Peih ngak Sarak 1719 di Thu tuong Rajaei ka Danak dak pakat negar patagok kinh te - xa hoi bhum urang bangsa takik saong bhum ceik vaktu meng thun 2021-2030, tinh Lâm Đồng pataom tame pasang iek, piah hu thau bruk caong khin buh jien tame ngak mbang dalam thun piah paglong raidiuk bhap bini urang bangsa takik saong bhum ceik. Kuhria taong abih phun jien buh tame ngak dom danak dak labaih 325 ti dong. Lam Dong brei pataom tame peih ngak dom danak dak di 218 palei biak kan kandah rik tame brei paglong raidiuk di urang bangsa takik.

UBND xã Hòa Hiệp (Bà Rịa - Vũng Tàu klak), TP.HCM khan brei thau, piah duh ka bruk kuac duah, pataom talang liet si, karja palei iew bhap bini pabak khaw tin, harak gal  pambuak tal Sang iek ruak K76A saong labik dar dom liet si pak ini. Sang iek ruak K76A atau  labik dar dom liet si kreh glai ram ( huyen Xuyen Moc, tinh Ba Ria - Vung Tau dahlau diah), hu parabha jeng klau labik, yaok labik atah di gauk dom mbaik jalan. Dalam jaman mesruh metak biak catang, rilo urang jakar, urang lin var klak rup drei taong kalin, jru ruak pak ini. 

So Y te TPHCM birau peih bruk mbaoh harak daong ilamo ngak bruk di 7 sang iek ruak da khoa ngan haong 7 Pasak Y te di bhum gah Barak negar. Mbang mbaoh harak ini, taong abih 12 Pasak Y te di Ban raya HCM hadei pagam tame hu dom sang iek ruak nda khoa piah daong, paglong ilamo y te bhum palei saong patagok bruk dut iek ruak, jru ruak pambuak dom pakat. Kham merat daong dom pasak y te dak harei dak siam ilamo ngak bruk saong ilamo iek glang prein yawa di bhap bini.

Dalam danak dak Parang iek ilamo kong chieng duh ka bhap bini sang tuai damuai rah tabiak birau ini, di Gilang khik piah drap ar Dak Lak, adat taduan raok metau likei di urang Ê Đê tui darah gah amaik hadei lakhah, pasang mai daok gah kumei. Adat raok metau likei hu peih ngak hadei metau kumei mai daok gah pasang hu meng tha tal klau thun tui bruk ba tabiak di dua baoh sang.

Hadei laik yaom trun biar, dom harei ini yaom baoh manuk di tỉnh Dong Thap tagok, urang raong biak chreih chrai kayua hu laba biak glong. Tukvak ini, yaom baoh manuk glai yaom meng 2.300 -2.400 đồng sa baoh, tagok labaih 300 đồng dut saong adit dahlau; yaom baoh manuk raong kong nghiep yaom meng 2.000 - 2.100 đồng sa baoh. Ta-eng baoh cim vak tagok labaih 500 dong sa baoh. Yaom ini, urang raong hu laba glong. Hadei pagam tame, tinh Dong Thap hu taphon labaih 25 trieu drei manuk ada praong abih di bhum taneran kraong Cuu Long.

Cảnh sát Pakat negar Philippines peih ngak labaih 20.000 sĩ quan tal dom labik di Ban raya Quezon piah khik brei salamat  ka Adat Khaw tin Pakat negar mbang ka 5 di Tong thong Ferdinand Marcos di harei 27/7 anak tal. Yaok thun, di harei Som puac bilan 7, Tong thong Philippines brei bac Kadha Negar yaok thun, piah khan brei thau bruk rah tabiak di taneh ia, khan brei thau danak dak nghi su di Rajaei saong caong khin Quoc hoi brei tapa dom jalan daong.

Karja bhum palei di bang New South Wales, Australia daok peih ngak iek kong nghe “paga pacang ảo” di tapen jalan Macs Reef caong khin takik bala rah tabiak di jalan mbak saong athur glai. Danak dak ini buh jien tame 20.000 dola Australia piah taong yaom bruk ngak hu dalam 12 bilan. Tuk gom menek pasang tame, dom pandap “pacang ja” hu pasang nhap nhay saong yawa catang piah ka athur glai thau lac hu radaih jak mai tal.

Mbang langik pandiak dui atah di rilo labik Algeria ngak apui khuah glai jaik 1.000 mbang saong apui mbang phun metai hala thu dalam oh ka bak sa adit, urang jakar jak ba labaih 19.000 urang mai ngak bruk gam ahaok padam apui. Langiu apui khuah glai, Algeria birau lahik ndien di ralo tinh, kayua khut jamraih meng langik pandiak catang./.