Bruk peih brei pok jien daong 886 tỷ đồng di TPHCM ka dom urang gaok kan kandah meng jit Covid-19

Tui Mentri Y te, bruk klauk jru pacang ruak praong abih dalam negar kuhria meng dahlau mai hu mbaok di rilo gah yau y te, bol lin, công an saong rilo mentri, rilo gah meda hu peih ngak meng bilan 7 thun 2021 tal bilan 4/2022, di dom labik klauk jru hu ginup pandap panda. Tui bruk ba tabiak nan, Mentri Y te ndem cambaih lac: Urang hu klauk jru lac taong abih bhap bini dalam umo thun hu brei klauk vaccine tui panuac kakei di gah ngak vaccine, dalam nan brei klauk dahlau ka dom urang ngak bruk pacang caga jit saong dom kapul urang daok ngak dom bruk piah jhul patagok kinh te. Mentri Y te ba tabiak bruk lac dalam 3 bilan akaok thun 2022, labaih 70% bhap bini hu klauk vaccine; khik kajap siam mekre salamat tuk hu klauk vaccine pacang Covid-19.

Bruk peih brei pok jien daong 886 tỷ đồng di TPHCM ka dom urang gaok kan kandah meng jit Covid-19, ong Lê Minh Tấn - Yam ndok Sở LĐTB-XH TPHCM brei thau: harak gar piah daong urang ngak bruk tự do hu payua blaoh tal dom phường, xã, ban sit, saong dom labik nan daok pasang iek, pilih ruah jaik 70.000 urang pablei salih cakaong naong, pablei vé số, duan ve chai, peih radaih xe ôm… (dalam nan hu jaik 8.600 menuac daok tạm trú). Ong Lê Minh Tấn ndom lac, piah hu mbang tui pok jien daong 886 tỷ đồng di TPHCM, bhap bini oh cang ngak harak gar hagait. Jien hu payua tapak tame tài khoản ka urang ngak, atau yar tal tangin bhap bini, dalam bilan 7-2021.

Sở Y tế Ban raya HCM daok ba tabiak bruk taong ruak ka urang njauk Covid-19 tui 3 pakat iek ruak nan lac, pakat oh mboh ruak atau mboh hanyol, pakat mboh ruak saong pakat taong ruak ka urang ruak trak. Langiu di nan, Gah y te jeng ba tabiak bruk taong ruak 20.000 laneing gaiy ndih iek ruak. Taduan saong brei bruk 500 bac si, dalam nan hu 80 bac si gah hoi suc saong 1.500 điều dưỡng, dalam nan hu 240 urang gah hoi suc, urang ky thuat mai meng dom sang iek ruak trung uong, mentri, dom gah di ban raya piah daong ka bruk taong ruak.

Tukvak ini, dom bein di dom bhum pala njam patam, baoh kraoh yau Đà Lạt, Đơn Dương, Lạc Dương… (t.Lâm Đồng) jeng daok kham merat khik tani tanat bruk pabak kaya pandap ka dom bhum palei, abih di nyu lac TPHCM. Urak ini, yaok harei jeng daok khik hu tani tanat jaik 4.000 tấn njam patam, baoh kraoh dom janih meng Lâm Đồng ba tame pablei di TPHCM.

Sa-ai Ngô Minh Hải, Phaok Bí thư Thường trực Thành đoàn TPHCM, Akok Kapol Liên hiệp Dam dara Việt Nam Ban raya HCM brei thau, urak ini, yaok harei Thành đoàn Ban raya HCM brei 6.000 urang halan hatian nao tal dom labik mek mẫu, dom labik brei daok karei, labik pacang veik piah daong ka ban raya pacang jit. Dalam nan, ralo sinh vien bac gah y di dom sang bac ĐH di Ban raya HCM. Ta-eng Sang bac ĐH Y Dược TPHCM urak ini hu labaih 2.200 urang halan hatian lac gru pato, urang bac hadei đại học saong SV nao tapak tame dom labik hu jit ruak piah ngak bruk.

Bruk samar mboh saong brei daok karei dom menuac njauk Covid-19 lac bruk praong ba tal jeng atau oh dalam bruk pacang jit ruak. Urak ini, dom taneh ia jeng pachreih bhap bini dut iek samar di sang piah daong mboh samar dom urang njauk Covid-19. Tui blah Straits Times, meng harei 16-6, dom labik pablei jru praong di Singapore daok ba tabiak pablei dom bộ kit eng drei dut iek samar Covid-19. Bhap bini meda blei saong eng drei dut iek di sang.

Yaom lac hu jeng sa taneh ia akok meti di dunya parabha 1 tỷ jru vaccine Covid-19 dalam negar, meblah 1/3 di dunya, min karja saong bhap bini di negar Trung Quoc jeng oh iek lap bruk pacang caga. Di dom ban hu rilo menuac klauk jru, urang ngak raong di dom labik nan jeng daok khik dom bruk brei pa-atah di gauk tui jalan ngak catang yau cuk pataih pacang pabah, dut pandiak dalam rup saong tut angan mã y te. Bruk nan hu bhap bini pachreih tui saong ngak njauk tui tuk tabiak jalan. Urang brei thau, bruk dut iek rup pabhap, pasang mã y te atau cuk pataih pacang mbaok nyu ngak ka urang mboh hu salamad jang.

Dom Angkor – inem krung ilamu dunya hu angan haong dom bimaong klak daok dalam tỉnh Siem Reap di negar Campuchia, hu yaok triệu tuai nao tal yaok thun, min kayua jit Covid-19 nan ye dalam luac 6 bilan tapa, tuai negar langiu mai ravang labik ini bahrau hu 5.329 urang, trun 98,6% duk haong thun dahlau. Urak ini, Mintri Du lịch haong Mintri Y tế Campuchia daok kham merat roh duah saong ba tabiak bruk raok tuai du lịch dunya hu klauk blaoh vaccine Covid-19 mai tal Campuchia di 3 bilan puac thun 2021, piah daong ka gah ngak kong oh bu sauk di taneh ia ini./.

Urang lang: Ái Nghiêm – M. Phương – 10/07 14:25:51