Di Mbang nyaom ka 20 di Mban tacei ba pakat Negar ka bruk pacang caga taong chap ikan suan hukum, oh khan brei thau saong oh ngak tui hukum IUU, ginum online haong 21 tinh, ban tapen tathik peih ngak di melam harei 4/11, Thủ tướng Phạm Minh Chính caong khin brei ngak njauk, oh ngak mengak, plaik njiak bruk, piah kham merat pacang caga bruk ngak suan IUU, lang talaih “ Pakat kanjik” IUU piah khik mbaok meta angan je di taneh ia, daong ka bruk cak rok patagok khang kajap. Thu tuong caong khin gilai ikan oh pagam mac VMS ngak catang oh brei tame tabiak tathik.

Mbang ribuk ia sua praong oh ka bhian mboh di bhum kreh Negar dalam dom harei tapa ngak khat lahik rilo di anek manuac saong drap ar. Dalam nan, Huế, Đà Nẵng lac dom bhum palei gaok rilo kan kandah abih. Kuhria tal melam 4.11, hu 53 urang metai saong lahik. Piah ramik pasiam hadei ribuk ia sua, Mentri Quoc phong brei ba labaih 16.600 mbang urang jakar, 317 mbang radaih pajeng ba ndap nda daong ka dom tinh bhum kreh negar.

900 hecta taneh ngak nong - ralo lac bhum pala bingu mai kanyik katam di xã Bình Lợi, huyện Bình Chánh ( klak), TP.HCM daok ngak khat lahik trak kayua ia ndik tagok glong gam haong hajan ia praong saong bruk tathuak ia meng binek Dầu Tiếng. Bhap bini rahra  pataom tame njuk pruh ia  gam gam piah klak ia duak, khik caga ka phun pala. Njauk ndem tal bruk haduh hatai urak ini lac labaih 540 ha mai kanjik katam daok dauk dalam ia suai lavik, mbuan druh hala, bruk gha metai, meyah oh tathuak ia samar, ngak jhak tal bruk ngak mbang saong bingu mai piah pablei tuk Tet thun birau 2026.

Mbang ia ndik meng blaoh di tinh Vinh Long ngak khat lahik kuhria abih tih labaih 3.000 hecta padai, phun mbang baoh, njam patam. Ia ndik ngak jaik 59 ribau met ar pacang ia sre tapa, 77 labik glut jaleih, talah ar  labaih 4.700 met. Mbang ia ndik ngak dauk 7,3 km jalan raya saong 30 km jalan mbak nao mai. Kuhria mboh jiak 8 ti dong. Urak ini, ia ndik daok tagok glong veik, dom gah dom pakat tinh Vinh Long daok peih ngak rilo jalan pacang caga khat lahik. 

Balai bien phong pabah negar dunya Hoa Lư, Bol lin bien phong tinh Dong Nai peih bruk taduan 65 urang Viet Nam mai meng negar Campuchia. Dalam nan hu 64 urang nduac dauk tabiak truh di sa labik pachot pagat online di tinh Banteay Meanchey saong 1 bhap bini chap mek kayua tame negar suan hukum. 65 urang mai meng 24 tinh, ban, dalam nan rilo abih lac TPHCM hu 9 urang, Hà Nội 6 urang…Dom urang ini gaok pachot pagat ba tapa Campuchia ngak bruk “ bruk njol, jien bilan glong”, min tuk tapa Campuchia urang pan huai dien saong phao ba tame kong ty ngak bruk pachot pagat online.

Canh sat khik iek bruk tame tabiak negar Thái Lan chap mek hu labaih 1.600 urang negar langiu nduac dauk tabiak truh pasak pagat bleik KK Park di ban sit Myawaddy (Myanmar). Dahlau di nan, bol lin Myanmar glam ( prak) mbom tame dom sang glong rilo tal di pasak KK Park dalam 9 harei. Labik khut tayak nan daok atah labik tapen negar Thái Lan labaih 500m. Dom urang negar langiu nduac dauk suan hukum di dom balai canh sat dalam tinh Tak. Dalam jaik 1.600 urang chap mek hu 265 urang kumei, dom urang nan nao tal 28 taneh ia.

Tong thong Han Quoc khan lac bruk ngak kinh te taneh ia ini yam tapa “ tukvak kan kandah jien padai” hadei rilo bilan kuhria caga bruk oh lagaih gah chinh tri saong kinh te tui nan brei mboh dom bruk khat lahik kayua chinh tri oh karo saong bruk ngak mbang pablei salih di doanh nghiep dak harei dak hu khik iek tani tanat. Han Quoc nan lac taneh ia ngak mbang praong ka 4 di chau A - brei mboh bruk patagok dalam quy III  mai meng bruk pablei kaya tabiak negar langiu hu tani tanat oh lac dom bruk kan daman kayua jien je di My ba tabiak.

Sa bruk roh duah birau  brei mboh, dalam 2 bilan 11 saong 12 thun 2020 kraong ia khan patau Hektoria di Gah Meraong Baoh taneh ralai lahik labaih 8km- nan lac biak samar abih hu mboh dalam sajarah dakrai jaman ini. Bhian di nyu, dom kraong ia khan patau “ daok di ala tathik” yau Hektoria salih labik dua klau rituh met yaok thun. Dom urang roh duah  kakei dahlau meyah dom kraong ia khan praong ralai samar yau nan, meda bala rah tabiak  biak trak ngan hoang mbaok ia tathik, kayua Gah Meraong Baoh taneh padang khik ia ngak ia tathik di dunya tagok tal 58m./.