Rajaei pandar dom mentri, jabat samu haong mentri salah blaoh bruk ramik caga bruk karja di dalam pagam haong rabha tal pakat, rabha bruk dalam bilan 10 anak tal; gam haong nan patui veik palagaih majam bruk ngak pakat karja, labik pato megru saong y te. Dalam nan UB Bhap bini dom tinh ban tok pato tacei patui veik ramik caga dom labik ngak bruk pakat karja, dom labik pato megru mam non, tieu hoc, pho thong di dom xa, phuong, labik y te di bhum palei (salah blaoh dalam bilan 8-2026). Mentri Y te ramik caga, peih ngak veik tui jalan patakik dom sang iek ruak pasak saong patakik gah pasang iek phap y pasak saong pasang iek glo akaok.

So Y te TPHCM caong khin daong taong abih jien bac megru ka bac si noi tru, glong abih 100 trieu dong sa urang sa thun. Njauk caik hatai lac urang mbang tui sarak sanya ngak bruk takik abih 6 thun di dom sang iek ruak, jru ruak di karja kayua So Y te TPHCM khik iek hadei bac blaoh. Sarak hu ba tabiak  piah patrun naong trak jien bac, ba mbuan lagaih ka bac si ranaih umo tui bac tagok glong, tui nan pambuak bruk pato haong urang ngak bruk di he thong y te TPHCM.

Kong an tinh Dong Thap peih ngak Harei peih padang labik ngak bruk di jabat kong an 5 xa, phuong bhum tapen negar di phuong Hồng Ngự, Thường Lạc, xa Tân Thành, Tân Hộ Cơ saong Thường Phước. Danak dak hu sang ngak bruk, sang daok padeih padei, gilang phao karaong,…hu taong abih jien buh tame kuhria labaih 205 ty dong. Bruk buh jien tame praong laneing lanoi ka co so vat chat piah brei kein lagaih piah ka urang jakar, bol lin sahnang hatai ngak bruk, paglaong siam lagaih bruk pasang iek labik bhum, duh Rahra saong khik kajap an ninh, siam mekre tapen negar.

Tapa pasang iek sarak angan bhap bini hu daong ayua gaok kan kandah ribuk ia sua, UBND phuong Hàm Thắng, tinh Lâm Đồng duah mboh 21 baoh sang oh njauk hagait min hu taduan jien daong. 21 baoh sang ini di palei Kim Ngọc, jien 5 trieu dong sa baoh sang. Kuhria jien daong suan manuac lac 105 trieu dong. Hadei tuk duah mboh bruk nan, UBND phuong jak ba dom baoh sang bayar veik taong abih jien nan. Mbiah tal ini, dom baoh sang nan kuhria bayar veik.

So Ngak nong saong Alam langik Ban raya Dong Nai pambuak haong Kong an Ban raya HCM pasang iek, duah mboh klau labik raong glang di phuong Trị An saong Dầu Giây (Ban raya Dong Nai) hu pabui njom janih Salbutamol. Dom labik nan oh tut angan pathau khan bruk raong glang, pataom blei pabui hadei nan pandar janih pakauk srau haong haleik asar brei ka pabui mbang piah tagok kilo samar. Urak ini So Ngak nong saong Alam langik ban raya Dong Nai hu ba 3 harak gal tal Kong an Ban raya Dong Nai.

Hang ngak radaih oto di Nhat Ban Toyota mek tame veik 655.000 radaih Camry di dunya kayua khut man hinh hien thi ba tal dom gom saong caga salamat oh ngak bruk tuk peih radaih. Bruk nan mbuan ba tal bala, kayua urang peih radaih oh thau gom caga salamat, tui nan dom radaih karei oh thau brei salih jalan peih radaih atau brei thau bala meng po radaih. Mbang ini mek veik radaih tame  di Bắc Mỹ, Trung Đông, châu Á saong negar karei.

Liban hu jeng negar akaok meti dalam dunya Arab hu tayah klak hukum pametai. Tui khau tin di My, Liban kuhria salih hukum pametai meng daok guk luac raidiuk gam haong ngak bruk kateik geik. Urak ini oh ka thau bruk ngak kateik geik glaih glar hu ngak yau habar. Liban urak ini hu brei bruk taong bhat kateik geik glaih glar dalam hukum, min dalam dom thun jaik ini negar ini laik tame bruk kurang prein ngak saong urang pasang iek majam sang guk hu biak rilo urang daok guk.

Bilan ribuk urak ini di bhum Tây Bắc Thái Bình Dương mbuan jeng sa dalam dom bilan ribuk hajan praong abih, dalam langik El Nino khang tagok. Dom mbang ribuk di bhum Tay Bac Thai Binh Duong meda tuh tame Trung Quoc, Nhat Ban, Philippines saong Việt Nam. Jabat pablei salih Tropical Storm Risk ngak bruk di London, Anh hu 20 mbang ribuk rah tabiak dalam bhum, dalam  13 mbang ribuk khang./.