Trung Quốc khan brei thau bruk padeih taong mek ikan hu tukvak

Mentri Ngak nong saong Patagok palei pala birau payua harak ka UB bhap bini dom tỉnh, ban tapen tasik ka bruk Trung Quốc khan brei thau bruk padeih taong mek ikan hu tukvak, meng 12 tuk harei 1 bilan 5 tal 12 tuk harei 16 bilan 8 thun 2022 ngan saong taong abih dom bruk taong mek ikan, langiu vah ikan di dom labik tasik, dalam nan hu dom labik tasik hu bruk ngak po, quyền ngak po saong quyền ndem meyai di Viet Nam angaok tasik biển Đông. Mentri Ngak nong saong Patagok palei pala ndom lac: bruk ba tabiak nan di TQ lac oh njauk, ieuc dom tỉnh, ban tapen tasik khan brei urang nao tasik thau chip. Gam haong nan, pacheih urang nao tasik taong chap ikan yau yaok harei saong atcei pato bhap bini nao tasik tui kapol nyaom tuk chap mek ikan piah daong ka gauk langiu tasik; samar brei ka jabat chức năng thau ka dom bruk ngak suan di gilai ikan negar langiu di tasik Viet Nam.

Dalam danak dak ngak bruk di Hoa Kỳ, beir harei 11/5 (tui tuk vak pak nan), Thủ tướng rajaei Phạm Minh Chính hu kadha ndom nyai di Viện roh duah Chiến lược dunya Hoa Kỳ (CSIS) di Washington D.C. CSIS lac sa dalam dom jabat roh duah dang akaok di Hoa Kỳ ka jalan ngak, sarak đối ngoại song dom bruk dunya. Thủ tướng ndom lac, bruk abih hatai jia song trách nhiệm hu labik dang biak prong piah langyah dom bruk dok caik tabiak ngan song dunya urak ni .

UB bhap bini tỉnh Đồng Nai birau mbaoh tangin brei ngak Danak dak đô thị thông minh vaktu 2022 -2025, pamaong tal thun 2030. Tui Danak dak, mbiah tal thun 2030 tỉnh Đồng Nai hu jeng đô thị thông minh, salih birau, taong abih bruk khik iek, tacei ba di karja. Meng nan ba tỉnh Đồng Nai cak rok patagok hu makna praong di taneh ia pambak tame KHCN saong urang ngak bruk hu ilamu glong.

Melam 11/05/2022, di Hà Nội, 84 jalan ngak hu pok angan di harei pataom iek veik song jao giải Mbang pakacah sahneng duah kỹ thuật pakat negar mbang ka 16. Mbang pakacah kayua Kadung jien dong sahneng duah ilamu Việt Nam (di Liên hiệp dom Kapul ilamu song kỹ thuật Việt Nam), Mintri Khoa học song Công nghệ, kapul dam dara CS HCM pakat negar, Tổng Liên đoàn Lao động Việt Nam pambuak bruk peih ngak, piah jhul pakhang bruk ngak hadah krah di tong abih bhap bini dalam dom bruk ilamu kỹ thuật, jhul pakhang bruk pandar dom jalan kỹ thuật tame bruk ngak mbang song rai duik, rik dong patagok kinh tế - xã hội. Mbang pakacah sahneng duah ilamu pakat negar hu peih ngak meng thun 1989. Hadei di labaih 30 thun , hu labaih 7.000 jalan ngak hu mbaok tame pakacah song jiak 1.000 jalan ngak hu jao giải.

Di var taom gaok cư tri di Kapol urang QH Bna raya HCM đơn vị ka 1 di biar harei 11/5, urang ngak praong di Ban Thủ Đức brei thau, anak tal Thanh tra Rajaei meda ndem biai nao mai saong mikva khieu nai ka asar kadha pambak tal taneh “ 5 khu phố 3 phường” di labik đô thị birau Thủ Thiêm. Urak ini, Ban Thủ Đức saong dom gah chức năng daok kham merat piah gam haong bhap bini hu sa panuac ndom haong gauk piah pamaong tal bruk cak rok patagok labik đô thị birau Thủ Thiêm soang di Ban raya HCM.

Harei 11/5, Hội đồng Bảo an Liên hợp quốc hu peih mbang nyaom samar piah ginum biai ka bruk Triều Tiên anak bruk Bình Nhưỡng daok peih ngak dom mbang cuh iek tên lửa, hạt nhân dalam tuk vak anak tal. Di mbang nyaom, Mỹ hu panuac ieu Hội đồng Bảo an buh phiếu ka sarak kayua Mỹ batabiak ka bruk patagok tong phạt Triều Tiên. Min, Nga song Trung Quốc khang hatai cagar veik bruk tong phạt, langiu di dom tong phạt bo Triều Tiên daok ndua naong meng di thun 2006, kayua bruk pahla.Mbang nyaom hu rah tabiak dalam tuk Bình Nhưỡng hu tal 15 mbang cuh iek tên lửa meng akaok thun tal ni, dalam nan hu tên lửa đạn đạo xuyên lục địa jalan atah.

Gilang pariak negar Pháp daok pasang iek tagok jien laba piah pacang jalan tagok di lạm phát, tui kuhria mboh dahlau tgok tal 5,4% dalam bilan 6 thun 2022. Jabat ini jeng khan brei thau bruk patagok di gah kinhg te Prang thun 2022 meda pambak tame bruk pasiam veik di gah dịch vụ, abih di nyu lac gah dulich, dalam tuk gah ngak ôtô, padang ngak, kaya nong atau jru tavao meda gaok kan kandah khang kayua kurang gah pabak tame saong yaom năng lượng tagok glong.

Gah Lao động dunya (ILO) bahrau brei thau, tui kuhria labaih 4,8 triệu bruk ngak lahik di Ukraine meng di tuk Nga peih bruk quân sự. Song meyah bruk meriak gauk dok tagok khang, dom bruk ngak njauk lahik tagok 7 triệu, samu 43,5%. Bruk mesruh gauk di Ukraine jeng meda ngak brei patagok urang oh hu bruk ngak di dom taneh ia jiak tapen, labik hu yaok triệu urang tị nạn. Meyah bruk mesruh gauk dok rah tabiak, dom urang tabiak truh Ukraine njauk dok veik lavik jang, ba tal trak damak jang ka drak pasa urang ngak song bruk dong gah xã hội di dom taneh ia dok jiak tapen ni, gam song nan ngak patagok bruk oh hu bruk ngak di rilo taneh ia ./.

Urang lang: Hani Pha – Bhumi – 12/05