Tui Haji Jacky, Urang dang akaok wakil lambaok jamiyah bhap bini urang Islam tinh An Giang, adat rai anek manuac bangsa Cam Islam di An Giang hu kalu bahagian, (tuk manek ndih tapui, tuk jeng damdara dan haong palang lahik). Urang Cham halei jeng tui adat yau nan dalam rai diuk.

Tuk barau ndih tapui, tuk anek kaman barau pamanek, hala nyau di nyu njauk brei rao ka cih sa-at blaoh dar di takai kanyan anak mblang sang, kadha reing ini brei thau lac anek neih praong tagok hu nao halei jeng veik mai sang dal hai labik padaok dar tasak, dar sang danaok muk kei bhum palei. Hadei manek hu 7 harei, po sang ngak cakak mbuk dan haong brei angan ka anek kaman, adat ini hu ong hakem dak ngak di sang magik.

Adat Khotan brei ka urang praong tagok jeng damdara, adat ini brei thau sa urang tantu jeng Islam, khotan katat hu dak dalam hukum tanggung jawab brei ka urang Islam bhian di nyu ngak di sang magik.

Adat lakhah caga hu adat brei kuria haong he nao sang kumei. Daok lakhah bhian ngak dalam 2 harei. Gah gauk lakei ba pantan he nao sang kumei ngak tui dadat hukum blaoh gilac mai sang. Hadei di 3 harei, gauk gar gah lakei, amaik ame pantan lakei mai jirah diuk pasang barau lakhah, ba tui dom janih kaya ngui mbang mbang pandih brei ka sa baoh sang sakaga. Gah kumei ngak jamu payiak gah lakei haong tuai damuai mai saksi iek dom janih nih ndap nda urang bam ai hadiah ka dua diuk pasang barau lakhah.

Adat brei ka urang palang urang matai. Tui urang Cam Islam matai lahik ieu lac thei thei jeng hu tal, oh brei drut druai pandik harao ralo. Dalam sang mada hu manuac jaik si matai, urang hu mbaok bac Qur’an brei ka jiva urang plang pah sanang hatai nao tui Allah. Hadei di matai, urang brei pamenei ka hacih saat blaoh kaphan meng pataih khan bai ban putih, kaphan bilik 3 tal tui adat bangsa hukum ugama.

Urang Cam Islam di An Giang dal urang plang matai, oh cang buh tame garaong pakuang, dal urang matai di dalam haluk hu mek papan pacang brei ka mayait ndih nyauk tui adat, dal mayait oh ba khan ao jeng ye gait karei tui, blaoh gam pateik haluk. Piah caik inum kubo urang hu ngak papan caik angan urang palang gam haong harei bilan masa phaot matai. Taong abih urang gauk gar ralo darah puk paga jammaah mai sang dua di 7 harei, 10 harei, 40 harei, 100 harei dan haong 1 thun Kuhria meng masa phaot blaoh. Hukum oh brei ngak yang ka urang matai jeng kakuh binguk yau bangsa ugama karei, urang Cam Islam di An Giang jeng oh caik papan kakuh mukkei blaoh tuk halei hu baoh bingi lamen ye brei ngak du a lakau brei Po brei selamat.

Muk Trần Thị Hòa Bình, Phó akaok UB Bhap bini ban sit Tân Châu brei thau lac: Gam haong dom janih ilamu bangsa birih krih, Adat rai manuac urang di bangsa Cam Islam tinh An Giang hu Mintri Ilamu, Padhit haong Jirah ba tame danak dak ilamu pakat nagar, oh daok ieu lac sa janih ilamu dalam sa kaga baoh sang, gauk gar jammaah, blaoh nyu daok hu yaom kaom ilamu saong sajarah di bangsa.

Tui Trương Bá Trạng, Phaok akaok Sở Ilamu, Padhit haong Jirah An Giang, dom thun blaoh tapa, di sản ilamu hu brei tahu janih kadha sap rei yawa brei ka patagok ekonomik jeng ye sa janih asal brei ka raidiuk ilamu, sa labik raong ba brei ka mada kaya ilamu bangsa, rahra bhap bini. 

Khik caga jeng ye patagok yaom kaom ilamu, ieu lac sa janih brei ngak njauk hatai jai di bhap bini rah ra, daong padang haong brei patagok ilamu Viet Nam praong glaong, mbak karak ilamu bangsa saong daong tame gilang sang praong ilamu dunya. “Adat cambat dalam raidiuk manuac urang di bangsa Cam Islam ndam gam ralo tal ilamu karei karei di gauk./.