“Pok meyaom urang brei darah” thun 2022

Brei panuac tacei pato di Nyaom biai pakat negar pataom iek veik 10 thun peih bruk pacang caga tham nhũng tiêu cực tukvak 2012 -2022, hu peih tabiak di Hà Nội, Tổng Bí thư Nguyễn Phú Trọng ndom lac, bruk duah mboh saong langyah dom bruk tham nhũng dalam tukvak tapa hu peih ngak biak siam, gam gam, biak catang saong siam lagaih, ngak brei salih bharau khang dalam bruk pacang caga tham nhũng, brei mboh hatai kham marat biak glaong di Đảng, Kanja saong bhap bini drei dalam bruk mesuh pacang tham nhũng ngan haong hatai lac oh hu bhum pakauk, oh hu ngoại lệ, oh kuhria urang nan lac urang halei saong oh njauk ngak tui panuac tacei di urang halei”. Tổng Bí thư tacei lac, mban tacei jalan Trung ương, dom mban pato tacei jalan pakat tỉnh saong dom jabat kanja brei jhul khang, paglaong jang kein laba bruk pato magru, pathau khan, dak padang ilamo patak pataom, oh tham nhũng, tiêu cực dalam urang jakar, urang đảng saong bhap bini.

Mesup ini, Thường trực mBan tacei jalan jak ba halan hatian brei darah ban  Cần Thơ pambuak haong mBan peih bruk “Hành trình Đỏ” pakat negar saong Thành đoàn Cần Thơ peih bruk pachreih tui Hành trình đỏ hu angan ieu lac “Bhong meriak Tây Đô” saong “Pok meyaom urang brei darah” thun 2022. Dalam bilan 6, mBan tacei jalan jak ba halan hatian brei darah dom pakat di Cần Thơ taduan hu labaih 2.000 đơn vị darah, ta-eng harei pataom “Bhaong meriah Tây Đô” harei ini, meda taduan hu 500 đơn vị darah, ginup darah piah cấp cứu saong taong ruak. Tapa nan, TP Cần Thơ jeng hu pok meyaom 64 urang saong baoh sang hu rilo mbang halan hatian brei darah.

Tỉnh Sóc Trăng daok kham merat jhul samar bruk klauk vaccine Covid-19, abih di nyu nan lac mbang klauk ka3, ka 4 piah khik caga prein yava bhap bini. Akaok UBND tỉnh Sóc Trăng ndom lac, dom puk palei, dom jabat, mayah oh pasang iek ginup dom menuac njauk klauk, caik rahtabiak jit ruak Covid-19 di puk palei atau caik ka vaccine abih tukvak bo bhap bini ka oh hu klauk ye akaok UBND dom huyện, ban sit njauk taduan abih trách nhiệm. Di Sóc Trăng urak ini rahra umo meng 18 thun tagok hu klauk mbang ka 3 bahrau  hu labaih 34%, mbang ka 4 jeng bahrau hu 17%.

Piah caga pacang rabuk ka 1 (CHA BA) daok hu mboh di labik Bắc Biển Đông, tỉnh Tiền Giang daok kham merat ieu kapal gilai angaok tasik tame duah labik plaih siam mekre, salamat. Tal urak ini, hu jaik 960 kapal gilai tame gah atau tame labik plaih siam mekre gam haong 7.000 urang nao kapal gilai. Urak ini Chi cục Thủy sản haong Bộ Chỉ huy Bộ đội Biên phòng bhian ieu phone taom gaok dom po kapal saong dom gilai daok angaok tasik piah thau labik saong jalan nao di rabuk piah plaih, njaik.

Tỉnh An Giang bahrau patabiak bruk samar drah ka bala langik tasik ngan haong labik glut jaleih takai kraong Hậu, labik nao tapa ban sit Vĩnh Thạnh Trung, huyện Châu Phú. Dua labik glut jaleih atah di jalan roya 91 meng 2 tal 30m, atah abih tih labaih 800m, di pak ini hu dom labik ngak mbang, pablei salih saong labaih 100 baoh sang njauk samar ba nao tal labik salamat. Meng thun 2010 tal bilan 3/2022, tapen kraong Hậu labik nao tapa ban sit Vĩnh Thạnh Trung, hu 6 bruk ghut jaleih, ngak ka yaok piluh sang bhap bini njauk panduan ba nao tal labik karei samar drah.

Ông Ferdinand Marcos Jr harei ini tagok ngak Tổng thống ka 17 di Philippines vaktu 2022-2028. Dalam harak ndom puac tuk tagok pan bruk, Tổng thống Philippines sanya salih bharau pato pakai, cơ sở hạ tầng, khik iek chất thải saong năng lượng, daong ginup abih ka yaok triệu urang ngak Philippines daok di negar langiu. Tổng thống jeng sanya ba taneh ia yam tagok atah jang meng dom sarak di drei, ba mai kein laba ka taong abih hap bini.

Tổng thống Ecuador hu ba tabiak bruk samar drah di 4 tỉnh di gah timur taneh ia ini piah pacang caga haong bruk tamuh tabiak mbang trun jalan kayua Tổng Liên đoàn dom bangsa thổ dân Ecuador ba tabiak meng labaih 2 adit tapa. Tui sarak, bruk samar drah hu ba tabiak piah khik tani tanat salamat ka rahra, ngak pasiam veik trật tự xã hội, pasang iek bruk taong paoh, khik tani tanat bruk pabak jru tavao, oxy y tế ka dom sang iek ruak, jang yau xang manjek saong pandap mbang ka bhap bini.

Khí gas par tabiak meda lac makna ngak brei 21 urang metai dalam 1  quán alak di takai tasik gah pai Nam Phi di puac adit bloh. Tui duah thau tuk camereip, jaik abih dom urang metai nan jeng lac urang daok ranaih umo metai dalam quán alak, 4 urang karei metai di sang iek ruak. Dom urang điều tra tah klaak makna ba tal metai lac juak kateik mangaok gauk kayua angaok rup dom menuac metai nan, oh mboh njauk hagait./.

Urang lang: Thu Thao & M. Phuong – 30/06