Công an tỉnh Gia Lai hu pambak tame dom taha palei jak ba bhap bini halain hatain jao phao ndao

Tui jalan ba tabiak di rajaei, danak dak yaok xã sa pandap (OCOP) daok lac danak dak cak rok patagok kinh tế palei pala praong, njauk brei ngak dahlau di abih dalam sarak cak rok patagok kinh tế palei pala, pambuak haong bruk padang ngak palei pala bahrau khang kajap. Ni jeng lac danak dak brei mboh bruk suai lavik njauk pataom tame cak rok patagok dom pandap hu prein khang, mbuan lagaih, lac pandap biak karei di pak nan saong pambuak haong ilamo, anek manuac di yaok labik, bhum palei, bangsa piah pabak ka bruk cak rok patagok bruk ngak mbang gah du lịch.

Tỉnh Đồng Nai hu 4 jabat palih ruah urang ka Quốc hội, 27 jabat palih urang ka Hội đồng bhap bini pakat tỉnh, 95 jabat palih ruah pakat huyện, 1157 jabat palih ruah pakat xã. Dom tỉnh ban urak ni dok caga padang kapul palih ruah njauk tui tukvak batabiak. Nyaom biai hiệp thương mbang ka 2 njauk hatai haong taong abih harak angan dom urang tabiak piah pilih ruah ka Quốc hội mbang XV (urang pak di labik) lac 15 urang, dalam nan hu sa urang tabiak eng song 136 urang tabiak piah pilih ruah ka Hội đồng bhap bini tỉnh, dalam nan hu sa urang tabiak eng. Dom urang tabiak piah pilih ruah lac urang daok ranaih, urang langui đảng, urang kamei jeng hu ginup.

Labaih 1 thun tapa, Công an tỉnh Gia Lai hu pambak tame dom taha palei, urang hu angan je piah jak ba bhap bini halain hatain jao phao ndao, pandap patuh. Pagap yau di xã Đak Djrăng, huyện Mang Yang, meng bilan 3-2020 tal urak ni, Công an xã Đak Djrăng hu pataom mek labaih 30 mbaik phao ngak eng. Daok puk Brếp, meng bruk daong di taha Xrăn, Công an xã hu pataom mek 18 mbaik phao cuh meng cồn, 2 mbaik phao hơi...

Pasak kuhria mboh dahlau bruk langik tasik pakat negar ndom lac, tanut tia cực tím (UV) meng harei 3-5/4 di dom ban di Bắc Bộ, Trung Bộ song Nam Bộ di tanut mbuan si jhak biak glong. Piah pacang caga kanyah jhak di tia UV, dom urang ilamu y tế hu panuac kakei bhap bini cuk khan aow pacang caga, dalam nan dom janih aow pacang pandiak yau aow tangin tah, aow pacang hu takuai, capa tah, sambo jnuk, muat prong jhih piah pacang mbaok, takuai song tanye; njauk palih tanyah pacang pandiak, cuk camin khik meta. Gam song nan, dom urang mbang boh kayau that rilo vitamin C, patrun patakik kanyah jhak meng tia cực tím; pandar kem pacang pandiak yaok harei tuk tabiak gah langui, song tuk langik hu rilo taginum.

Mblang hamu rong biển (xã Phước Dinh, huyện Thuận Nam, Ninh Thuận) daok tame tukvak mekre di abih dalam thun, dui pachreih hu biak rilo tuai damuai mai rivang main, maong iek. Tuk ia trun, sambo hijao di rong biển me-m bak patau san hô praong labaih 500 mét, atah 4 km rah trun tui mblang tasik ngak ka tuai biak patuak drei anak dom ghieh makre di langik tasik. Mai tal mblang hamu rong biển, tuai damuai hu ba drei tame langik tasik, main bui sambai, thaot binguk tapen dom mblang rong biển hijao, gam tui di nan hu duah thau dom bruk ngak yaok hareii di bhap bini bhum tasik.

Hu labaih 250 janih vaccine dok hu roh duah, patagok piah khik caga 7 tỷ 700 ribau urang anak jit COVID-19. Dalam nan hu 82 janih hu ngak iek angaok rup menuac. Rai vaccine COVID-19 bahrau hu dom janih yau vaccine xịt dhung atau hu vật liệu gien di SARS-CoV-2. Dom janih vaccine ni ngak tabiak samar jang, mbuan pajeng ba jang, pasiam hu dom kan kandah di dom vaccine hu mbaok di drak pasa dahlau di nan. Rilo meng lac vaccine COVID-19 urak ni brei klauk 2 mbang, yau nan ye dom janih vaccine hu sa mbang klauk jeng ngak brei mbuan lagaih bruk klauk jru.

Hãng Toyota-Nhật Bản daok padang ngak ban thông minh di takai ceik Phú Sĩ, pandar dom robot, radaih peih eng saong trí tuệ nhân tạo tiên tiến. Woven City – ban thông minh praong jaik 71 ha hu sang daok ka bhap bini saong dom urang roh duah ialo ngak bruk di ni, taong abih jeng nduac meng điện meng pin nhiên liệu, mek năng lượng meng phản ứng hydro-oxy, langiu di dom blah pin ia harei piah ngak tabiak sa ban salamat jang, hacih jang, bui sambai jang saong bac dom kadha bac meda hu hu pandar angaok dunya.

Dang anak pandiak bhang trak tuk yam tame bilan pandiak, Thái Lan dok peih dom bruk mek ia saong pabak ia dalam haluk prong di dom bhum thu lagu abih di gah kreih negar, gah brak song Đông Bắc, khik ka jalan ia anak meta jang yau di harei anak tal .Cục Tài nguyên ia dalam haluk di mintri Tài nguyên song Môi trường Thái Lan hu ba dom urang ilamu địa chất song labaih 80 kapul urang ngak hu ba tui jamriak kuac tal dom labik thu lagu piah duah jalan ia dalam haluk./.

Urang lang: Thu Thảo – Hani Pha – 03/03 14:46:16