Dang gui ba mbang Nyaom biai kuhria rah tapa bruk ngak di  “Danak dak Quang Trung” samar chip padang, pasiam sang daok di dom baoh sang hu sang daok njauk khat lahik kayua ribuk, ia sua di bhum Kreh Negar, Thu tuong Phạm Minh Chính pandar dui katut tukvak, kham merat tal harei 15/1/2026 brei salah blaoh bruk padang veik sang jaleih. Daok asal kadha ramik labik daok karei di tinh Gia Lai, Thu tuong pok meyaom dom baoh sang hu ta-eng buh jien tame piah salah blaoh bruk padang, pasiam sang daok; likau karja samar tani tanat raidiuk bruk di rahra; pasang duah, daong ka rahra dom ndap nda kaya njauk hu dalam sang; jhul tagok ngak mbang, pablei salih.

Hadei sa  bilan peih ngak Danak dak Quang Trung daong ngak sang ka urang bhum ia sua, Dak Lak ngak hu 6 baoh sang akaok meti saong jao ka mikva. Ong Tạ Anh Tuấn, Akaok UBND tinh Dak Lak khan lac, yaom lac langik oh lagaih saong kurang ndap nda, kurang urang padang ngak tuk camereip, mbiah tal ini dom kan kandah hu ngak salah. Dak Lak kham merat ngak brei salah taong abih bruk padang ngak, ramik pasiam sang daok piah mikva samar hu labik daok tani tanat.

Meng thun 2020 tal ini Viet Nam rah tabiak labaih 24.000 mbang chot pagat tapa mang, ngak khat lahik jaik 40.000 ty dong. Bruk di janih kol duas ini biak rilo. Rilo abih lac ngak ja jabat karja piah pandar payua jien ngak cambaih laih, langyah bruk. Tui dai ta Nguyễn Thanh Hà, Phaok Jabat Canh sat hinh su Mentri Kong an, kayua kein lagaih biak praong, bruk kan kandah biar nan dom kol duas oh maong tal hukum saong dak harei dak padang dom kapul chot pagat di dalam dunya. Kol nyu pandar patruh piah pambak tame labik di dom negar Dong Nam A lac labik hukum saong karja pasang iek oh kajap piah pasiam dom “pasak chot pagat”.

Akaok UBND tinh An Giang birau khan brei thau 9 don vi hanh chinh pakat xã An toàn khu di tinh An Giang, nan lac xã: U Minh Thượng, Vĩnh Hòa, Vĩnh Thuận, Vĩnh Bình, Đông Hòa, Tân Thạnh, Đông Hưng, An Minh, Vân Khánh. Bhap bini diukrai di dom xã  An toàn khu hu mbang tui sarak daong phun jien, daong patagok kinh te - xa hoi saong khik ramik dom asar kadha siam gheih sajarah dakrai tui hukum ba tabiak di Rajaei, Thu tuong saong hukum karja.

Piah ngak mbang padai Dong Xuan 2025-2026 lagaih, mek hu jak jeng ba tabiak, tukvak tapa gah ngak nong Ban raya Can Tho hu ba tabiak dom harak tacei ba bhum palei padang saka ngak hamu ka njauk. Gam haong nan pachreih dom bhum palei ramik bilan pala tui saka pala padai, pambuak haong jalan “trun pajaih plaih anek rih, ngak gam gam, pataom tame ka yaok bhum, yaok mblang hamu, caik hatai bruk pandiak bhang di akaok mbang pala”. Mbang padai Dong Xuan, Can Tho hu jalan ngak trun pajaih haong jaik 291 ha taneh, padai yuak hu kuhria labaih 2 trieu tan.

Rajaei Thai Lan peih Pasak Tacei ba Pacang caga saong Patrun bala angaok jalan mbak piah peih ngak sumu, kein lagaih dom jalan nao mai hu lagaih ka bhap bini dalam 7 harei padeih padei thun birau ngan haong kadha “Peih radaih salamat, peih nduac cadu, takik bala”. Toa an Hukum Thai Lan jeng hu ba tabiak bruk kakei dahlau dom bruk ngak suan hukum jalan mbak, dalam nan ralo lac peih radaih suan hukum tuk menyum alak. Jalan taong phat bruk nan biak trak, meda daok guk saong taong bhat jien.  

Rajaei Indonesia brei patagok brah khik piah meng 3 trieu tan tagok 4 trieu tan di thun 2026, piah srap gap ka hatai caong padai brah pakat negar dak harei dak glaong. Indonesia jeng daok tagok jalan ngak neh klak tanut yaom brah pablei rai glaong abih pambak tame labik saong pasiam sa tanut pablei rai rilo abih grauk dalam negar. Langiu brah, Indonesia jeng daok srap gap ka hatai caong patagok ngan haong dom ndap nda padai brah, dalam nan hu baoh menuk baoh ada, ikan, ralaow saong patei.

Italia ba tabiak sa sarak brei daong bol lin Ukraine tal abih thun 2026. Sarak birau hu brei tapa brei adat salih radaih, kapal ahaok, kaya kan saong dom mac jamraih bol lin ka Ucraina. Dalam nan, anak tal hu daong bruk duh bruk ngak, y te duh ka bhap bini jeng yau dom janih caga ten lua, ahaok oh hu urang peih saong mac jamraih pacang bruk taong tame mang./.