Klauk jru pabak ka urang taha saong anek saih meng umo 12 thun tagok

Tukvak jiak ini, dom tỉnh dalam bhum taneran kraong Cuu Long hu jhul khang bruk klauk jru vaccine pacang caga ruak ka bhap bini; abih di nyu lac klauk jru pabak ka urang taha saong anek saih meng umo 12 thun tagok. Tal urak ini, bruk klauk vaccine dalam bhum hu biak rilo; Vĩnh Long klauk vaccine mbang ka 1 sumu 99,9%, vaccine mbang 2 sumu 98,3% saong mbang klauk jru ka 3 sumu 12,5% dut saong dom urang umo 18 thun tagok; Cần Thơ labaih 96% urang umo labaih 18 thun hu klauk jru vaccine; Tỉnh Hậu Giang hu klauk labaih 103 ribau mbang.

Harei 14/1, ong Nguyễn Văn Tuấn - phó akaok quận Bình Thuỷ dahlau dieh, haong 6 urang karei njauk Tòa án bhap bini ban Cần Thơ langyah ka bruk salih bruk pandar labaih 14.000 m2 taneh suan hukum. Jabat công tố brei thau lac, bruk ngak di ong Tuấn haong dom urang nan ngak kan kandah tapak tal bruk khik ramik di kanja dalam gah taneh riya đô thị, ngak tayah quy hoạch jalan ba tabiak pandar taneh riya... Ini jeng lac sa bruk ngak suan taneh riya praong abih di Cần Thơ meng dahlau mai hu gah pasang iek duah mboh di puac thun 2017. 

Biar harei 13/1, 9 doanh nghiep pajeng ba di Mblang radaih Miền Đông, quận Bình Thạnh hu peih pablei harak vé Tet sak Rimong 2022, min cagar veik bruk rilo manuac yau rilo thun dahlau, dom labik pablei harak vé biak joa menuac, takik urang blei, tangi sua radaih. Rilo urang tabiak truh Ban raya HCM meng dahlau, dom urang karei brei salih bruk nao mai kayua huac jit ruak, nao sang njauk daok karei yau nan ye dom mblang radaih, radaih pui jua lange.

Jabat Cảnh sát pasang iek Công an tỉnh Bình Dương  tabiak harak khởi tố hình sự, khởi tố bị can, tabiak harak cap khik Trần Thị Thúy Liễu (ndik tapui thun 1985, daok di phường Hiệp An, ban Thủ Dầu Một) ka bruk pagat pachot meblah mek drap ar. Trần Thị Thúy Liễu hu ba tabiak khau tin oh njauk ka asal hukum di rilo mblang taneh dalam huyện Dầu Tiếng piah urang blei jia tame blaoh caik jien takai piah hu jao quyen pandar taneh, meng nan meblah mek drap ar di 20 urang ngan haong paok jien labaih 60 tỷ đồng.

Subuh page harei 14/1, dom urang daok di phường An Phú, Ban sit Thuận An mboh apui saong khuah mbang khang meng c.ty điện mac daok dalam labik daok di bhap bini ngak ka yaok rituh met vuong gilang caik pandap njauk apui khuah jeng bau abih baoh sang di c.ty pablei salih gah điện mac. Cảnh sát pacang khuah padam khuah Bình Dương brei 12 radaih saong jaik 100 urang lin mai padam apui. Hadei di 2 tuk, apui khuah hu pacang, padam. Bala apui khuah oh ngak metai manuac, min jaik 400 met vuong gilang pandap gam haong rilo drap ar njauk apui khuah palai abih.

Harei kabroi (13/01), bol bala Thái Lan hu cuh baoh patuh thak tame bhum taneh Myanmar hadei di tuk baoh siu meng Myanmar cuh tapa jalan tapen negar, tame sa palei di tỉnh Tak. Dom mbang mesuh gauk di bol bala Myanmar saong Liên minh taneh ia Karen (KNU) daok trak damak jang di tỉnh Myawaddy jaik jalan tapen negar Thái Lan- Myanmar. Bruk mesruh gauk di taneh ia jaik taphia ngak ka bhap bini Thái Lan di jaik jalan tapen negar njauk nduac dauk tame lubang piah khik salamat.

Khaw tin ka bruk “labaih 5 trieu anek saih trung học saong tieu học Trung Quốc njauk vaiy talang ka-ing, daok jeng bruk pandiak angaok mạng taneh ia ini dom harei tapa. Urak ini, pasang iek bruk vaiy ta-lang  ka-ing hu ba tame bruk iek ruak yaok thun ka anek saih di Trung Quốc. Dom urang ilamu kakei lac brei caik hatai dom kadha pasra rup pabhap yau xà đơn, glam mbanh saong  caluai ia lac dom kadha pasram siam piah pacang caga vaiy talang ka-ing. Ini lac ruak njauk huac ka 3 ngak jhak tal prein yawa di uranaih saong dam dara taneh ia ini hadei di limeh labaih kilo saong cận thị - bhang meta.

Rajaei di Tong thong Mỹ Joe Biden hu ba tabiak dom jalan taong phat pamaong tame Triều Tiên hadei di rilo mbang cuh tên lửa di taneh ia ini di jaik di ni. Mintri Ngoại giao Triều Tiên harei ini tabiak panuac lac, bruk cuh tên lửa siêu thanh jaik di ni di Triều Tiên lac sa binah dalam bruk kham marat ngak bahrau prein khik caga taneh ia, oh pamaong tame taneh ia halei jeng oh ngak kan kandah tal dom taneh ia jaik taphia. Mayah Mỹ daok cagar, Triều Tiên meda ngak dom bruk biak catang jang./.

Urang lang: Bhumi – Thu Thao – 14/01