Hu mbaok di Adit “Jum pataom dom bangsa - Drap ar ilamo Viet Nam” thun 2025 ngan haong kadha “ Jum pataom hatung hatian - Daong ka bhum kreh negar”, rah tabiak di Ha Noi, Thu tuong Phạm Minh Chính khan lac hadom hatai ranam, iek praong, bruk njauk ngak meng Palei Ilamo - Yulit dom bangsa Viet Nam tal bol bhap Bhum kreh negar daok gaok bala trak abih hatung hatai jum pataom bangsa, hatung hatai iek mong ayut sahabat, ndung bak hatai ranam saong “oh caik thei daok veik gah likuh”. Gam iew da-a doanh nghiep, bhap bini  dang prein, sa hatung hatai klak rabha anit ranam haong bhap bini raha bhum kreh negar  tuk gaok kan kandah. Di var nan, dom kapol nyaom, doanh nghiep hu jao brei jien daong ka bhap bini bhum ia sua 540 ti dong. 

Kham merat samar ba raidiuk bhap bini bhum ia sua hu gilac veik raidiuk yaok harei, Bộ Tư lệnh Vùng 4 Hải quân patui veik bruk jak ba jaik 1.000 urang jakar, urang lin gam haong radaih daong ka bhap bini ramik pasiam hadei ribuk sua. Dom urang lin ramik hacih yaok pluh km jalan nao mai; 12 sang bac, 3 jabat ngak bruk di UBND, 1 pasak y te saong jaik 100 baoh sang bhap bini  di phuong Đông Hoà, Tuy Hoà, Bình Kiến, Bắc Nha Trang saong xã Diên Điền. Tui di nan, daong jaik 100 khoi ia taba, 5 ribau thung mitom, brah, ia tasaw, ia menyum, khan ao, phui men…

Page ini, tinh Dong Nai ba jaik 300 urang nao ngak bruk daong ka bhap bini tinh Phu Yen( klak) ramik pasiam hadei ribuk ia sua. Dahlau tuk tagok jalan, dom urang ngak adat pahadar dom urang metai kayua ribuk ia sua. Dom urang ini hu dom bac si, y te; gah alam moi truong saong Doan dam dara. Kapol urang ba tui 10.000 kadung jru, 2.000 jru iek ruak, 2.000 paok pandap gam 600 trieu dong piah daong sangka prein yawa ka mikva, pacang caga jit ruak saong klak rabha kan kandah haong bhap bini bhum ia sua.

Tui kuhria mboh dahlau langik hajan praong meda ngak ribuk mbuan rah tabiak bala, So Ngak nong saong Moi truong TPHCM caong khin so, dom bhum palei samar ngak bruk caga dahlau. Bruk pathau khan, khik ka gilai kapal hu salamat, peih kareih ia di binek  luac harei melam brei ngak catang abih. Gah daong duah urang gaok bala brei hu ginup urang ngak bruk, radaih, mac jamraih piah ngak bruk samar daong. Kapal gilai  taong chap ikan  labik tathik atah brei khan labik mbuan rah tabiak bala piah samar plaik njiak tame labik salamat.

Dong Thap hu taneh bein phun mbang baoh praong abih di Bhum taneran kraong Cuu Long jiak 140.000 ha phun pala…Dalam nan, phun thanh long meblah 9.400 ha. Gah chuc nang  daok kham padang saong peih praong bhum pala thanh long piah pablei tabiak negar langiu. Mbiah tal ini, Dong Thap  hu padang  bhum pala thanh long pablei tabiak negar langiu jaik 9.400 ha, brei paik baoh yaok thun labaih 236.000 tấn. Tinh Dong Thap  ba tabiak bruk kham merat  tal puac thun ini, hu labaih 3.600 ha thanh long mek hu tanut VietGAP, GlobalGAP.

Bruk ia ribuk sua saong glut jaleih taneh di Malaysia daok rah tabiak trak ngak ka 15.000 urang brei panduan ba nao labik karei. Rajaei Malaysia daok pataom tame abih dom prein khang  duh ka bruk panduan ba, daong duak saong takik palai pajua kayua bala meng langik, dalam nan hu jiak 100 pasak daong hu padang tagok di 7 bnag piah daong ka bhap bini saong gaok kan kandah kayua ribuk ia sua.

Trung Quoc ba tabiak bruk cuh tagok langik vũ trụ Thần Châu-22 dalam harei ini 25/11 meng Pasak cuh ve tinh Tửu Tuyền, gah Pei Trung Quốc. Tui bruk ba tabiak, kapal haok Thần Châu-22 jaik ba dom urang roh duak tagok langik balai vu tru Thien Cung di bilan 4 thun 2026. Yau nan min, dalam bruk ngak birau ini, kapal gilai nan meda par tagok oh hu urang peih dreih yau kapal ahaok gilac mai drah ka dom urang roh duah.

Tong thong Donald Trump mbaoh harak jhul pakhang bruk pandar tri tue nhan tao AI dalam taong abih dom gah roh duah ilamo lien bang. Danak dak birau caong khin brei jhul samar jalan ngak birau dalam dom gah ngak tabiak jru cavao, nang luong saong ky thuat. Nhà Trắng khan lac danak dak kuhria pachreih bruk hu mbaok tame di rilo kapol kong nghe praong di gah AI./.