Sở pato megru TPHCM brei anek saih padeih nao bac meng harei 10/5 piah khik kajap bruk pacang caga jit Covid-19

Trung tướng Tô Ân Xô, Chánh văn phòng Mintri Công an brei thau, pathau khan di Công an 39/63 tỉnh ban brei mboh, meng akaok thun tal ni hu labaih 150 ribau urang tame Việt Nam, dalam nan hu labaih 110 ribau urang tame meng jalan mbak, dok veik meng jalan kapan haoh. Bahrua ni, akaok mintri Công an hu tabiak sa Sarak brei dalam negar tong abih dom urang negar langui piah duah mboh urang halei tame negar suan hukum piah langyah yau pasang iek dom labik padeih padei, hotel, dom labik dok. Gah biên phòng brei patagok menuac nao bhum tapen negar piah pacang cakak, gah công an duah saong pataom tame dom labik brei dok karei. Gam haong nan, khang hatai ba tabiak kaoh tui hukum urang halei tame VN suan hukum , urang ba jalang.

Page ini, Mban tacei jalan pakat negar pacang caga jit Covid-19 brei thau, dalam 12 tuk tapa, hu veik 8 mbang urang njom Covid-19 lac dom urang ruak daok iek ruak di Sang iek ruak nhiệt đới Trung ương. Dalam dom urang ruak daok taong ruak tok hu 74 urang âm tính SARS-CoV-2. Pambuak tal bruk klauk jru vaccine caga ruak, dalam negar hu 675.956 urang lac dom urang njauk brei klauk jru pacang caga Covid-19 dahlau.

Sở pato megru TPHCM hu pok panuac likau brei anek saih padeih nao bac meng harei 10/5 piah khik kajap bruk pacang caga jit Covid-19. Hu thau dalam tuk padeih lễ 30/4 song 1/5 meng bloh, hu 9.738 gru pato, urang ngak song 81.355 anek saih tabiak truh ban. Pambuak tal mbang par VN113 (hu urang ruak Covid-19 di Đồng Nai) hu 14 anek saih di dom quận: 1, Bình Thạnh, Gò Vấp, Phú Nhuận, Tân Phú, Quận 5, thành phố Thủ Đức song sa urang ngak gah pato pakai. Gah pato megru ban raya TP hu tacei dom sang bac ramik veik bruk batabiak song tamat bruk kiểm tra học kỳ 2 tui jalan pasang iek tapak di sang bac dahlau di harei 9/5.

Bộ Tư lệnh bhum 5 Hải quân brei thau lac birau duah mboh sa kapal gilai ikan dreih yau mai meng Campuchia tame Viet Nam. Di tuk pasang iek, angaok kapal hu 5 urang. Dom urang nan khan lac, harei 30/4, kapal gilai mai meng An Thới, Ban Phú Quốc, tỉnh Kiên Giang nao taong chap ikan. Yau nan min, kayua oh caik hatai ye kapal gilai tapa bhum tasik Campuchia. Urak ini gah chức năng hu tabiak harak brei chap khik kapal gilai, ba urang nao labaik brei daok karei tui bruk ba tabiak di karja.

Sang bac Đại học Đồng Nai bahrau patabiak bruk pasang iek, pasiam veik bruk ngak suan gah jien ndua hadei di tuk pasang iek, dalam nan pataom tame mek veik pok jien 63 tỷ đồng. Dahlau di nan, Ủy ban Kiểm tra Tỉnh ủy Đồng Nai hu panuac khan ka dom bruk ngak suan di sang bac Đại học Đồng Nai yau bruk cai pandar oh cambaih laih, klaak langui harak gar labaih 63 tỷ đồng, ngak suan Hukum kadung jien karja, Hukum pacang caga palai pajoa; rilo urang jakar pal akaok di sang bac njauk kỷ luật.

Tổng thống Bulgaria brei thau meda peih bruk palih ruah urang ka QH di bilan 7 anak tal saong padang rajaei lâm thời di adit anak piah peih ngak dom jalan pasiam bruk ngak kinh tế, dalam tuk klau đảng praong abih di negar ini oh padang hu rajaei pambuak gauk. Tui dom urang langyah, bruk Bulgaria samar padang hu rajaei birau hu makna biak praong dalam, daong taneh ia ini veih gah kinh tế tagok kayua daok kan kandah trak meng jit ruak praong saong ba tame pandar ka siam kadung jien pasiam hadei jit Covid-19 di EU.

Mintri Y tế Canada bahrau brei adat pandar vắc-xin pacang Covid-19 di hãng jru Pfizer/BioNTech ka urang meng 12 tal 15 thun, jeng sa negar camereip di dunya brei adat pandar vắc-xin pacang Covid-19 ka uranaih.Bruk ni hu batabiak hadei di tuk tapa dom mbang ngak iek brei mboh janih vắc-xin ni siam mekre ka uranaih song urang prong. 

Dalam tuk Ai Cập daok gaok kan kandah kayua jit Covid-19 mbang ka 3 ngan saong urang birau njom ruak tuk halei jeng labaih 1 ribau yaok harei, Rajaei taneh ia ini brei ngak tui dom jalan pasang iek catang, abih di nyu dalam tuk jaik tal Roya Eid al-Fitry. Roya nan tamat bilan iek Ramadan di urang Islam, bhap bini Ai Cập hu padeih meng harei 12 tal 16 bilan 5. Yau nan min, bruk sapahyang peih ngak di dom sang megik bo oh brei hu mbaok uranaih sit. Langiu di nan, di dom mblang tasik, bein bingu jeng brei kareik pabah mbang dalam dom harei padeih Roya.

Urang lang: Hani Pha – Ái Nghiêm – 06/05