Hajan ia sua tagok samar, rilo labik dalam tỉnh Phú Yên oh nao mai hu

Brei panuac dalam ginum biai tui nyaom ka bruk padang ngak dự thảo Sarak Nyaom roya Đảng mbang XIII biar harei 10-11, Thủ tướng Nguyễn Xuân Phúc kakei brei pataom tame padang ngak saong cak rok patagok anek manuac, sarak jum pataom, jalan tui iek jhul bruk ngak di urang jakar, urang đảng dalam ba akaok nao dahlau, ngak siam bruk ngak di drei brei ka urang karei bac megru tui. Thủ tướng lac: Meng vaktu ini hu rilo urang jakar pakat glaong njauk ba tabiak kaoh tui hukum, suan bruk halei langyah tui hukum nan. Dom bruk ngak oh njauk, tieu cuc, tham nhũng, ngak laba kapol nyaom njauk brei kaoh catang, jia bhap bini jia tame”

Harei kabroi, javap jalei tangi sua di dom urang Quốc hội di mbang nyaom ka 10 Quốc hội mbang 14, tui panuac tangi sua di ong Nguyễn Ngọc Nghĩa ka bruk pok brei urang Pa Cô lac sa dalam dom bhap bini bangsa Việt Nam, Akaok mintri Chủ nhiệm Ủy ban bangsa Đỗ Văn Chiến ndom lac, taeng Ủy Ban bangsa di rajaei oh ngak hu bruk pok brei angan ka sa bangsa kayua nyu dok langui bruk di akaok mintri Chủ nhiệm Ủy ban bangsa. Akaok mintri hu pathau khan song pok panuac ka bruk padang ngak danak dak, padang jalan duah thau ka cambaih laih, angan ieu di dom bangsa song padang danh mục dom bangsa Việt Nam. Hadei di nan, mintri daa dom urang ilamu hu mbaok tame roh duah song padang mban ramik ngak danak dak.

Tui Pasak kuhria mboh dahlau bruk khí tượng thủy văn pakat negar, ribuk VAMCO tame tasik biển Đông di harei 12 /11 saong jeng ribuk ka 13 thun 2020. Ini lac ribuk khang, nao samar, khang abih di tasik Biển Đông meda tal pakat 13-14, tagok pakat 16. Tui kuhria mboh dahlau ribuk ka 13 meda tame tapak tal gah kreh negar dalam harei 14-15/11. Biar harei kabroi, Phó Thủ tướng Rajaei Trịnh Đình Dũng, Akok Ban tacei ba jalan pakat negar ka bruk pacang caga bala meng langik atsik peih bruk ginum biai saong dom Mentri, dom gah ka bruk tacei ba jalan pacang caga ribuk ka 12 saong 13. Tapa var ginum biai nan, kuhria tal 6h00 harei 10/11/2020, dom tỉnh meng Thanh Hóa tal Bình Thuận brei thau, yaok pataom, tacei ba 59.752 gaiy gilai gam saong labaih 289.000 urang. Urak ini, taong abih gilai hu tame labaik palaih njiak salamat atau tabiak truh labaik tasik hu ribuk.

Kayua ribuk ka 12 dalam beir harei song melam kabroi 10/11, hajan ia sua tagok samar, rilo labik dalam tỉnh Phú Yên oh nao mai hu. Sa urang di xã Hòa Thắng, nao angaok labik ar pacang Phú Lộc njauk dane takai laik trun krong Ba njauk ia ba theik. Urak ni karja xã song boh sang daok dong duah. Huyện Đồng Xuân nao mai kan kandah kayua ia sua angaok krong Kỳ Lộ tagok glong. Pak di melam nan, bruk dong ka bhap bini hu gah dong duah peih ngak chip. Karja huyện Đồng Xuân hu ba 2.000 urang di bhum ia sua tal labik dok siam mekre. Di dom jalan dok dauh ia, dom gah chức năng padang paga pacang song oh brei ka menuac, radaih nao mai

Kapol pataom talang liệt sĩ K72, di Mintri Chỉ huy Quân sự tỉnh Bình Phước hu duah mboh abaih tih 24 bộ talang urang liệt sĩ di labik tổ 1, palei K54, xã Lộc Thiện, huyện Lộc Ninh. Labik duah mboh talang di liệt sĩ lac taneh kubo di sang iek ruak K54, Cục Hậu cần miền B2 dalam tuk mesruh metak saong kol Mỹ. Dom urang metai nan lac thương binh trak hu ba tame sang iek ruak. Atau dom liệt sĩ duah mboh nyu ralai abih saong oh caik veik inem, atau angan je yau nan ye kan thau daok đơn vị halei jeng yau angan di urang liệt sĩ. Bộ chỉ huy quân sự tỉnh Bình Phước caong khin dom urang hu mbaok mesruh metak, ngak bruk di sang iek ruak K54 khan brei thau ka dom urang nan piah ba dom sa-ai nan mai sang di drei.

Harei 10/11, ong Joe Biden, urang hu gah harak mbao Mỹ brei thau mek hu jayah dalam mbag palih ruah tổng thống Mỹ meng bloh hu ndom lac, bruk Tổng thống Donald Trump oh taduan bruk palih ruah lac sa bruk “srau kadau”. Ong GiâuJoe Biden daok hu ndom lac, bruk ong tagok ngak tong thong dok rah tabiak siam mekre yaom lac Tổng thống Đô-nan Trăm oh taduan bruk palih ruah, saong brei thau lac samar pok dom menuac tame dalam rajaei bahrau di tuk Lễ Tạ ơn.

Harei 11/11 lac harei lễ di urang oh ka tok diuk tok pasang di Trung Quốc saong ini lac harei piah dom blah web pabeli salih praong di Trung Quốc yau Taobao di Tập đoàn Alibaba saong Jingdong di Tập đoàn Jingdong JD ba tabiak danak dak pachreih urang blei pandar. Yaom lac, gaok rilo kan kandah kayua jit Covid-19, yau nan min, bruk blei pandar di bhap bini Trung Quốc biak ralo. Thun ini, piah trun bruk giao dịch dalam harei 11/11 ye dom blah web pablei salih peih ngak dom bruk pachreih urang blei meng harei 1/11. Tui yaok pataom, meng ahrei 1/11 tal mong 0h30 minit harei 11/11, tui tukvak labik ini, blah web pablei pandap online Taobao di Kapol pablei salih Alibaba hu 372,3 tỷ nhân dân tệ (sumu 56 tỷ USD).

Liên minh châu Âu (EU) song Hội đồng châu Âu (EC) bahrau mek hu thỏa thuận piah ngak catang dom sarak ka dom bruk pabak song pablei tabiak negar langui công nghệ pasang iek không gian mạng.Thỏa thuận brei paglong dom jalan pasang iek ngan song dom pandap hu mong lac pandar hu ka 2 bruk - yau công nghệ duah thau mbaok meta song phần mềm gián điệp – piah pacang cakak bruk dom công nghệ ni hu pandar pabak ka bruk hu mbaok tame quyền tự do song dom quyền cơ bản di bhap bini. Công nghệ hu mong lac pandar hu ka 2 bruk jeng hu dom janih jamriak máy tính kein lagaih glong , kapan haoh oh hu urang peih song dom hóa chất./.

Urang lang: Hani Pha – Ái Nghiêm – 11/11 10:32:01