Muk Nguyễn Thu Tư, Yam ndoc Sở Bangsa saong Agama tỉnh Cà Mau khan lac, bhum urang bangsa takik di tinh hu 20 xa bhum kan kandah; hu 43 puk palei biak kathaot daok langiu dom xã ini saong 68 puk palei hu rilo urang bangsa takik birau hu mbaoh tangin brei pabak. Bruk pagam don vi karja pakat tinh tame saong peih ngak karja palei dua pakat meda daong katut veik tukvak ngak bruk saong peih ngak sarak; abih di nyu nan lac bhum urang bangsa yakik saong bhum hu rilo urang agama hu samar jang dalam bruk ngak.  

Di mbang nyaom ka 2 HĐND tinh An Giang mbang X peih tabiak di page ini 29/7, Mban Hukum HĐND tinh An Giang khan lac, hu payua jabat pasang iek 5 bruk jhak, tham nhung, palai jien padai piah duah thau ngak brei cambaic laic kuhria abih tih lac labaih 109 ti dong. Mban Hukum karja caong khin UBND tinh An Giang ngak brei cambaic laic bruk mbang jien padai piah hu jalan pacang caga siam dalam tukvak anak tal. Tui nan jhul pakhang bruk dakwak ar khan, padang ngak bruk ngak karja hacih sa-at, khang kajap.

Sa mbang hajan praong dui atah gam hangin khang tuh tame palei Kinh Ngang, xã Long Phú, Ban Cần Thơ ngak khut tayak 7 baoh sang di bhap bini, dalam nan hu 4 baoh sang par tabung saong 3 baoh sang glut jaleih abih. Biak patuah jamo, oh hu thei njauk hagait. Ban Can Tho hu jao jien daong meng Kadung Jien pacang caga bala meng langik tasik hu 3 baoh sang glut jaleih abih, yaok sa baoh sang hu daong 40 trieu dong; 2 baoh sang par tabung trak, yaok baoh sang hu daong 20 trieu dong.

UBND phuong Tam Thắng, TP Hồ Chí Minh pambuak haong Kong an phuong, Pasak pasang iek bruk padang ngak Ba Ria - Vung Tau, Mban khik iek sang chung cu Lapen, jalan 30 bilan 4 pasang iek tal 15, 16 Block hadei tuk duah mboh rilo jalan ra-ai talah praong mbuan rah tabiak bala. Tal 16, hu jalan ra-ai atah labaih 6m, tabiak abik got 5cm. Abih tih, 18 baoh sang  di tal ini gaok kan kandah, ta-eng baoh sang 16-08 danieng sang talah praong, truh danieng. Urang daok dalam baoh sang ini hu panduan ba tabiak nao labik karei chip, taong abih dom labik hu pacang talei, oh brei mai jaik.

Pasak Kuhria mboh dahlau langik tasik Pakat negar khan lac, harei saong melam ini, bhum ceik glong Trung Bộ saong Nam Bo hu hajan saong hangin di dom labik, hu labik hajan praong meng 10 tal 30 mm, hu labik labaih 70mm, dalam tuk hajan hu hangin gaving, jakala, hanjan patau saong hangin khang. Kakei dahlau, harei saong melam di bhum tasik meng Gia Lai tak Ban raya HCM hu hangin Tay Nam catang pakat 6, khang pakat 7-8; riyak glong meng 2 tal 4m. Mbuan rah tabiak bala meng langik tasik kayua  hangin  khang di tasik pakat 2.

Urang jakar Mỹ Steve Witkoff harei kabroi 28/7 khan lac caong khin ndem biai hu siam mekre Nga saong Ukraine dahlau tukvak ngak bruk di Tong thong Donald Trump padeih. Panuac nan di urang brei panuac di Mỹ hu ba tabiak tuk Nga mesruh haong Ukraine oh ka ladam trun. Tong thong My Donald Trump khan lac brei katut veik tukvak 50 harei bo ong bhian ba tabiak ka Nga piah ngak tui bruk ginum biai padeih mesruh metak di Ukraine, tui nan khan lac ba tabiak tukvak birau dalam 10 harei anak tal.

Hy Lạp caong khin daong meng Jalan ngak brei khik caga bhap bini di Lien minh chau Au (EU) piah pacang caga apui khuah glai biak trak kayua langik pandiak thu lagu. Bruk ba tabiak paok jien daong nan dalam tuk Hy Lap daok dalam kan kandah haong rilo apui rah tabiak dalam negar. Tui bruk ba tabiak di Hy Lap, 6 sruh kapal haok daong apui khuah hu peih ngak samar daong padam apui khuah meng kapal ahaok, abih di nyu lac dom labik ceik glai, kan tame.

Gah Y te Dunya (WHO) birau khan brei thau, urang jakar di Gah ini ka bruk COVID-19 dalam tuk tamuh jit ruak thun 2020 - ong David Nabarro plang metai tuk umo 75 thun. Ong lac sa urang merat ngak biak ralo bruk praong ka prein yawa  saong sumu bruk y te, tui nan lac urang tacei pato hadah karah ka gah y te. Dahlau di nan, thun 2017, ong lac urang palih ruak pok ngak Tong Yam ndoc WHO saong dang dhi ka 2 dalam mbang buh phieu  hadei Tong Yam ndoc WHO daok ngak bruk./.