Tui Mentri Lao dong - Thuong binh saong Xa hoi, jalan ngak trun kathaot hu ba tabiak dalam thun ini lac dom urang sang kathaot dalam taneh ia hu khik tani tanat bruk trun 1 - 1,5% yaok thun. Dom baoh sang kathaot dalam urang bangsa takik hu trun labaih 3% yaok thun. Dom baoh sang kathaot dalam huyen kathaot hu trun 4 - 5% yaok thun. Piah ngak hu bruk kuhria dahlau ini, Rajaei patui veik ngak salah blaoh sarak, khik piah sarak trun kathaot; Daong, peih praong bruk trun kathaot siam lagaih; Brei bruk ngak karo kajap, tagok jien mek tame ka rahra.

So Pato magru Ban raya HCM barau khan harei pakacah tame tal bac 10 thun 2025. Tui nan, harei pakacah hu rah tabiak meng harei 6 saong 7/6, hu klau janih bac: Toan, Ngu van (120 minit ka sa janih bac) saong Sap nagar langiu (90 minit). Ban raya HCM lac sa bhum akaok mati di nagar hu khan harei pakacah saong janih pakacah tame tal bac 10 thun 2025. Thun 2024, Ban raya HCM hu labaih 98.000  urang hu mbaok piah pakacah tame tal 10 sang bac kayua karja padang, dalam nan hu mek labaih 77.000 anek saih tame dom sang bac karja ngaok bhum.

Di tinh Hau Giang, mikva urang ngak nong tame yuak padai Dong xuan, padai yuak hu kuhria rah 7 tan/ha, min yaom padai trun biar meng 1.500-2.000 ndong/kg dut haong padai Thu dong bahrau blaoh. Yaom padai trun biar dui tui yaom padai pablei tabiak dalam tinh jeng trun. Rilo gah pablei salih brah khan lac oh khin khik piah brah bo rilo meng lac mek brah gap piah pablei, kayua huac kanda yaom padai anak tal daok trun veik. Padai Dong xuan ini dalam tinh Hau Giang trun pajaih jaik 73.800ha, dalam nan hu labaih 50.000ha padai daok dalam tukvak tathak.

Dalam thun ini, tinh Tra Vinh patui ngak veik dom sarak daong patagok ndap nda OCOP. Tui ong Phạm Thanh Tiếng, Phaok akaok Chi cuc Patagok palei pala, dom sarak daong patagok nang suat, chat luong saong ginup ralo ndap nda OCOP, daong mek jien tame ralo ka mikva di bhum palei. Urakni Tra Vinh hu 393 ndap nda OCOP taduan meng 3 patuk tagok. Thun ini, tinh kham marat ngak hu takik abih 20 ndap nda OCOP taduan hu harak meng 3 patuk.

Dom harei ini yaok rituh gilai di tinh Soc Trang hu tabiak tasik taong ikan akaok thun birau. Ngan haong urang taong ikan, mbang tabiak tasik akaok thun biak hu rilo makna, gam samu taong mek rilo ikan, gam patagok kinh te tasik, gam daong khik kajap tasik kaoh pulao praong glaong di Taneh ia. Soc Trang hu abih tih gilai ikan hu tut angan lac 842 sruh, dalam nan gilai atah abih meng 15m ba tagok lac 344 sruh. Dom urang tut angan nao taong mek ikan angaok tasik labaih 5.600 urang.

Thai Lan hu mbaoh harak ka bruk dui atah tukvak harak adat brei ka manuac ngak bruk mai meng 4 nagar Viet Nam, Lao, Campuchia saong Myarmar. Tui nan manuac ngak bruk Lao saong Viet Nam hu daok veik Thai Lan 3 bilan – tal harei 13/5/2025. Urang ngak bruk Campuchia saong Myanmar hu daok veik saong ngak bruk 6 bilan – tal harei 13/8. Thai Lan ieu urang pandar manuac ngak bruk, doanh nghiep saong manuac ngak bruk mai meng nagar langiu khan harak dom angan manuac ngak bruk nagar langiu dahlau harei 13/2 saong ngak salah blaoh bi-ar harak di tukvak hu ba tabiak.

Han Quoc mbaoh tangin ka bruk tagok tukvak padeih padei tuk metian menek ka urang cong chuc piah brei labik ngak bruk siam mekre haong baoh sang. Tui adat bahrau, cong chuc lakei hu diuk dalam tukvak metian menek hu brei tagok tukvak padeih padei meng 10 tagok 20 harei. Ngan haong bruk menek dua anek atau menek rilo anek, tukvak padeih padei brei dui atah meng 15 tagok 25 harei. Jalan ngak di sarak ini lac brei sa labik ngak bruk siam mekre haong baoh sang, daong ka urang cong chuc hu bruk ngak saong bruk raong ba anek bik samu gauk.

Apui ghuah meng harei kabruai hu rah tabiak di sa labik pato pakai urang agama Islam di ban Zamfara gah Pai Barak Nigeria, apui mbang abih ky tuc xa meng kreh malam, ngak 17 anek saih daok ndih plang lahik saong 17 anek naih gandung apui trak. Bruk ngak tabiak apui ghuah ini oh ka duah mboh. Labik pato nan njauk bala apui mbang lac di dom sang bac agama Islam, anek saih bac lac manuac tui agama Islam, mai meng dom baoh sang kathaot. Karja bhum palei hu ralo kham marat piah ngak barau sang bac ini min oh ngak jieng kayua dom cagar tavak di dom urang ngak agama saneng tui adat meng kan./.