Dalam thun bac bahrau ini, gah pato megru hu peih ngak Sarak ka 238 di Rajaei ka bruk ngak sarak jien bac, oh mek jien, brei patrun jien, daong jien bac, yaom jitvu dalam gah pato megru. Dalam nan, yaom jien bac meng thun bac meng ini nao ngan haong labik pato megru mam non, pato megru pho thong pakat negar oh ka ta-eng khik kajap jien buh tabiak yau ini: mam non saong tieu hoc labaih 50.000-540.000 dong sa bilan; trung hoc pho thong labaih 100.000-650.000 dong sa bilan. Gam haong nan sang bac daok hu rilo sarak jien pachreih bac lagaih piah pok meyaom, pachreih saong daong prein, klah rabha haong urang bac.

Tinh Gia Lai daok peih ngak 16.600 baoh sang daok ka rahra. Danak dak padang sang daok ka rahra di tinh Gia Lai hu ngak meng thun 2021. Dalam 20 danak dak hu mbaoh harak, hu 6 danak dak hu ngak salah blaoh, 3 danak dak hu ngak blaoh meneing, pabak jaik 4.500 baoh sang. 10 danak dak karei daok ngak saong jaik padang ngak, pabak labaih 7.600 baoh sang. Urak ini, tinh daok pataom tame peih ngak dom danak dak, kham merat ngak salah 16.600 baoh sang tui bruk ba tabiak.

UB Bhap bini Ca Mau mbaoh tangin pambuak bruk haong Kongti De Heus saong dom gah pambuak bruk piah peih praong bruk raong hadang payeng hu praong prang. Bruk ini oh ba mai siam lagaih kinh te glaong bo daok lac jalan langyah ka alam langik labik daok, ngan haong ia tathuak hadei langyah njauk lagaih, njauk haong bruk patagok raong kaya dalam ia tui jalan cakrok patagok hijao saong kinh te payeng. Urang dang akaok UB Bhap bini tinh Ca Mau, brei mboh bruk peih praong bruk ngak di tukvak 2 tabiak 1.500 ha brei mboh bruk dang akaok di Ca Mau dalam gah raong hadang.

Bo tu lenh Vùng 5 Hai quan birau iek ruak, tacei pato khik rup pabhap saong alin brei jru ka dom urang mbang tui sarak, urang ngak bruk katmang di xa Năm Căn, tinh Cà Mau. Dalam nan kapol urang bollin hu alin brei jru taong ruak oh mek jien ka labaih 300 mikva, ralo bhap bini ruak jalan hatung pruac, tim mach, talang, ruak di kalik…Gam tacei pato mikva khik ramik hacih sa-at, dom jalan pacang caga ruak la-ar dom, ruak pandiak tabiak drah. Bruk ni rik tame khik siam prein yawa ka bhap bini, jum pataom anit ranam di bol lin saong rahra.    

Raya adat Ok Om Bok bangsa Khmer thun 2025 brei rah tabiak meng harei 30/10 – 5/11. Dalam adit brei rah tabiak dom danak dak yau: Labik ngak kaya mbang bhap bini gah Meraong negar; Pataom darak Jhul samar drah pablei salih-ndpa nda kaya ngak kong palei pala saong ndap nda OCOP; Raya kacah me-in ragam ragu bhap bini saong tamia bhap bini Khmer mbang ka I; Malam Adat raya Ok Om Bok… Adit Ilamo, Pahat padhih saong Rah rivang salam uan Raya Adat Ok Om Bok daong khik ramik, patagok, khik ramik drap ar ilamo oh mboh di meta pakat negar lac Raya Adat Ok Om Bok di bangsa Khmer.

Canh sat Lien bang Australia daok pasang duah labaih 1 trieu tep tin dien tu mek hu di sa urang njauk ndem puac bruk rambeih rambai uranaih. Urak ini dom urang pasang iek daok langyah tano tanat dom harak gal tai lieu ini. Birau ini, di Australia rah tabiak dom bruk rambeih rambai uranaih ngak manuac sia haduh hatai. Akok bilan 7, So Y te bang Victoria brei dut iek dom ruak njom mbak tapa jalan likei kumei ka 1.200 uranaih yau sa dalam dom bruk pasang iek ka rambeih rambai sahaneng lac kayua urang iek glang uranaih di bang ini ngak bruk nan.

Bol lin Nepal hu dui atah dom veik dom bruk pakauk saong ngak catang veik sa harei dalam bruk an ninh jeng rah tabiak srau kadau. Dalam tuk nan, dom urang pan akaok mbang trun jalan di “Rairah Z” brei mboh lac brei peih bruk pilih ruah dalam negar dalam 6 bilan anak tal. Dom urang pan akaok bruk ini jeng ndom catang ka bruk di dom urang nan trun jalan di grauk dalam negar piah salih hukum ka njauk lagaih piah pacang cakak bruk tham nhung, kayua nyu daok rah tabiak rilo.

Di sa bhum palei sron mbon salamat di Ban  Isumi di negar Nhật Bản, hu sa kuan caphe angan “ Hamu takai kanyal” di muk Nakajima Deco. Labik ini, dom kaya hu pandar veik abih, ngak jeng sa gavang vin: kaya mbang labaih piah ngak khak buh ka phun atau raong athur, kalaok chai hu pandar veik, ia hajan hu pandar dalam raidiuk yaok harei. Dalam ging, salih bruk pandar ba-ar atau patau tasik, ye kuan pandar tanyak khan bai klaik sit atau siuk klak piah uak, piah patak pataom gam takik pandar jru rao. Kuan cafe di muk Nakajima Deco daok hu pambak praong dalam bhap bini./.