Patui danak dak Mbang nyaom oh hu kuhria dahlau mbang 9, Quoc hoi mbang 15, page ini 14/2, Quoc hoi pang ar khan dom sarak jalan peih ngak, sarak đặc thù brei buh jien tame padang ngak danak dak ndien hat nhan Ninh Thuan. Dahlau di nan, di mbang nyaom 42 di UBTV Quoc hoi, UB Ilamo Kong nghe saong Moi truong  di Quoc hoi  caong khin Rajaei pasang iek tani tanat bruk palih ruah, kong nghe lagaih haong dom sarak hu mbaoh tangin blaoh. Bruk nan njauk brei khik hu kein laba ka taneh ia, quoc phong, an ninh, abih di nyu nan lac dalam tuk dunya saong bhum taneh jiak taphia daok mbuan gaok kan kandah, khat lahik.

Kuhria iek veik thun 2024, tinh Dong Nai patui veik khik karo kajap labik dang akaok lac sa dalam dom tinh ba drei ngak dahlau ka bruk padang palei pala bahrau. Tinh daok dang akaok dalam negar ka dom xa palei pala bahrau kieu mau, dang ka 2 ka dom xa palei pala bahrau paglaong. Dong Nai daok kham merat ngak hu tagok glong dalam thun ini tuk kham merat ngak bahu veik 10 xa mek hu angan palei pala bahrau paglaong, 4 xa mek hu angan palei pala bahrau kieu mau, 3 huyen salah blaoh palei pala bahrau paglaong saong jalan ba tabiak praong di tinh dalam padang palei pala bahrau thun 2025 lac huyen Xuân Lộc ngak salah blaoh palei pala bahrau kieu mau.

Tỉnh Long An hu labaih 1.120 ha tamekai, pala pataom di bhum taneh Đồng Tháp Mười. Dom baoh sang hu pala tamekai njauk brei kuhria caga, pala takik di bilan Tet Nguyen dan salih tapa pala duh ka Tet Nguyen tieu plaih nyiak bruk pala labaih rilo oh hu thei blei. Hu yau nan, meyah lac yaom kaom hadei Tet jeng oh karo min  tamekai daok pablei hu tani tanat. Urak ini yaom tamekai meng 6 - 8 ribau đồng sa kilo, yaom kaom tani tanat yau nan ye urang pala tamekai daok hu laba.

Pasak Pachreih urang ngak nong tinh Binh Thuan bahrau ngak iek bruk pala padai hadah krah, takik tathuak nerak angaok 3,4ha taneh di 11 baoh sang urang bangsa Cam xa Phan Hòa, huyen Bắc Bình, tinh Binh Thuan. Bruk ini pambak tame kadha “sa njauk ngak, nam patakik” pataom rilo ilamo bahrau. Hu mbaok tame bruk ngak, urang ngak nong hu daong pajaih pala, jien buh tame saong tacei ba ilamo pala. Bruk jak jeng mai meng bruk pala tui jalan ini brei mboh padai tagok labaih 4 tạ/ha (labaih 5%) dut haong bruk pala yau bhian.

Tui Sở Ngak nong saong Patagok palei pala tỉnh Hậu Giang, tukvak trun pajaih bilan He thu thun ini meda hu dua mbang. Ta-eng dom bhum taneh njom ia mbak brei drak pajaih padai bilan He thu suai jang dut haong dom mbang dahlau. Gah ngak nong pachreih dom urang padai hadei tuk yuak kuak padai Đông xuan  njauk brei ramik hacih mblang hamu, li-ua ngak kam nerang, pambu taneh takik abih  3 adit dahlau tuk tam trak  piah khik hu tukvak halak halin metai bilan padaoi dahlau saong bilan hadei piah nerang pong bruk ralai klak ngak metai gha padai bilan He thu.

Rajaei Malaysia brei pambuak haong Google piah brei ba tame pandar AI ka 445.000 urang cong chuc, jhul samar bruk salih taka so di negar dalam Dong Nam A ini. Haong bruk pambuak gauk di dua gah, urang cong chuc Malaysia brei hu quyen tame dom pandap tri tue nhan tao (AI) bahrau, daong ka dom urang nan ngak dom bruk ngak yau taong akhar sarak, langyah du lieu, takik bruk ngak siam lagaih jang.

Dalam thun 2024, Trung Quoc chap mek saong bayar mai veik labaih 40.000 urang pambuak tal bruk pachot pagat  tapa online di gah Barak Myanmar. Jeng dalam thun tapa, Trung Quoc pambuak tal rilo jabat rajaei  karei, pasang iek langyah labaih 35.000 mbang kaoh duis hinh su ngak saw kadau bruk khik iek tapen negar. Labaih 79.000 urang hinh su njauk chap khik, pacang caga saong langyah hu lagaih dom bruk daok mbuan ba tal sraw kadau bruk khik brei salamat, tani tanat labik tapen negar.

Kum menuk ada ngak ka urang raong glang di Mỹ brei palahik yaok trieu drei menuk yaok bilan ngak ka gah pabak baoh menuk trun khang. Bruk ini pambuak haong palai jien ngak ka yaom kaom baoh menuk tagok samar. 12 baoh menuk glaong pakat urak ini hu yaom tagok tal 10 USD (labaih 250.000 ndong). Dalam tuk baoh menuk gam kan si duah gam chiat jien, rilo rahra Mỹ salih tapa ta-eng raong menuk dalam mblang sang. Hu dom ban saong ban sit di Mỹ mbaoh tangin brei ka rahra raong menuk pak sang meyah ngak njauk tui tanut chuan./.