Cần Thơ lac ban pasak di bhum ĐBSCL

Di mbang taom gaok ngak bruk haong ban Cần Thơ  tuk mesup ini, Thủ tướng Phạm Minh Chính  taong yaom glaong saong pok mayaom Đảng bộ, karja, bol bala saong rahra di ban Cần Thơ hu jumpataom gauk, kham marat yam tagok saong mek hu dom siam lagaih, rik tame dom bruk ngak hu di bhum saong dalam taneh ia. Thủ tướng hu ieu kakei, Đảng bộ, rajaei, bol bala saong bhap bini ban kham marat jang, sa hatung hatai haong gauk peih ngak jayah dom bruk ngak piah cak rok patagok KT-XH hu ba tabiak, brei mboh cambaih labik dang, sap ndem di ban pasak di bhum ĐBSCL.

Danak dak “Abih labik dalam taneh ia ba tangin tame daong ka urang kan kathaot” thun 2022 hu peih tabiak tuk melam 17/10 di Cung văn hóa Lao động hữu nghị Việt - Xô, Hà Nội. Bruk pakacah gauk “Daong ka urang kan kathaot – Oh caik ka urang halei njauk klaak veik gah likuk” kayua Thủ tướng ba tabiak piah ieu, piah jak ba bhap bini dalam taneh ia, doanh nghiệp, jabat, urang ngak pahla, dom kapul nyaom dunya... sangka iek glang, pachreih tui, daong ka urang kan kathaot, rik daong tame bruk khik kajap an sinh xã hội, patagok khang kajap di Đảng, Karja  ba tabiak.

Di mbang pataom mbaok pahadar 77 thun Harei doanh nhân Việt Nam (13/10/1945-13/10/2022) saong pok mayaom doanh nghiệp doanh nhân tỉnh Bình Dương thun 2022 ong Nguyễn Văn Dành, Phó akaok UBND tỉnh Bình Dương brei thau lac, doanh nghiệp lac prein pachreih patagok di gah kinh tế, kayua yau nan ye urang par akaok tỉnh Bình Dương tuk halei jeng sanka iek iek quyen saong kein laba tui njauk adat hukum di doanh nghiệp, ba mbuan lagaih di abih piah ka doanh nghiệp sahanang hatai pambuak haong tỉnh. Urak ini, Bình Dương daok jhul khang bruk salih bahrau hành chính, palagaih  ka doanh nghiệp, doanh nhân dalam saong langiu taneh ia gam cak rok patagok khang kajap. 

9 bilan tapa, abih tih pandap pablei rai di TP.HCM hu 446 rabau tỷ đồng, tagok jang 21% duk haong tukvak ini thun bloh. Piah pabak ginup pandap pandar dalam tuk Tết thun sak tapai, Sở Công thương TP.HCM daok pataom tame peih ngak danak dak tani tanat darak pasar. Pandap pandar yaok harei di danak dak hu meblah meng 25%-43%, yaom lap jang yaom darak pasar meng 10%. Sở Công thương jeng pambuak haong dom doanh nghiệp piah ba pandap di doanh nghiệp, labik ngak, abih di nyu lac pandap OCOP tagok labik pablei online.

Jit aih traoh pabui châu Phi bahrau tamuh veik di rilo xã di huyện Cầu Kè, tỉnh Trà Vinh, ngak ka 142 drei pabui njauk am cuh klaak. Meng di tuk hu mboh, Sở Ngak nong saong patagok palei pala tỉnh hu pato tacei Chi cục raong glaong saong Thú y pambuak haong karja palei pataom tame padam jit, pruh jru pametai anek ruak. Dahlau di nan, thun 2020 jit aih traoh pabui châu Phi  ngak ka 86 ribau drei pabui njauk am cuh klaak, ngak khat lahik biak trak tal gah raong glang di Trà Vinh.

Hãng thông tấn negar Triều Tiên (KCNA) brei thau, taneh ia ini hu cuh iek 2 tên lửa jalan atah di harei 12/10. Tui KCNA, 2 tên lửa nan par mangaok bhum langik gah pai Triều Tiên saong taong njauk labik atah di nan 2.000 km. Bình Nhưỡng ndom lac, bruk cuh nan hu peih ngak piah paglaong jang "siam lagaih saong prein khang mesruh metak" di dom tên lửa hu ba tabiak di dom labik hạt nhân chiến thuật.

Rajaei Thái Lan hu caga kadung jien kanja daong ka urang njauk bala ia ndik ia sua, tuk camriep kuhria mboh lac 23 tỷ baht, hu mek meng kadung jien kanja pakat negar ka thun jien padai 2023... Thủ tướng Thái Lan khan lac, Rajaei jeng halan hatain ieu pataom kadung jien dom gah karei mayah caong hu. Rilo labik di bhum Đông Bắc Thái Lan daok gaok ia dauk biak trak damak dui atah dalam labaih 1 bilan tapa. Taeng di tỉnh Ubon Ratchathani, khat lahik kinh te kayua ia ndik ia sua tagok tal labaih 5 tỷ baht (samu 131 triệu USD).

Harei 12/10, sa sruh radaih buýt pajeng dom urang nao plaih di ia sua mai veik sang ye nyu khuah di gah meraong Pakistan, ngak brei takik di abih 17 urang metai.  Urak ini oh ka thau cambaih makna ngak brei radaih  buýt nyu khuah. Min, cảnh sát brei thau, pui nyu tabiak meng gah iku radaih. Bala jalan radaih bhian rah tabiak di Pakistan, kayua dom radaih oh siam, jalan khut, mbaih mbaoh, saong urang peih radaih oh ngak catang tui dom bruk salamat jalan mbak./.

Urang lang: Thu Thao & M. Phuong – 13/10