Thu tuong Rajaei birau ba tabiak harak Bruk patagok gah pato megru tal thun 2030, pamong tal thun 2045. Bruk patagok pambak praong gah pato megru khik brei sumu gauk dalam dom bruk bac megru, duh ka bruk bac megru luac rai. Tal thun 2030, pato megru Viet Nam mek hu ilamo birau sumu bhum taneh chau A saong tal thun 2045 mek hu ilamo sumu dunya.

So Cong thuong Ban raya Ho Chi Minh tacei pato pakhang bruk bruk pasang iek, pandap panda asar siam, thau cambaic laic hu meng halei mai piah duh ka Tet Nguyen dan. Gam haong nan pataom tame bruk pathau khan dom bruk mbuan njuak ruak kayua pandar dom pandap pandar oh thau cambaic laic meng halei mai, pandap oh hacih, pandap oh hu bi-ar harak pasang iek...; pato manuac pandar thau palih ruah dom pandap pandar hacih sa-at, thau krein cambaih dom pandar ja, pandap ngak mblak, pandap abih harei pandar.

Darak binguk Thun birau nasak Ula Naih saong danak dak Tet Tay Do meda peih ngak meng harei 17- harei 28/1 di mblang bein Tay Do, quan Cái Răng, Ban Cần Thơ. Di labik ini meda hu 200 labik parang iek dom janih bingu ngak mekre, phun thaik thaot gheih, bonsai di dom urang blei, sang bein saong dom HTX di Ban Can Tho saong dom tinh bhum Taneran kraong Cuu Long. Bruk nan piah ba mbuan lagaih pambuak urang blei, po bein, baoh sang ngak bingu mekre ban Can Tho saong dom tinh bhum taneran kraong Cuu Long; daong dom po bein pablei salih, blei bingu ngak mekre, duh ka bruk main sambai saong hu blei pandap Tet di bhap bini.

Thun 2024 mankna di gah ngak nong ngak glai, kaya kan dalam ia di tinh Dak Lak taduan hu jaik 61 rabau ty ndong, rik prein ralo tame bruk patagok di tinh thun 2024. Thun 2025, gah ngak nong tinh Dak Lak hu ba tabiak jalan ngak patagok labaih 5%, kham marat padak padang gah ngak nong tui jalan ngak bahrau, hu makna glaong saong khang kajap; Jhul catang bruk pandar salih taka so di gah ngak nong, peih praong darak pasar pablei kaya nong; jak ba phun jien buh tame ngak ket cau ha tang duh ka bruk ngak tabiak pandap pandar.

Di tinh Ben Tre, baoh la-u that saong la-u thu daok pablei hu yaom glong min po bein oh ginup la-u piah pablei. Bruk ba tal ralo taneh la-u brei takik baoh kayua halak akaok njuk palai payua. Urak ini, Chi cục Pala drak saong Khik caga phun pala tinh Ben Tre peih palao 4 trieu 7 rituh drei danko tame bein la-u; peih bruk pametai halak jhuk akaok…Tui nan pakhang bruk tacei pato po bein dom jalan pacang caga halak, oh iek lap saong kaoh klak phun la-u abih baoh, njom ruak piah pala veik.

Dom urang pasang iek duis saong canh sat Han Quoc harei ni (3/1) hu tame sang Tong thong daok njauk mayai duis - Yoon Suk Yeol. Ni lac mbang akaok mati gah chuc nang nagar ni duah chap mek sa tong thong daok ngak bruk. Jabat pasang iek bruk tham nhung ngan haong dom urang jakar pakat glaong (CIO) ngak tui adat chap mek ong Yoon Suk Yeol tui dom kadha mayai duis kayua ong ni ngak srau dau nagar saong pambak bruk di drei peih ngak thiet quan luat dalam tukvak katut di harei 3/12/2024.

Ban Trịnh Châu, hu jeng bhum palei akaok meti di Trung Quốc brei ngak tui hukum pakauk pandar phone di dom sang bac, piah trun takik bruk jak di kong nghe ngan haong anek saih. Anek saih tok pandar phone tuk hu sang bac brei adat. Bruk ba tabiak nan caong khin daong rik ngak salih birau bruk bac da-a, daong anek thau caik hatai  jang tame bruk bac da-a saong takik dom  bruk jhak kayua pandar pandap kong nghe birau.

Dalam thun ni hu tal 30 trieu 400 rabau urang di Sudan, sumu jaik 64% bhap bini dalam nagar daok caong hu bruk daong pahala. Dalam dom manuac caong hu daong iek jaik 16 trieu lac dam dara. Masuh matiak katung lavik ngak plang lahik labaih 28 rabau urang saong jaik 12 trieu manuac panduan nao daok labik karei. Lien hop quoc hu pathau khan jalan ngak piah daong manuac sia hu makna 4,2 ty do la My ka Sudan dalam thun ni piah daong ka jaik 21 trieu manuac mbuan gaok kan kandah pandik pandua./.