Tinh Dong Nai peih bruk brei buh tame jaik 400 tỷ đồng piah ramik pasiam, salah blaoh 36 sang bac di 8 xã  bhum taphia negar. Bruk kham merat lac ngak salah blaoh dalam 2 thun anak, pabak labik daok ka  jaik 1.300 anek saih dalam bhum. Piah ngak hu bruk nan, amuk Huỳnh Thị Hằng, Pho Bi thu Tinh uy, Akok UB MTTQ Viet Nam tinh Dong Nai hu jao brei So Pato megru pok panuac tagok UBND tinh padang ngak. Harak ar khan di kapol pasang iek brei ginup “ 6 cambaic laic”: urang cambaic laic, bruk cambaic laic, tham quyen cambaic laic, tukvak cambaic laic saong bruk ngak hu cambiac laic.

So Pato megru Ban Can Tho meda hu daong salih sang bac ka jaik 500 anek bik di urang jakar meng Hậu Giang,  Sóc Trăng mai Cần Thơ ngak bruk hadei pagam tinh, ban. Sở peih bruk yaok kuhria hu dom kamuan umo daok nao bac, piah jak ba  anek saih tame bac tuk tame thun bac birau jaik tal. Daok di tinh Dong Thap, tui jalan sahaneng “oh luai ka anek saih halei klaik klaoh bruk bac hadei tuk pagam tinh”, gah pato megru hu padang Hoi dong pasang iek piah taduan tame jaik 300 anek saih lac anek di urang jakar, kong chuc, vien chuc panduan nao ngak bruk meng Dong Thap (klak) tapa tinh Dong Thap (birau)

Peih nagk njauk tuk hukum agama, hukum karja, dom jalan ngak di Đảng, sarak di Karja, nan lac jalan ngak bruk patagok di bol bhap agama kito Jama-ah Plơi Ia Ba, xã taphia negar Ia Pnôn, tỉnh Gia Lai. Jama-ah Plơi Ia Ba hu 182 baoh sang, hu labaih 550 bhap bini lac urang bangsa takik Gia Rai. Mikva tui agama halan hatian rik daong sa harei ngak bruk saong kaoh taneh piah peih jalan nao mai dalam palei. Tui agama, mikva njauk hatai daong prein padang ngak 10 mblang caoh mbanh dat blong, hu labik me-in siam mekre ka dam dara, uranaih bangsa takik.

Tinh Tay Ninh birau mek hu tanut ka 4 trieu tuai damuai ndik kadai tuan tagok ceik Ba Đen kuhria meng akaok thun 2025, brei mboh labik sirah ma-in ilamo gireik karei krih dang akok di bhum Meraong negar. Ini lac bruk kham  merat di Labik sirah ma-in ceik Bà Đen jeng yau Tay Ninh dak harei dak pachreih hu rilo tuai damuai mai rivang. Gah yulit Tay Ninh jhul pakhang bruk yaih khan, pachreih tuai damuai mai sirah rivang ma-in; rik tame paglong pasiam veik bruk sirah rivang ma-in, khik ramik ilamo piah pachreih tuai damuai dalam saong langiu negar.  

Sa nyaom kapol uranaih “ rai Gen Z" di Ban raya HCM hu padang danak dak “ “Sao Đầu Mũ”, alin brei rilo thaot binguk hu padang ngak ka Gilang khik piah drap ar Biet dong Sai Gon – Gia Định. Bruk khik ramik ini lac gilang khik piah harak gal karei krih  lac dom thaot binguk saong dalikan ka dom urang lin biet dong Ban Gon. Labaih 200 blah rup thaot hu kapol ini padang meng kong nghe taka so piah hu thau hu mboh veik bruk sami samar saong tantu cambaic laic ka dom bruk sajarah praong khang kadang.

Trung Quoc birau ba tabiak sarak daong jien mbaok sumu labaih 500 dola My yaok thun ka dom urang amaik ame hu anek sit umo ala 3 thun  dalam negar, piah pachreih dom baoh sang ndih tapui anek dalam tuk dak harei dak hu rilo urang taha saong takik manuac sia. Ini lac bruk kham merat ngak brei trun bruk kuhria ndua nong trak ka jien ndo di dom baoh sang hu raong anek saong parilo bruk ndih tapui anek  di taneh ia yaok tik bhap bini rahra. Dom paok jien daong meda hu pandar meng thun 2025 saong hu bayar tal tuk uranaih praong tagok 3 thun.

Tesla saong Yam ndoc ngak bruk Elon Musk daok gaok kan kandah, tuk jien pablei radaih ndien trun saong bruk pablei salih  radaih peih ta-eng oh ka hu lagaih rilo. Dalam var ginum biai ka bruk pablei salih birau ini, ong Musk khan lac Tesla daok likau harak adat meng jabat khik iek piah ba tabiak jitvu taxi peih ta-eng (robotaxi) di rilo tieu bang, dalam nan hu California, Nevada, Arizona saong Florida. Ong Elon Musk caong khin jitvu ini mek hu jaik 50% bhap bini Mỹ di puac thun ini saong peih ngak pambak praong di puac thun 2026.

Urang kumei daoh negar My angan Beyoncé hu jeng nghe si kalik jhuk jien mek tame meng tour parang iek glong abih jaman ini. Ini lac mbang ka dua dalam bruk ngak di anai, hu tour tapa 400 trieu dola. Dalam album saong tiur parang iek, Beyoncé meyom dom urang nao dahlau, meng angan danei atah yau  Charley Pride tal dom nghe si urak ini yau Mickey Guyton atau Jimmy Allen. Tour daoh yau dak dalikan birau ka sajarah bhum palei./.