Hajan ia sua di dom tinh bhum Kreh negar ngak labaih 100 ribau baoh sang rahra njauk ia dauk, khut tayah, 7 urang metai, 5 urang lahik. Thu tuong Phạm Minh Chính bahrau pandar dom jabat chuc nang saong dom bhum palei brei pasiam dom bruk hadei tuk abih ia sua, rilo meng lac sang bac; oh luai ka rahra kurang huak mbang angui cuk, eik lipa la-an langaoh. Gam haong nan pandar Mentri Jien padai brei ka Hue 150 ty dong, Quang Ngai saong Quang Tri 100 ty dong piah pasiam kanjah jhak kayua hajan ia sua ngan haong bruk ngak hu dui katut. Dom bhum palei brei thau tani tanat bruk khik piah ndap nda kaya… piah hu jalan daong.  

Dom harei tapa, hajan praong dui atah, ia ribuk tagok glong, ngak abih mblang hamu pala njam patam di xã Vĩnh Điều, An Giang ia dauk dalam; tui kuhria khat lahik tal labaih 3 ti dong. Urak ini, ia daok tagok glong veik. Piah takik khat lahik ka bhap bini, dalam luac 3 harei tapa, Bien phong Vĩnh Điều brei 100 mbang urang jakar, urang lin gam haong dom gah chuc nang saong karja brei daong bhap bini paik njam patam tagok.

 Angin ribuk bah tapa labik puk palei Thanh Tùng, xa Thanh Tùng, tinh Ca Mau dalam melam harei 28/10 ngak jaleih, papeih pabung rilo baoh sang saong khat lahik rilo danao raong ikan hadang kong nghiep di 13 baoh sang rahra. Bruk ini oh ngak bala trak ka urang menuac min ngak khat lahik jaik 1 ty dong. UB Bhap bini xa Thanh Tunhf hu pato tacei dom gah chuc nang samar chip daong rahra ramik, khik kajap karo salamat majam ndien saong jalan mbak nao mai.

Pachreih tui Harei Dunya Pacang caga Dot quy, page ini Kapol Gru jru ranaih umo Viet Nam pambuak haong Trung uong Kapol Gru jru Viet Nam pambuak haong Mentri Y te peih ngak Danak dak pakat negar Pacang caga saong Khik iek ruak Dot quy. Yaok thun dalam negar hu jaik 200.000 mbang urang ruak birau saong jaik 170.000 urang metai, glong jang ka 4 di Dong Nam A. Dahlau diah, ruak mboh ralo di urang taha umo, ye urak ini rilo urang umo meng 30 tal 40 thun, gaok mai sit jang. Kadha nan brei mboh dot quy oh lac bruk y hoc, bo daok lac bruk di xa hoi, kinh te saong bruk patagok di taneh ia. 

Tinh An Giang tame peih ngak samu dom jalan pasang iek catang ka labaih 880 gilai ikan oh ka hu ginup kein lagaih mbaoh tangin brei taong mek ikan di angaok tasik, piah pacang cakak taong mek ikan suan hukum, oh pathau khan saong oh ngak tui adat (IUU). Langiu di nan, tinh daok hu 640 gilai ikan mbuan ngak suan IUU, gah chuc nang hu pabak angan yaok adit, pambuak haong jabat, labik hu pambuak saong bhum palei pasang iek, pacang cakak ngak suan.

Bol lin Thái Lan saong Campuchia daok pambuak bruk haong gauk tani tanat, siam lagaih bruk mek veik phao ndao praong trak di bhum taphia negar gam haong bruk tui iek di kapol nyaom tui iek urang di ASEAN. Dalam sa bruk dreih yau ini, Thái Lan brei ba dom urang lin Campuchia gilac veik mai negar khik hadei bol lin Thái Lan duah thau dom bruk saong harak gal, dalam nan hu bruk khik iek prein yawa dom urang lin Campuchia piah ngak njauk hukum saong cambaic laic.

Tong thong Indonesia Prabowo Subianto hu ieu dom negar dalam ASEAN guk pataom dalam bruk bo dalam dunya dak harei dak neh rabha saong siam mekre oh daok karo, gam haong nan ndom ka bruk hu makna di sap ndom pahasa ASEAN dalam bruk khik tani tanat dom adat di hukum nao tasik pakat dunya. Prein khang di ASEAN oh daok dalam bruk meraik gauk, bo daok dalam bruk gam gam padang bruk hu mbaok tame hu hatai dak padang saong siam gheih taong abih.

Bruk rajaei Mỹ kareik pabah mbang oh ka padeih, tuk bruk buh phieu ka 13 di Thuong vien harei kabroi 28/10  oh jeng. Rajaei kareik pabah mbang meng akaok bilan 10, ba tal rilo jabat lien bang padeih ngak bruk, yaok rituh ribau urang padeih ngak bruk atau  ngak bruk oh mek jien bilan, ba tal dom bruk brei mesre, bayar jien je saong jien pandar  suai damuai. Urang jakar khik iek bruk ini mboh lac, bruk rajaei My kareik pabah mbang  brei mboh cambaic laic  bruk kan kandah dalam dom pakat chinh tri My./.