Patui veik danak dak Mbang nyaom biai oh bhian mbang ka Sa, harei ini, Quoc hoi nyaom biai ka danak dak Sarak di Quoc hoi ka bruk, sarak hu angan piah langyah bruk ngak suan hukum pambuak tal kinh te karja, kinh te menuac urang saong pandar ilamo khoa hoc, kong nghe, salih bahrau hadah krah, salih taka so. Sarak hu caong khin lac “blah akhil pacang salamat hu kein lagaih” patakik hu bruk huac ngak suan, huac ka bruk di drei di urang jakar saong gah ngak mbang papblei salih, palagaih prein daong jhul patagok kinh te taka so patagok dalam jaman bahrau. Langiu di nan Quoc hoi brei nyaom biai di kapul ka rilo danak dak hukum dalam nan hu: Danak dak Hukum Patagok ban medin; Danak dak Hukum salih, pabak dom paka di 10 hukum hu pambuak tal harak gal karja, kein lagaih pablei salih dalam gah ngak nong saong alam langik.

Mban Khik danak dak Mỹ Thuận hu pathua khan Mentri Padang ngak vaktu kuhria caga ngak jalan pasei TPHCM - Can Thơ. Jalan pasei ini kuhria abih tih jien buh tame ngak labaih 171.000 ti dong daok likau Quoc hoi mbaoh tangin sarak brei jien padang ngak dalam thun 2028 saong ngak salah di thun 2035. Tui bruk ba tabiak, akaok jalan pasei  di ga An Bình ( phuong Dĩ An, TPHCM) saong labik puac jalan di ga Cần Thơ atah labaih 175 km. Jalan nao tapa 5 tinh, ban TP.HCM, Tây Ninh, Đồng Tháp, Vĩnh Long saong TP. Cần Thơ.

Piah daong sangka prein yava rahra, patagok pambuak bol lin, rahra, Sang iek ruak Quan y 121 (Kuk Daong bruk – Ilamo Ky thuat Quan khu 9) pambuak Su ndoan 330 peih bruk pasang iek ruak, langyah ka prein yava saong pabak jru oh mek jien ka labaih 400 rahra mbang tui sarak, baoh sang kathaot saong baoh sang kan kandah di phuong Chi Lăng, tinh An Giang. Langiu di nan, rahra hu tacei ba bruk mbang siam lagaih, bruk pandar jru saong dom jalan pacang caga dom ruak bhian gaok.

Hadei labaih sa bilan duah pataom talang liet si di Bein bingu Lê Thị Riêng, bol lin chuc nang pataom hu 210 atau talang liet si, dalam nan hu 184 atau talang yaok urang saong 26 atau talang di 6 labik ghor dar tui kapol nyaom. Dalam nan, hu 2 lavik kapol nyaom di Khu A saong Khu B di Bein bingu. Bộ Tư lệnh TP.HCM brei thau peih praong labik duah di Khu B piah duh ka bruk 500 harei melam ngak bruk kuac duah, pataom duah thau angan di talang liet si.

 Kong an phuong Bình Phước, ban Dong Nai hu cap mek Dương Đại Long (umo 29 thun, daok di Ban raya HCM) piah duah thau ka bruk taong paoh anek kamei di urang payo. Urang njauk taong paoh lac kamuan P.G.K.L. (11 thun), urak ini daok haong amaik lac amuk Đ.T.M.L. (35 thun) di labik khu pho Tân Bình 2, phuong Bình Phước. Mek makna lac pasang iek bruk bac megru kayua lac kamuan bac oh siam, Long pah gam gam, taong meng kayau saong pandar kamuan 11 thun guk ta-uk tal 1 tuk page. Tapa camera hu patabiak meng baoh sang, taong abih dom mbang Long taong paoh kamuan L,…ameik di kamuan hu maong mboh min oh pacang cakak atau oh hu pacang khik anek kamei di drei.

Tỉnh Chiết Giang di Meraong negar Trung Quoc harei ini, ngak bruk samar pakat 3 tuk ribuk Dolphin daok mai gah Esar negar ini saong kuhria ribuk hajan praong di ralo labik. Yaok rituh gilai ikan hu tacei pato dui mai pataok di labik salamat, yaok pluh danak dak ngak di angaok ia brei padeih. Dom danak dak dien hangin langiu tathik jeng padeih. Dalam tuk nan, yaok ribau tuai damuai brei ba tabiak truh dom kaoh pulao mai labik siam mekre.

Japon hu peih bruk pahadar 81 thun bruk parah mbom nguyen tu trun ban Hirosima, ngan haong kadha ieu bhap bini dunya patagok kham merat pamaong tal sa dunya oh hu mbom siu hat nhan. Thu tuong Japon Takaichi Sanae brei mboh veik bruk sanya ngak 3 kadha oh hu hat nhan saong jhul tagok jalan padang sa dunya oh hu mbom siu hat nhan. Labaih 50.000 urang meng 123 negar saong bhum taneh, dalam nan hu dom urang daok diuk hadei mbang parah mbom nguyen tu, jeng hu maong iek adat pahadar.

Mentri Ngoai giao Mỹ brei peih praong danak dak pasang iek tai khian mang xa hoi ngan haong dom urang ngak mbao negar langiu likau thi thuc ngak bruk di Mỹ. Tui nan, Mỹ brei pasang iek online ngan haong gah mbao chi saong truyen thong ( Visa F), peih praong sarak dahlau di nan caong khin rilo kapol nyaom urang daok likau thi thuc brei thau tai khoan mang xa hoi piah ngak bruk. Ini lac bruk birau abih dalam chien dich khik iek catang thi thuc di karja Mỹ./.