Meng harei 1-9 brei peih sarak daong meng Kadung jien patakik khat lahik meng bala jalan mbak. Tui nan, urang njauk rambuas labaih 81% kayua gaok bala jalan mbak meda hu daong tanut glaong abih 100 trieu dong/urang/mbang. Dalam nan kadung jien meda hu dom bruk: urang gaok bala, baoh sang hu urang metai kayua gaok bala jalan mbak gaok kan kandah ka kinh te; kapul, menuac urang tapak hu mbaok tame daong, ba urang gaok bala nao sang iek ruak chip; dom danak dak pathau khan piah patakik khat lahik kayua bala jalan mbak.

TPHCM kuhria padang ngak 4 jalan metro dalam quy 4 anak tal: Metro ban birau Bình Dương - Suối Tiên; Metro Thủ Dầu Một - TPHCM; Metro Tân Sơn Nhất - Phú Hữu; pambuak Metro ka 2 tal  Labik ban medil gah Pei Barak negar. Dua jalan Ben Thanh - Tham Lương saong Ben Thanh - Thu Thiem  di Metro ka 2 hu padang ngak, pambuak atah jalan mai gah Pei Barak negar. Jalan  ini hu ngak salah  pambuak hu taong abih dom ban medin  birau saong ban medin jaik taphia. 

Dalam 6 bilan akaok thun, kapul chuc nang tinh Tay Ninh duah mboh 16 bruk urang jakar, kong chuc, vien chuc, urang ndang hu nong ndo alkon. Min, tal ini jabat chuc nang pasang iek meng javap calei ka bruk taong bhat 3 urang. UB Bhap bini tinh Tay Ninh taong yaom jeng daok bruk urang jakar, kong chuc, vien chuc, urang ndang oh naih gheih, ngak suan hukum tuk peih nduac radaih di jalan mbak; dom jabat, labik oh ka kajap ka adat, oh tathak bruk dalam pasang iek urang jakar saong oh ka taong bhat khang catang, njauk adat.

Xã Bù Gia Mập, Ban  Đồng Nai birau hu urang metai kayua ruak meruai, nan lac kamuan likei umo 10 thun, daok di palei Đăk Mai. Tapa dut iek ruak, baoh sang kamuan ini khan lac hu sa drei athau sit oh hu klauk jru ka athau  yau nan ye oh thau lac asau lah kamuan, kaik ha-oh. Harei 7/8, kamuan ruak glaih glar dalam rup, huac hangin, huac sap khang, haduh hatai. Kamuan hu pajeng tame Sang iek ruak nhiệt đới Ban raya Hồ Chí Minh di harei 8 bilan 8 lac ruak meruai saong metai.

Pahadar 81 thun Harei Negar, Ban raya HCM cuh phao bangu di malam 2/9 di 7 labik dalam ban raya, duh rahra saong tuai damuai jirah rivang. Dalam nan hu 3 labik cuh phao bangu glaong pambuak biar di labik akaok labang kraong Sai Gon, phuong An Khánh. Gam haong nan lac 4 labik cuh phao bangu biar di phuong Bình Thới, phuong Sai Gon, xa Nhà Bè saong phuong Ba Ria. Danak dak cuh phao bangu hu papar binguk tapak.

Kham merat ngak brei salih birau, trun kan kandah ka jien padai saong paglong bruk ngak di karja, Rajaei Thái Lan brei khan tapa danak dak salih bruk ngak, kham cakak trun labaih 15% urang dalam karja di thun 2032. Tui nan, Rajaei Thai Lan jeng brei padang ngak danak dak padeih huu dahlau umo thun. Dom kapol nyaom kuhria ba tame pasang iek dom urang jakar meng 40 tal 49 thun, hu takik abih 10 thun ngak bruk, urang jakar umo meng 50 thun tagok atau hu takik abih lac 25 thun ngak bruk. 

Urang ngak nong Han Quoc daok srau kadau ka pandiak bhang glaong abih, dalam tuk Hong Kong (Trung Quoc) taduan nhiet glaong abih meng dahlau mai tal ini saong Japon rah tapa dom harei hu dak tame janih “pandiak bhang biak catang”. Tui truyen thong Anh, nan lac dom bruk brei mboh cambaih laih di mbang pandiak bhang daok rah tabiak di Dong Nam A, ngak khat lahik trak ka anek menuac, athur raong saong bruk pala drak. Kapul Dut iek langik Tasik Dunya brei thau tukvak pandiak tagok di chau A dalam tukvak 1991-2025 glaong jaik dua mbang dut saong 30 thun dahlau.

Dom apui khuah glai khang di ralo bang Washington, ba tal taong abih klau bein bingu taneh ia di bang ini gaok kan kandah. Urak ini di bhum gah Pei Barak negar My daok rah tabiak apui khuah glai biak trak kayua langik thu pandiak saong tuyet takik di bilan la-ar. Dhur mur  di dom mbang apui khuah glai ngak jhak tal yawa langik, ngak jhak tal raidiuk bhap bini, bruk ngak langiu langik saong bruk sirah rivang ma-in bilan hè./.