Thun bac 2026 - 2027, Jabat bac megru Bangsa hu ba tame ngak bruk di labik bahrau, palei Chi Đông 2, xa Quang Minh, Ban ine Ha Noi saong raok thun bac Dai hoc mbang ka 6. Tien sy Bùi Tôn Hiến, Yam ndok Jabat Bac megru Bangsa brei thau: Thun ini, dalam gah pato megru saong bruk bangsa dang anak rilo bruk pakacah praong. Taphia bruk pato pakai ka ilamo, sang bac tuk halei jeng brei kein lagaih piah sinh vien patagok taong abih tapa dom nyaom biai ka bruk peih mbang ngui, ngak bruk tapak, danak dak halan tian bhap bini gam majam kalup kapul pahat padhih, ilamo – adaoh tamia…

Bingun pahadar Harei negar 2/9 meng blaoh, Gilang khik piah drap ar Pleiku, tỉnh Gia Lai peih pabah mbang taduan raok tuai tame rivang iek jaik 400 kaya kan lan am saong dom caik jek pandar dalam rai diuk bhap bini urang bangsa takik di Tay Nguyen. Rilo kaya ini hu pandar mbang akaok meti hu parang tabiak ka urang mong iek, tapa nan brei mboh bruk ngak saong makna di jek, caik saong kaya lan am dalam raidiuk bhap bini Ba Na, Gia Rai. Njauk ndem tal, dom jek caik  meng kan hu brei mboh bruk pablei salih, bac megru ilimo saong prein diukrai dalam raidiuk bhap bini dom bangsa Tay Nguyen.

Trung ta Nguyễn Văn Long, Akaok kapul K76, Ban raya Dong Nai brei thau, labik bahrau duah mboh veik 4 atau talang bol lin di taneh kao su di labik mblang kapal ahaok par Lộc Ninh klak. Dahlau nan, kapul chuc nang hu duah mboh 2 atau talang di labik ini, parilo taong abih atau talang bol lin pataom hu di labik mblang kapal ahaok par tagok 6 atau talang. Taphia atau talang bol lin daok hu dom kacing ao, kalik juak kao su. Mblang kapal ahaok par Lộc Ninh meng kal lac labik mesuh metak kayua My saong karja Sai Gon padang meng thun 1965.

Tinh Vinh Long brei ramik veik tui yaok gah, dalam nan hu pala patagok tui jalan pataom, praong, pambuak pagam haong kein lagaih, padang angan je saong duah thau hu meng halei mai. Ngan haong dom kaya kan praong, Vĩnh Long pataom tame pagong asar siam, kein lagaih soang prein meriak di padai brah, phun mbang baoh, phun njam patam, phun pajaih - bingu ngak mekre, la-u, raong glang saong kaya ia. Njauk ndem tal, iek praong bruk patagok bhum pala, ma taka so bhum pala hacih sa-at...

Kuhria ka bruk njom ia mbak bilan thu thun ini di Ban raya Can Tho rah tabiak srau kadau. El Nino patui veik rah tabiak saong glaong tagok, meda ba tal pandiak catang di puac thun 2026 saong akaok thun 2027. Dom bruk di langik meda rah tabiak pandiak khang catang, kurang ia hajan, bilan hajan abih avak drah saong dom harei pandiak tagok rilo. Gam haong nan, kuhria ban raya Can Tho brei hu meng 4 tal 5 mbang ia ndik mbuan njauk ia dauk dalam saong kan kandah tal rilo labik.

Mbang palih ruah di kreh thun 2026 di Mỹ harei kabroi hu peih ngak tuk bang Bắc Carolina payua phieu palih ruah tui harak thư ka cư tri. Ini lac bruk ngak camereip dalam bruk palih ruah peih ngak dalam negar Mỹ saong tamat di harei 3/11, pasak di bruk ini pakacah gaiy di Quoc hoi, jeng yau dom bruk palih ruah pakat bang saong bhum palei. Mbang palih ruah nan brei ba tabiak bruk ngak sumu gauk di Quoc hoi dalam meteh vkatu di Tong thong Donald Trump.

Dom negar Arab saong Islam hu ndom khang ka dom panuac ndom meyai di dom urang jakar Israel ka bruk patiaok dom urang Palestine tabiak truh di Gaza. Panuac ndom nan brei thau lac, dom panuac ndom brei mboh bruk pacuh yau nan ngak suan dom adat di hukum dunya, dalam nan hu hukum halan tian dunya, ngak tabiak bruk kan kandah tapak tal dom quyen njauk hukum oh hagait ngak kanjah jhak hu di menuac urang Palestine.

Sa amuk di Nepal patuah jamo hu bol lin daong hadei 10 harei gar tavak gluh lam kateik. Dahlau di nan, baoh sang huac kanda amuk metai blaoh nan ngak padhi. Labik ini ia ba theik tapa, gluh baok kandong veik kapal saong khang yau betong. Rilo atau urang daok hu bol lin duah saong ba tabiak truh pambuk kayau patau jaleih kateik./.