Brei pasang iek jit  ruak dalam tuk tết nguyên đán bruk tame tabiak di menuac urang 

Thủ tướng Rajaei bahrau hu harak payua Ủy ban salamat jalan mbak negar, dom mintri, dom gah, dom tỉnh, ban peih ngak dom jalan khik kajap siam mekre, salamat bruk nao mai angaok jalan saong pasang iek siam jit dịch COVID-19 tuk Tết Dương lịch, Tết Nguyên đán thun sak ramaong 2022. Harak nan hu labik vak lac, thun 2021, meng kham merat di abih gah, saong bruk pachreih tui di bhap bini, taneh ia drei daok pasang iek hu saong jhul kadun likuk jit COVID-19; gam haong nan, dom bruk ngak mbang, kinh tế, xã hội jeng daok hu pasiam veik saong cakrok veik, bruk pajeng ba tuai damuai, pandap panda saong dom radaih nao mai angaok jalan jeng dak harei dak rilo jang dalam tuk siam mekre bahrau. Thủ tướng ieu Ủy ban salamat jalan mbak negar, dom mintri, dom gah, dom kapul nyaom chính trị - xã hội saong UBND tỉnh, ban pataom tame pathau khan, brei thau adat hukum, tacei pato ilamu khik caga siam mekre, salamat bruk nao mai angaok jalan saong pacang caga jit COVID-19 tuk nao mai angaok jalan ka bol bhap rahra. 

Jaik di ini, dom urang nao tal sang iek ruak hadei di tuk eng drei dut iek samar mboh lac dương tính min oh khan brei gah y tế di pak nan thau; bruk ini meda ngak brei njom mbak ka rilo manuac abih di nyu nan lac dom labik y tế, ngak kan kandah tal bruk pacang caga jit. Mintri Y tế hu harak ieu kakei Sở Y tế dom tinh, bal pambuak gauk paglaong bruk pathau khan, pato tacei bhap bini, jabat, kapul di labik ngak njauk dom bruk pacang caga jit, abih di nyu nan lac ngan haong bruk eng dreii dut iek, daong duah thau aval dom urang medil lac ruak, samar drah pacang veik sruh jit saong padam jit, patrun patakik bruk njom mbak ruak ka rahra.

TS.BS Trần Quang Hiền – Yam ndok Sở Y tế tỉnh An Giang khan lac, dom menuac metai kayua jit COVID-19 di An Giang tagok samar, hu menring makna lac kayua bak menuac ruak di dom labik taong ruak tal 3. Sang iek ruak Đa khoa Pasak tỉnh An Giang tok hu 50 papan ndih di tal 3 (lac tal taong ruak ka urang ruak COVID-19 trak, min daok taong ruak ka labaih 140 urang ruak. Tal urak ini, An Giang hu 27.466 urang njaom COVID-19, dalam nan hu 619 urang metai. 

Meng harei ini 14/12, tỉnh Bạc Liêu brei patagok pakat jit COVID-19 di dalam tinh tagok pakat 3 – lac pakat mbuan njom glaong (bhum katam) saong brei brei ngak catang dom bruk ngak dalam tuk jit ruak COVID-19 daok rahtabiak sarau kadhau, dom urang njom dalam rahra tagok rilo dalam rilo harei. Bruk njauk caik hatai nan lac, dalam bruk ngak di anak meta, tỉnh Bạc Liêu ieu kakei urang jakar, công chức, viên chức, urang ngak bruk di dom jabat Đảng, Kanja, dom urang bol par phao kraong dalam tỉnh oh brei nao tal dom labik pataom rilo manuac tapa 10 urang, langiu di jabat ngak bruk, labik rahtabiak dom bruk di kanja. Oh hu mbaok tame harei pataom manuac, langiu di ndam metai, ndam lakhah dalam sang drei, dalam nan kham marat rami ramik oh ngak ndam lakhah dalam tukvak ini.

Yaok rabau rahra Đắk Lắk mai palei plaih jit, daok caong nao ngak bruk veik di dom tỉnh gah Meraong. UBND tỉnh Đắk Lắk hu tacei pato dom puk palei samar padang sarak daong urang ngak. Abih di nyu lac, urang pan akaok tỉnh hu brei padang kapul ngak bruk nao tapak tal TP. Hồ Chí Minh, Đồng Nai, Bình Dương pasang iek, taom gaok tapak dom doanh nghiệp piah duah jalan daong ka urang ngak. Tui nan, tal tukvak ini, 3 tỉnh ban nan daok caong pilih ruah jaik 140.000 urang ngak. Anak meta, piah daong ka urang ngak samar tame veik dom tỉnh gah meraong ngak bruk, tỉnh Đắk Lắk daok kham merat klauk ginup 2 mbang vắc xin pacang caga jit ruak Covid-19 ka urang ngak. Hadei di nan brei peih giao dịch bruk ngak piah ka urang ngak pambuak bruk haong doanh nghiệp.

Biến thể Omicron meda njom mbak tabiak grauk labik di châu Âu aval jang tui kuhria saong salih ka biến thể Delta dalam dom adit akaok thun  2022. Ni jeng lac panuac khan brei thau di dom urang ilamo France saong huac kanda lac biến thể Omicron meda tamuh tabiak mbang Covid-19 ka 6 di France tuk mbang tamuh ka 5 ka oh abih. France tal urak ini hu 59 urang njom biến thể Omicron. Yaom lac ka oh hu panuac halei taong yaom cambaih laih ka jalan njom mbak di biến thể Omicron min dom urang ilamo y tế jeng njauk gauk lac, biến thể ni hu prein njom mbak biak glaong. Hội đồng ilamo France harei kabroi hu kakei lac tagok jang 2 mbang ia jru vaccine mbang klauk ka 3 ngan haong vắc-xin Moderna (meng 50mg tagok 100mg) piah paglaong prein pacang caga haong biến chủng ni. Frace jeng daok jhul samar danak dak klauk jru vắc-xin mbang ka 3.               

Na Uy brei ngak catang jang dalam adit ini piah pacang cakak bruk pambak praong di jit praong Covid-19. Ini lac panuac di Thủ tướng Na Uy  Jonas Gahr Stoere anak dom urang ngak gah báo chí di harei kabroi. Tui Thủ tướng Na Uy, jit ruak di Na Uy daok daok di tanut glaong, bruk njaom bak jeng glaong saong piah patrun bruk njaom mbak, Na Uy brei ngak catang bruk pasang iek jit.  Dalam sa kadha pambuak tal bruk nan, Thủ tướng Anh Boris Johnson harei 13/12 brei thau, takik abih 1 urang ruak di negar Anh metai hadei di tuk njaom biến thể Omicron.

Kuhria tal bier harei kabroi (tui maong pak nan), dom urang metai dalam mbang hangin ribuk khang ngak tayah dom bang gah maraong saong gah krieh negar di Mỹ tagok tal 88 urang. Kentucky lac bang njauk trak damak abih, dom urang metai di bang nii kayua hangin ribuk khang lac 74 urang. Bruk pasang iek saong daong duah jeng daok peih ngak piah daong dom urang daok diuk dalam tuk ngak pasiam viek dom hệ thống điện saong daong bhap bini mai labik daok plaih, brei mbang manyum saong dom pandap panda pandar yaok harei karei./.

Urang lang : Thu Thảo -Mousaphuong -14/12