Patui danak dak Mbang nyaom oh bhian mbang Sa, Quoc hoi mbang XVI, biar harei ini, 5/8, Quoc hoi ginum biai ka danak dak Hukum ramik pasiam, pabak Kadha 6 saong Phu luc 4 di Hukum Ndau tu. Dahlau di nan, dalam mbang ginum tui kapol, dom urang njauk gauk brei cakak trun dom gah, bruk pablei salih njauk hu kadha, salih catang meng bruk pasang iek dahlau tapa pasang iek hadei. Yau nan min, salih jalan ngak brei taong yaom tani tanat, khik brei kein laba ka doanh nghiep, gam oh caik kurang bruk ngak tui hukum di dom gah pambuak tal prein yawa, salamat saong siam mekre. 

Gah bol lin ngak bruk duah, pataom atau talang liet si di Khu B, Bein bingu Lê Thị Riêng saong duah mboh, pataom hu 15 atau talang liet si, dalam nan hu 9 atau talang gam haong kaya kan. Tui Bộ Tư lệnh TP. Hồ Chí Minh, mbiah tal harei 4/8, dom gah ngak duah pataom atau talang liet si di Bein bingu Lê Thị Riêng duah mboh, pataom 197 atau talang liet si. Bộ Tư lệnh TP. Hồ Chí Minh khan lac daok peih praong labik kuac duah di Labik B.

Mbiah tal ini, tinh Dong Thap hu 28 dalam 102 xa, phuong taduan angan An toan khu daam samar mesruh metak kol Prang saong kol Mỹ. Bhap bini daok di dom xa, phuong An toan khu brei pakat the BHYT oh mek jien iek ruak, jru ruak tui kein laba di hukum karja. Bruk taduan lac bhum An toan khu oh lac dom bruk rik daong biak ralo di karja bhum palei dalam dom mbang mesruh metak bo daok lac sarak daong lagaih, rik tame paglong bruk iek glang prein yawa bhap bini.

Dahlau bilan paik baoh durian ini, So Ngak nong saong Moi truong tỉnh Đắk Lắk  brei ngak salah ho so piah pabak 253 ma taka so bhum pala saong 93 ma so labik papaok. Meyah hu langyah, mbaoh harak sumu, brei hu labaih 7.600 ha durian hu pablei tabiak negar langiu. Tinh Dak Lak daok peih Bruk ngak tabung glong 30 harei melam daong bhap bini, HTX saong doanh nghiep ngak salah harak gal brei hu ma taka so bhum pala, papaok. Tui nan, peih praong bruk ginum biai haong dom darak pasar negar langiu piah dom baoh durian ngak tabiak hu pablei njauk tui sarak pambuak bruk.

Gah Y te TPHCM daok peih bruk dut iek prein yawa ka taong abih bhap bini oh parabha labik halei. Tui nan, taong abih bhap bini Viet Nam daok di Ban raya HCM, dalam nan hu urang daok di ban raya saong urang labik karei mai daok hu VneID, hu brei iek ruak oh lac labik halei atau daok pak halei mai ban raya. Ini lac jalan ngak piah ba mbuan lagaih abih ka bhap bini hu taduan tui jitvu, gam patagok hu prein ngak bruk di taong abih gah y te di ban raya.

Dom Akok Mentri Noi vu EU hu ginum biai samar ka jalan khik iek labik tapen negar. Bruk ginum bai ini hu peih ngak tuk urang di cu ralo tame bhum taneh Ceuta di Tay Ban Nha. Mentri Noi vu Morocco khan lac urang di cu suan hukum duah jalan tapa negar Ceuta dom harei jaik ini brei mboh bruk pambuak ba dom khaw tin oih njauk tagok mang, dom urang ba manuac nao negar langiu suan hukum saong bruk langyah suan hukum karja.  

Jabat Khik tuong Prang khan lac bilan 7 meng blaoh lac bilan pandiak abih hu mboh di negar ini kuhria meng thun 1900. Pandiak di ngar Prang di bilan 7 hu 24,9 do C. Chau Au lac pandiak catang samar di dunya. Dom urang ilimo kuhria iek langik rilo mbang ba tabiak panuac kakei bruk langik salih karei kayua anek manuac, tukvak dui atah saong trak jang dom mbang pandiak di dunya.

Mbang langik pandiak oh ka mboh dalam labaih 80 thun tapa di Nhat Ban oh lac ngak jhak tal prein yawa anek manuac bo daok ngak jhak tal athur raong di dalam bein mbuan metai. Di Bein athur Tama di ban ine Tokyo, dalam bilan 7 meng blaoh hu yaok pluh drei athau thing glaih glar abih prein, metai kayua pandiak. Urak ini, Bein athur Tama padeih ngak parang iek athau thing saong radaih buyt iek athau thing, tui nan brei pagam mac ngak la-ar var raong athur./.