Pasang iek bruk blei pandap panda y tế, sinh phẩm, kit dut iek ruak, vaccine, jru pacang caga jit Covid-19

Pho Thủ tướng Rajaei Lê Minh Khái birau iew Thanh tra Rajaei pasang iek bruk blei pandap panda y tế, sinh phẩm, kit dut iek ruak, vaccine, jru pacang caga jit Covid-19 di Hà Nội, Ban raya Hồ Chí Minh saong Mentri Y tế njauk tui bruk ba tabiak. Thanh tra Rajaei jeng pachreih Thanh tra dom mentri, dom gah, tỉnh, ban samar peih bruk thanh tra ka bruk bei jamraih mac, pandap y te, sinh phẩm, kit dut iek ruak, vaccine, jru pacang caga jit Covid-19, khik ka dom bruk thanh tra hu peih ngak njauk tukvak, asar siam; pathau khan Thủ tướng Rajaei thau ka bruk ngak dalam bilan 3 anak tal.

Jabat cảnh sát pasang iek Mintri Công an hu peih ngak dom bruk tố tụng, cap khik urang dahlau deih ngak Chủ tịch UBND tỉnh Bình Thuận lac Nguyễn Ngọc Hai kayua gam tal bruk ngak suan dalam khik ramik drap ar karja ngak khat lahik palai pajoa. Langiu di nan, Jabat công an dok cap kreik 4 urang karei lac Lương Văn Hải (dahlau deih ngak Phó Chủ tịch UBND tỉnh), Hồ Lâm (dahlau deih ngak Yam ndoc Sở Tài nguyên song Môi trường tỉnh), Lê Nguyễn Thanh Danh (dahlau deih ngak paok yam ndoc Sở Tài nguyên song Môi trường tỉnh) song Ngô Hiếu Toàn (Paok Yam ndoc Sở jien padai tỉnh). Dom urang ni njauk khởi tố, chap kreik ka duas "Ngak suan hukum ka bruk khik ramik, pandar drap ar karja ngak khat lahik palai pajoa” rah tabiak di danak dak labik ngak mbang pablei salih dịch vụ song labik dok Tân Việt Phát 2.

Hadei di 15 harei peih pabah mbang brei ka bhap bini nao mai dalam tuk Tết Nguyên đán, meng harei ini, jalan radaih peih drah samar Trung Lương - Mỹ Thuận kareik pabah mbang. Bruk kareik pacang jalan radaih peih drah samar nan piah ngak brei salah dom bruk daok veik di danak dak jalan mbak dahlau di tuk ba tame pandar. Danak dak jalan radaih peih drah samar Trung Lương – Mỹ Thuận atah 151km, hu padang ngak di bilan 9 thun 2009 saong brei peih iek di harei 19/1/2022. Tui kuhria, jalan peih radaih drah samar pambuak jalan radaih peih samar Ban raya HCM – Trung Lương saong Mỹ Thuận – Cần Thơ ini hu ngak salah blaoh saong ba tame pandar di bilan 3 anak tal.

Sang iek ruak dã chiến 3 tal ka 16 (di Quận 7, TP.HCM) bahrau brei tabiak nao sang sa urang likei njom COVID-19 hadei di 84 harei kham merat taong ruak. Ni lac, sa dalam dom urang ruak takik mboh, hu ruak rup lac biak lamek, trak 140kg, hu dom bác sĩ dong plaih di metai. Thạc sĩ – Bác sĩ Giang Minh Nhật - Trưởng Khoa hồi sức tích cực, sang iek ruak dã chiến ka 16 brei thau, dalam jiak 3 bilan, hu dom tuk ruak phổi trak yaom lac hu dong ECMO abih , min, dom bác sĩ song điều dưỡng sang iek ruak khang hatai, kham merat dong pahu ka urang ruak.

UB bhap bini tỉnh Vĩnh Long birau brei ramik veik pakat jit, hadei di tuk jit ruak Covid-19 dalam tỉnh daok pasang iek hu. Tui nan, meng harei ini dom bruk ngak pataom rilo manuac brei peih ngak, hadom menuac jeng hu; bruk nao mai pajeng ba pandap panda anagk jalan mbak peih veik yau dahlau di tuk hu jit ruak; anek saih dom pakat hu tame bac veik di sang bac. Yau nan min, dom labik pataom ralo manuac brei ngak njauk tui 5 paka, hu jalan pacang caga siam jit ruak. Meng tuk jit Covid-19 tamuh tabiak mbiah tal ini, Vĩnh Long hu labaih 44.500 urang njom ruak, dalam nan hu jaik 24.600 urang hu taong thit ruak, 738 urang metai.

Dalam harak brei thau di harei 10/02, mintri Ngoại giao Mỹ kakei bhap bini Mỹ tabiak truh Ukraina chipi tapa dom jalan thương mại atau tư nhân. Bhap bini Mỹ jeng hu panuac kakei oh nao tal Ukraina kayua mbuan hu msruh gauk meng dom bruk quân sự di Nga ngan song Ukraine. Dalam sa bruk hu gam tal, dom kapan haoh mesruh F-15 di Mỹ tal Ba Lan dalam tuk Mỹ song dom đồng minh NATO duah jalan pakhang pren pacang anak bruk mbuan hu mesruh gauk di Nga song Ukraine.

Tổng thư ký Liên Hợp Quốc saong rilo urang dang akaok dom taneh ia di dunya iew dom taneh ia rik tame labaih 23 tỷ USD ka danak dak pabak vaccine sumu di dunya. Tổng thư ký Liên Hợp Quốc ndom lac, dunya brei ngak chip kayua meyah bruk oh sumu gauk ka vaccine daok rah tabiak, ini lac bruk oh ngak hu gah đạo đức praong abih di manuac sia, saong dunya meda oh jhul kadun likuh hu jit ruak praonh. Bruk roh duah pabak vaccine sumu gauk kayua LHQ ba tabiak meng bilan 2 thun 2022, hu daong jhul samar bruk dut iek ruak, taong ruak, jeng yau klauk vaccine pacang Covid-19 dalm jaik 2 thun tapa.

Rilo labik di Japon, dalam nan hu ban ine Tokyo dok hu tuyết laik kapan ngak ka jabat khí tượng negar ni brei hu panuac kakei bhap bini caik hatai tuk mbaok jalan hu ia patau song dom bruk mbuan ngak brei gar jalan. Hu 67 mbang radaih nduac samar song 209 mbang par brei klaak. Tuyết laik kapan di gah pai negar Japon meda ngak kan kandah tal bruk nao mai di jalan kapan haoh dalam dom harei tal. Ni lac mbang ka 2 dalam thun tuyết laik kapan di ban ine Tokyo, ngak ka rai duik di bhap bini gaok rilo kan kandah./.

Urang lang: Hani Pha – Bhumi – 11/02