Boh sang anit ranam ka urang dahlau deih ngak bol lin

Di var tòa sơ thẩm langyah Thứ trưởng Mentri Y tế dahlau diah lac Trương Quốc Cường saong 13 urang dalam vụ án “ Pablei salih jru taong ruak ja; Kurang sahaneng dalam bruk ngak ba tal khat lahik trak; Pambak tame bruk ngak praong di drei dalam tuk ngak, rah tabiak di Ban raya HCM, dom tỉnh, ban karei saong Cục Khik iek Jru tavao di Mentri Y tế”, Tòa án bhap bini ban Hà Nội daok tangin sua. Jaik abih dom urang hu dius di Công ty VN Pharma saong C.ty TNHH pablei salih Hàng hải Dunya H&C ndem oh njauk, plaik duis. Tui cáo trạng, dom urang nan ngak ja hợp đồng saong phụ lục hợp đồng blei pablei, tagok yaom jru, ngak ja chứng từ salih labik ngak tabiak jru, ngak veik lagaih chứng từ bayar jien piah blei tame negar 838.100 pa-op jru ja, dalam nan pablei jaik 624.000 hộp, mbang jien labaih 31,5 tỷ đồng.

Thun 2022, Kapul urang dahlau deih ngak bol lin dom quận dalam TPHCM tut angan padang ngak bahrau song pasiam veik labaih 200 boh sang anit ranam ka urang dahlau deih ngak bol lin ngan song yaom jien abih tih labaih 6 tỷ đồng. Kapul urang dahlau deih ngak bol lin quận 1 dok hu tut angan padang ngak sang mbang huak alin brei ka sang bac Tiểu học Nguyễn Văn Cội, huyện Củ Chi, ngan song yaom jien labaih 700 triệu đồng.

Yaom xăng menyek tagok gam gam tukvak tapa, urak ini yaom pablei rai xăng RON 95 tagok jaik 30.000 đồng/lít ngak kan kandah tal rilo gah pablei salih, kan kandah oh lac takik tal raidiuk bhap bini. Yaom lac kan kandah kayua yaom xăng tagok glong, dom labik pablei rai pandap pandar daok having akaok, peih ngak rilo jalan piah kham pacang saong khik yaom tani tanat piah urang blei pandap ngan yaom biar abih. Lambaok dom labik pablei xăng mboh lac, meda oh hu rah tabiak bruk tagok yaom srau kadau

Yaom lac hu taduan khoán taneh glai piah pala, iek glang song khik ramik glai min dom boh sang di xã Ninh Loan (huyện Đức Trọng, Lâm Đồng) daok lih mek , jah tak glai piah pabak ka bruk di drei. Bruk ngak ni hu urang jakar mboh, hu ngak harak biên bản langyah, min tal urak ni jeng dok rah tabiak, ngak duh hatai dalam bhap bini rahra song ngak ka urang mboh medil ka bruk siam lagaih di sarak jao khoán khik ramik glai di pak ni .

Piah langyah “labik nerak trak” rah tui tasik Đầm Nại, dalam dua harei 11 saong 12 bilan 5, UB bhap bini huyen Ninh Hải, tỉnh Ninh Thuan hu ieu pataom 120 urang di dom gah dalam palei pambuak haong urang ngak di gah pataom mek saong pajeng ba hareik gam haong bhap bini peih bruk puh ramik, pataom mek jaik 130 m³ hareik di ar pacang, srong hareik di tasik ba tame sang mac xử lý. Ong Nguyễn Khắc Đông, Phó Akok UB bhap bini huyện Ninh Hải brei thau, sa dalam dom jalan langah bo karja palei peih ngak piah pacang nerak gilac nan lac patagok parilo mbang pataom mek hareik, pambuak haong jak ba rahra paglong jalan sahaneng khik ramik alam moi truong vil val nan.

Meng harei som 16/5, urang Prang oh daok njauk pacap cuk pataih pacang mbaok tuk nao mai angaok dom radaih công cộng yau radaih điện, radaih buýt, radaih pasei, kapan haoh atau taxi. Ni lac sa dalam dom bruk puac di abih hu rajaei Prang khik veik piah pacang jit Covid-19. Dahlau di nan, meng di akaok bilan 3/2022, Prang brei klaak rilo dom bruk pacang caga covid-19, dalam nan hu gam bruk ngak prong lac pasang iek thẻ vắc-xin atau harak passport y tế.

Dom urang ilamu di Australia daok hu mbaok tame sa danak dak ngak tabiak vaccine pacang Covid-19 hu raong pagam di phun tamuh di taneh ia ini. Janih vaccine hu di gah langiu nan hu brei adat pandar di Canada saong meda lac bruk palih ruah siam lagaih piah pacang caga jit ruak praong Covid-19 mbiah tal ini ngak brei metai labaih 6 trieu manuac.

Bồ Đào Nha bahrau tabiak mbaok mblang bein năng lượng ia harei ndaong prong abih di châu Âu ngan song 12.000 blah pin ia harei praong nde 4 mblang chaoh blong ndaong angaok danao Alqueva. Danak dak lac sa binah dalam jalan ngak di Bồ Đào Nha piah cakak trun bruk pagam pambak tame nhiên liệu hóa thạch blei meng negar langiu. Dom blah pin angaok danao Alqueva hu ngak tabiak 7,5 gigawatt dalam sa tuk điện yaok thun, pabak ginup điện pandar ka 1.500 boh sang./.

Urang lang: Hani Pha – Bhumi – 14/05