Bruk raong hadang  pambuak haong ngak padai cakrok samar

Patui mbang nao rivang, ngak bruk di Mỹ saong LHQ, biar harei 16/5 ( tui tukvak pak nan), Thủ tướng Rajaei Phạm Minh Chính hu mai rivang Sàn giao dịch chứng khoán New York (NYSE), hu mbaok ndom bai saong CEO di dom kapol nyaom, kadung jien buh tame ngak mbang dang akok di  NYSE. Jeng dalam mbang ini, Thủ tướng  hu mbaok maong iek tuk peih bruk jao dua harak pambuak gauk dalam gah jien padai, gilang pariak,  kadung jien buh tame ngak mbang  di dom gah Viet Nam saong Mỹ. 

Tapa peih ngak rilo thun, bruk raong hadang pambuak haong ngak padai hu taong yaom lac bruk cakrok khang kajap ba jien tame glaong ka urang ngak nong, abih di nyu lac dom baoh sang daok di tapen tasik bhum taneran kraong CL. Hu thau di thun 2000, meng tuk hu Sarak 09 brei adat salih dom bhum taneh takik kein laba yau taneh ngak padai, ngak sara, bhum gluh baok tapen tasik tapa raong hadang, bruk raong hadang  pambuak haong ngak padai cakrok samar, meng 71 rabau ha tagok labaih 200 rabau ha raong hadang, meblah labaih 29% duk haong taneh raong hadang di dom tỉnh dalam bhum taneran kraong CL, sản lượng hadang raong hu jaik 129 rabau tấn.

UB bhap bini Ban raya HCM birau patabiak  jalan ngak piah peih bruk klauk vaccine COVID-19 mbang klauk veik ka dua(lac mbang klauk ka 4) brei ka bhap bini daok dalam ban piah pabak praong bruk klauk vaccine saong ngak jeng prein pacang ruak khang kajap pacang caga jit ruak COVID-19.  Mbang klauk ka 4 ini brei ka dom urang lac: urang umo 50 thun tagok,  urang umo 18 thun tagok  trun prein pacang jit meng mbiah tal trak,  urang mbuan njom COVID-19 lac urang jakar y tế, urang jakar ngak bruk pacang jit, urang ngak, urang ngak bruk di dom KCN.

Rilo bruk ngak pachreih tui Adit negar pacang caga bala meng langik tasik bahrau hu peih tabiak di xã Lai Hòa, ban sit Vĩnh Châu, tỉnh Sóc Trăng, yau: Bruk pakacah cih rup cih langiu sang bac ka anek saih tiểu học saong bruk pakacah kateik chuông ameh “Gam haong adei pacang caga bala meng langik tasik – Dak padang harei hadei khang kajap” brei ka anek saih trung học cơ sở di Sang bac Tiểu học saong Trung học cơ sở  kayua mBan tacei jalan pakat negar ka pacang caga bala meng langik tasik haong UNICEF Việt Nam pambuak haong Sở pato megru tỉnh peih tabiak. Ini lac jalan peih tabiak piah brei thau saong pambak praong dom bruk pakacah tal rilo sang bac di dom labik karei dalam tỉnh, bhum saong dalam negar.

Akok bilan hajan, jantak (mưc) tame takai tasik duah pandap mbang nan ye bruk vah jantak di urang nao tasik Phan Thiết mbuan lagaih jang, tui yaom pablei 100.000 sa kilo, yaok var sa gilai li-i duah hu 500.000-800.000 đồng. Jantak  vah di tasik Phan Thiết drei sit, atah  8-16 cm, hu dom urang takre mbang pandap tasik lac janih bingi abih, nyu racam, oh khang yau jantak praong.

Hãng truyền thông karja Triều Tiên lac KCNA mesup ini 17-5 brei thau, Triều Tiên hu ba bol bala tabiak parabha jru pacang COVID saong ba labaih 10.000 urang y tế tabiak tui iek dom F1 piah pacang cakak jit ruak pambak praong. Jabat pacang caga jit ruak samar drah pakat negar daok brei thau lac, labaih 269.000 urang mboh pandiak dalam rup, patagok abih tih jaik 1.500.000 urang. Dom menuac metai tagok 56 urang di melam blaoh.

Meng harei ini, 35 ribau sang bac di Thái Lan brei peih pabah mbang gilac hadei di 2 thun  peih bruk pato bac tui jalan online. Mentri Y tế công cộng Thái Lan brei thau meda oh kareik pabah mbang, tal bac yaom lac hu dom mbang urang njom ruak dalam anek saih, sinh viên.   

Bol bala Nga harei kabroi brei thau lac hadei di mbang ginum biai haong lambaok gah Ukraine hu njauk gauk ka bruk panduan ba urang lin njauk rambus daok njauk pacang cakak dalam sang mac gang thép Azovstal di ban gah meraong Mariupol. Tapa nan meda tamat mbang taong suai lavik saong bak darah di abih kuhria dalam 3 bilan mesruh gauk di Ukraine, jeng lac bruk thất bại praong di Kiev./.

Urang lang: Bhumi & M. Phuong – 17/05