Pahadar 81 tun harei padang Rayo Sap ndom Viet Nam (7/9), Kapul ngak bruk di Bo Tu lenh Bol lin Bien phong kayua Thieu tuong Vũ Quốc Ân, Phaok chinh uy Bol lin Bien phong ba akaok hu mai rivang tadhau ayuh Rayo Sap ndom Viet Nam. Thieu tuong Vũ Quốc Ân brei mboh bruk thau dhar phol tal Rayo Sap ndom Viet Nam kayua bruk daong prein, pambuak gauk karo kajap luac rilo thun tapa saong ndom khang, riyak papar di Rayo tuk halei jeng lac gah pambuak njauk je tame, nao tal dom labik atah bayah abih di tapen negar piah dil samu ba khau tin saong hatai anit ranam tal urang jakar, bol lin saong mikva dom bangsa…

 Di xã Phương Bình, harei kabroi, Pho Akok UBND Ban Cần Thơ Vương Quốc Nam hu mbaok di Var tabiak ngak bruk Daong padang sang daok ka urang lac anek jeng di urang lin cach mang dahlau diah gaok jru mek kalik kruac. Ban Cần Thơ hu abih tih 125 baoh sang taik tahak di 47 xã, phuong hu padang birau, ramik pasiam mbang ini. Ini lac bruk thau dhar phol dom baoh sang guak gar var rup drei ngak bruk daong taneh ia, pambak praong jalan sahaneng “ bayar dhar phol” dalam bhap bini.

Tinh Vinh Long hu taong abih taneh palao raong hadang su saong hadang the takai patih hu labaih 65.000 ha, mek hu jaik 163.000 tan. Yaok mbang raong, rahra meda mek hu jien laba meng 500 tal 700 trieu dong/ha. Ong Phạm Minh Truyền, Phaok Yam ndok So Ngak nong saong Alam langik tinh Vinh Long brei thau, tinh daok pataom tame quy hoach saong buh jien tame ka ha tang jalan mbak, halai ndien duh ka bhum raong hadang kong nghe glaong. Gam haong nan, tinh jeng ieu padang sang mac ngak hadang hu kong suat 18.000 tan/thun, piah ba kaya tame dom darak pasar praong yau Trung Quoc, Japon, Hoa Ky saong chau Au.

Sang bac Dai hoc Lac Hồng pambuak haong Sang bac Song ngữ Lạc Hồng birau peih bruk alin brei 50 jamraih ka dom sang bac di bhum taphia negar  Dong Nai, samar ba kong nghe mai tal gru pato saong anek saih tuk tame thun bac birau. Bruk daong sumu samar nan lang talaih di dom kan kadah, daong gru pato saong anek saih bhum taphia negar hu bac pandar kong nghe, bac online saong thau pandar salih taka so dalam mbuk pato pakai.

UB Bhap bini tinh Dak Lak bahrau njauk hatai ka jalan ramik jaik 484 ty dong piah peih ngak 7 danak dak ilamo khoa hoc, kong nghe saong salih taka so dalam gah y te, sangka prein yava rahra. Ong Phạm Minh Hữu, Phaok Yam ndok So Y te tinh Dak Lak brei thau, piah dom danak dak hu ngak siam lagaih, gah y te peih ngak tui yaok jalan ngak, brei caik dahlau dom banah hu makna saong pambuak tapak tal rahra. Pataom tame salah blaoh ha tang kong nghe khau tin, padang saong pambuak dom co so du lieu y te.

Athak kapal daom me-om di ralo bhum Dong Nam A, ba tal sang bac kareik pabah mbang, bhap bini brei cuh pataik pacang idung pabah saong langik jhak di ralo labik. Athak lin tapin  yau urak ini lac kayua dom mbang apui khuah glai saong taneh di kaoh pulao Borneo saong Sumatra di Indonesia. Tui kuhria, hu jaik 300 ribau hecta taneh di Indonesia mbang jeng bau meng akaok thun ini.

Rajaei An Do bahrau ba tabiak jalan padang veik 100 mblang kapal ahaok par dalam 10 thun anak tal, hu taong abih phun jien labaih 300 ty rupee, sumu labaih 3 ty USD. Danak dak ini daong pabak daong jien padai piah pasiam dom mbang ahaok par dalam labik, gam haong nan pachreih dom gah ahaok par oh pandar dom jitvu labik mai tal bo bruk pablei salih meda gaok kan kandah meyah oh hu daong.

Hadei ia sua praong rah tabiak di harei 26/8, Nepal ba tabiak jalan khik caga di gah ala di 4 binek mbuan rah tabiak bala. Danak dak “ Khik jalan mbang saong drap ar anak ia ribuk sua kayua langik salih karei di dom labik tapen kraong Nepal” kuhria labaih 50 trieu USD daok peih ngak. Labaih 2,3 trieu urang daok di labik tapen ceik gaok kan kandah meda hu daong mbang tui danak dak ini./.