruk daong patrun kan kandah ka bhap bini saong dom menuac gaok kan kandah dalam tuk jit ruak Covid-19 daok rah tabiak khang, Phó Thủ tướng Lê Minh Khái hu tacei Mintri Thông tin saong Truyền thông tacei pato dom doanh nghiệp viễn thông samar pasang iek saong tabiak bruk ramik veik yaom cước viễn thông piah daong ka dom menuac daok pandar dịch vụ, abih di nyu lac dalam tuk jit Covid-19 daok rah tabiak khang, dui atah yau urak ini. Dahlau di nan, Rajaei hu tabiak Sarak brei trun jien điện. Rajaei jeng hu panuac ieu akaok UBND dom tỉnh ban samar pasang iek, ramik veik brei trun yaom ia pandar, jien pandar ia hacih daong ka bhap bini gaok kan kandah meng jit Covid-19.

Panuac khan meng Sở Y tế TP.HCM, dalam harei 1/8, TP.HCM klauk hu veik 144.970 mbang vaccine, tui nan mbang ka 5 hu klauk abih tih 767.885 mbang. Hadei di tuk tamat mbang klauk ka 5,  ban raya brei peih chip mbang klauk ka 6, vaccine hu tal halei klauk tal nan mbiah tal tuk klauk hu takik di abih lac 2 dalam 3 menuac sia umo labaih 18 thun.

Biar harei 1/8, UBND TP.HCM hu harak tacei Sở Pato Megru ka bruk oh peih pakacah tamat THPT mbang 2 tui bruk ba tabiak di Mintri Pato Megru kayua jit Covid-19 daok srau kadau. Salih tame nan, UBND TP jao ka Sở Pato Megru iek tui dom sarak di Mintri Pato Megru haong dom quy định urak ini piah ba tabiak jalan tacei pato peih bruk đặc cách brei tamat ka dom anek saih hu angan tame pakacah tamat THPT mbang 2 tui njauk adat hukum.  Urak ini TP.HCM hu jaik 3.300 anek saih hu angan tame pakacah tamat THPT mbang 2. Yau nan, dom anek saih ini meda ngak harak gar piah hu pasang iek brei tamat THPT tui adat di  Mintri Pato Megru.

Kayua jit ruak Covid-19 rah tabiak khang, Mintri Ilamu - Thể thao haong Du lịch hu tabiak harak brei salih tukvak peih Harei pataom Ilamu dom bangsa bhum kreh negar mbang ka IV tapa tukvak halei karei lagaih jang. Tui bruk ba tabiak dahlau di nan, Harei pataom Ilamu dom bangsa bhum kreh negar mbang ka IV hu peih tabiak di puac bilan 8 ini di Bình Định, hu mbaok di dom gah dalam  Mintri Ilamu TT&DL haong rilo tỉnh ban bhum kreh negar.

Urang ilamu dịch tễ dang akaok Trung Quốc harei kabroi hu panuac brei thau lac sruh jit bahrau di ban Trương Gia Giới – sa labik du lịch dane angan di tỉnh Hồ Nam, meda njauk huak jang duk haong sruh jit di Nam Kinh saong meda ngak ka jit pambak praong tabiak dalam taneh ia. Kuhria tal abih harei 01/08, sruh jit Trương Gia Giới hu 18 urang njaom. Takik di abih 7 ban di 5 tỉnh jeng hu menuac njom pambuak tal Trương Gia Giới.

Panuac khan meng Rajaei Thái Lan brei thau, taneh ia ini hu brei dui atah dom jalan ngak piah pacang cakak jit COVID-19 catang jang di ban ine Bangkok haong dom tỉnh mbuan njaom mbak glaong mbiah tal puac bilan 8 piah ngak brei suai veik bruk njaom mbak di jit ruak, tuk taneh ia ini daok pacang mbang tamuh jit praong abih mbiah tal harei ini. Tui kuhria mboh dahlau di Mintri Y tế Thái Lan, taneh ia ini meda hu labaih 40.000 urang njaom bahrau saong 500 urang metai yaok harei, tabung glaong lac di kreh bilan 9 tal, meyah bruk pacang veik urak ini oh hu ngak tui catang.

Harei ini, harei pakacah ka 10 di Olympic Tokyo 2020  meda lac daok rah tabiak bruk pakacah gauk khang di dom kapul the thao dalam Top akaok haong 22 bộ huy chương tui kuhria hu pok brei dom VĐV gheih di abih. Tamat harei pakacah kabroi, kapul thể thao Trung Quốc dang akaok haong 24 HCV, min kapul thể thao Mỹ kham merat biak khang tuk mek hu 4 HCV piah dang biak jaik di gah likuk haong  20 HCV. Dalam harei pakacah ini, VĐV Quách Thị Lan meda lac menauc lambaok puac abih di kapul thể thao Việt Nam pakacah nuac 400 mét paga kumei dhi bán kết. Dahlau di nan, Quách Thị Lan yam tapa hu vòng loại meng patuah hu ba tagok dang dhi 4, salih ka VĐV urang Jamaica njauk klaak tabiak kayua ngak suan adat pakacah. Min, bruk ini biak njauk haong prein kham merat abih drei brei ka kapul Việt Nam di VĐV palei Thanh Hóa./.

Urang lang: M. Phương – 02/08 16:40:04