Thu tuong Phạm Minh Chính bahrau payua harak samar chip yaok kuhria, pasang iek, kuhria iek veik taong abih khan ka khat lahik ka sang daok di Rahra kayua hajan ia sua di dom tinh: Dak Lak, Khanh Hoa, Gia Lai saong Lam Dong. Piah samar drah pasiam, padang veik sang danaok ka baoh sang rahra Thu tuong pandar dom tinh kuhria dom baoh sang khut tayah, njauk ia theik; taong abih jien padai njauk hu daong Rahra pasiam, padang veik sang danaok… Khik kajap rahra hu sang daok karo salamat dahlau Tet nguyen dan thun 2026.

Anak bruk rah tabiak sraw kadau, ribuk rah tabiak gam gam, tinh Gia Lai khan brei thau ka bruk samar ka bala meng langik rah tabiak di 77 xã, phuong di tinh. Ribuk ia sua rah tabiak gam gam ngak metai rilo manuac, 11 urang njauk rambuac; labaih 100.000 baoh sang  jaleih, khut tayak, dauk dalam ia; labaih 540 ha danao raong kaya dalam ia, 254 long mbe ba theik; ngak khat lahik yaok ribau ha hamu padai, njam patam; …Kuhria khat lahik labaih 11.636 ti dong. UBND tinh Gia Lai iew gah bol lin, kong an, bien phong patui daong ka urang gaok bala, ba bhap bini rahra tabiak saong daong ramik pasiam alam moi truong.

Rilo labik daok rahra di gah Pur tinh Dak Lak urak ini daok kandaong rilo gluh, halau ia pandar njom nerak trak. Dom labik oh ka hu ndien, ia hacih piah pandar. Quan khu 5 hu brei radaih pajeng ia hacih pabak jaik 500m³ ia hacih tal dom labik daok rahra kurang ia, daong tapak ka 2.800 baoh sang rahra bhum ia sua. Bruk pabak ia hacih brei hu khik tani tanat tal tuk rahra meda ta-eng hu ia pandar gilac.

Anak bruk glut jaleih biak trak di rilo ribaong kraong ngak kan kandah tal raidiuk, bruk ngak mbang pala drak, UBND tinh Tay Ninh pok panuac likau Thu tuong Rajaei, pakat negar daong labaih 2.317 ti dong piah ngak 6 danak dak praong pacang caga glut jaleih. Bruk samar peih ngak dom danak dak nan rik tame khik kajap ar kraong, khik drap ar, jalan mbak sang danaok saong takik khat lahik kayua ribuk ia sua dalam bilan hajan ribuk.

Ndang uy - Bo Tu lenh Quan khu 9 hu jao bruk tame pandar dom danak dak jalan mbak saong sang daok dalam bhum Labik can cu Quan khu 9 dalam tukvak mesuh taong My di xa Đông Hưng, tinh An Giang. Dalam nan, tatua Kênh ngang Chủ Vàng di puk palei Ngọc Hiển atah 21m, praong 3,5m hu padang ngan haong taong abih jien buh tame 500 trieu dong. Bingun ini, Quan khu 9 jeng jao danak dak ngak pagam 77 gang gom nang luong hu taong abih atah 2 km. Gam haong nan jao 7 baoh sang Gul Pataom praong, sang hatai ayut cuai sahabat; alin hidiah 20 sruh radaih juak ka anek saih kathaot… Taong yaom kaom dom danak dak labaih 2 ty dong.

Ralo bhum taneh Dong Nam A daok yam tapa sa dalam dom bilan hajan biak praong kan kandah abih kuhria meng dom thun ini mai, rah tabiak rilo mbang gam gam. Indonesia ba tabiak bruk ngak samar chip caga bala ribuk meng ini tal harei 8 bilan 12 anak tal. Njauk ndem tal  lac di tinh Tây Sumatra, kuhria abih tih 13 huyen saong ban gaok rubuk ia sua. Urak ini, ia ribuk saong glut jaleih taneh di kaoh pulao Sumatra ba tal takik abih di nyu 24 urang metai saong yaok ribau urang panduan nao labik karei.

Rajaei Thai Lan hu samar chip ngak sa sang iek ruak ngak iek di Mblang kapal ahaok par Hat Yai tuk yaok rituh rahra brei panduan tal dom labik daok pandaok anak meta kayua kanjah jhak trak di ia sua. Dom urang pan bruk di Thai Lan brei thau, hu takik abih 2,7 trieu urang njauk kan kandah di 9 tinh gah Meraong negar ini. Daok dalam harei 26/11, labaih 3.000 urang hu panduan patruh Hat Yai lac labik njauk kanjah jhak trak abih.

Nghị viện Châu Âu brei khan tapa ka harak van ban pambuak tal bruk pandar mang xa hoi di uranaih umo ala 16 thun, dalam nan bruk praong jang lac dom gah ngak jitvu dalam uranaih jaik jeng dam jeng dara. Bruk njauk caik hatai lac dom nen tang mang xa hoi brei hu jalan pacang cakak urang tui thun umo, padang jitvu tui jalan salamat saong juai pandar thuat toan ngak pachreih dui ba uranaih tame.