Page ini harei 23/01/2026, di Jabat Trung uong Ndang, Mban Chap hanh Trung uong Ndang mbang ka XIV hu peih ngak Nyaom biai mbang ka sa piah ba tabiak dom bruk dom kadha hu makna praong dalam, brei mboh bruk ngak akok meti di tukvak ngak bruk bahrau. Ong Tô Lâm, Tong Bi thu Mbang Chap hanh Trung uong Ndang mbang ka XIII, dang akaok  Nyaom biai saong lambaok Ndoan Chu tich Nyaom biai tacei ba ngak bruk tui danak dak Nyaom biai. Ngak njauk tui dom asar  kadha di Ndang ba tabiak, adat ngak bruk, adat palih ruah saong dom asal kadha hu pambuak, paglaong hatai gul pataom saong bruk ngak tui pahukum, Nyaom biai mbang ka sa di Mbang Chap hanh Trung uong Ndang mbang ka XIV hu salah blaoh dom asal kadha karei hu makna, palih ruah Mentri Chinh tri, Tong Bi thu, Mbang Bi thu, Uy mbang Pasang iek Trung uong saong Chu nhiem Uy mbang Pasang iek Trung uong.

Mbang Chap hanh Trung uong Ndang mbang ka XIV njauk hatung hatai abih gauk palih ruah ong Tô Lâm, Tong Bi thu Mbang Chap hanh Trung uong Ndang mbang ka XIII ngak veik Tong Bi thu Mbang Chap hanh Trung uong Ndang mbang ka XIV. Biar harei, Nyaom roya lambaok vakil dalam negar mbang ka XIV di Ndang nyaom biai tamat blaoh.

Melam ini, di Ha Noi, Danak dak daoh tamia biak gheih ngan haong kadha “Ala hala dok hadah tariak di Dang”  hu peih ngak praong prang, slam uan bruk peih ngak jak jeng di Nyaom roya pakat negar mbang XIV di Dang CSVN, tui nan pahadar 96 thun Harei padang Dang CSVN (3/2/1930 - 3/2/2026). Danak dak parabha jeng 3 binah, ngan haong asar kadha “ Jalan sahaneng birau- Bruk jak jeng birau- Jaman birau”. Bruk ngak ilmao - chinh tri, gam cuh phao bingu, praong prang 25.000 urang. Dom urang daoh danei angan di Viet Nam ba drei tame dom kadha daoh pok meyaom dom siam gheih saong bruk salih birau di bhum palei, taneh ia.

Di inem mek sajarah đặc biệt lac Nhà đày Buon Ma Thuot, UB Bhap bini tinh Dak Lak bahrau peih ngak praong prang Harei pahadar dhar phol dom urang lin Kat mang njauk mek kareik meng jaman mesuh metak saong klak rup drei ka taneh ia di labik ini. Atah di ini 82 thun, harei 25/1/1944, “mbang duyet binh” di dom urang daok guk chinh tri hu rah tabiak dalam Nhà đày Buon Ma Thuot. Di labik daok guk, hala dok bhong meraik par par, brei mboh ka hatai kham merat di katmang di dom urang cong san anak dom kol khamang.

Dom mbang tabiak tathik ngak mbang  puac thun daok mek hu rilo chreih chrai di urang nao tathik Ca Mau tuk rilo gilai ikan taong chap hu rilo ikan ba thú, jien mek tame labaih 1 ti dong sa mbang nao. Di tapen tathik  Sông Đốc xã Sông Đốc dom harei puac thun gilai dui gauk pataok tame tapen tathik, pajeng bak ikan, biak chreih chrai saong caong khin  hu mbang Tet trei sir. Thun ini, rilo bhap bini chreih chrai kayua mek hu rilo ikan hadang…gam hu rilo ikan gam pablei hu jien.

Arthak Tet hu chreih chrai di angaok dom bein bangu taphia Ban raya Ho Chi Minh, labik urang pala bangu jal val sangka, cakak laih yaok kabum bangu piah bangu choh njauk bingun. Dom harei tapa, di dom sang bein di palei Kim Giao, xa Kim Long, Ban raya Ho Chi Minh (labik Ba Ria – Vung Tau klak), rahra daok samar chip cakak, laih kabum bangu, taong abih hu labaih 43 ha taneh, pabak tabiak darak pasar labaih 130.000 pakuang bangu rilo janih. Urak ini hu labaih 80% bangu hu gah ikak kaiy kakei blei bayar jien takai, yaom pablei thun ini glaong jang thun dahlau labaih 15 – 17%. Urang pala bangu caong takre tame mbang pala bangu Tet thun ini hu yaom, daong patrilo jien mek tame.

Tong thong Mỹ Donald Trump brei mbaoh harak padang “Hoi dong Salamat” di Davos - Thụy Sĩ. Ong Trump brei mboh bruk sahaneng hadah krah “daong ka dunya”, kakei kapol nyaom peih praong bruk ngak di Dải Gaza meyah ngak hu siam mekre. Ong khan lac hu 59 taneh ia njauk hatai tame, yaom lac tok hu 19 taneh ia di Mỹ hu mbaok. 

Gilang pariak trung uong Nga brei thau, khik piah ameh saong jien ngoai hoi di negar ini, mek hu yaom kaom glaong abih hu labaih 769 ty USD, kayua yaom ameh tagok khang. Thun 2024, khik piah jien ngoai hoi di Nga tagok 25%, rilo meng lac jeng mai meng yaom ameh tagok khang. Nga hu ngak rilo rahra bruk khik piah jien ngoai hoi di drei meng jien dolla My tapa dong euro, ameh saong nhan dan te di Trung Quoc meng dahlau tuk ngak bruk quan su karei di Ukraine.

An Do peih ngak sa danak dak pato online ka tri tue nhan tao AI pandar dalam y khoa, piah pabak ilamo ka labaih 40.000 bac si hu thau dom ilamo ka AI duh ka bruk iek ruak, dut iek ruak, roh duah saong ba tabiak jalan ngak. Mentri Y te taneh ia ini khan lac, bruk pato bac online brei mboh bruk dak harei daka khin pandar tri tue nhan tao tame bruk iek glang prein yawa./.