Dalam dom adat cambat, rija roya di urang Cam tỉnh Bình Thuận, oh tuk halei kurang hu Ghinăng, Paranưng saong kadait Saranai. Dom janih alat ragam ini hu urang Cam ngak tabiak. Hu rilo menuac caik abih rai di drei brei ka bruk ngak tabiak dom baoh ginang saong patoa veik ka anek taco khik ramik, rik daong patagok yaom glaong ilamu dom bangsa Việt Nam. Jasi – urang vak di rayo sap ndom VN daok di  TP HCM hu kadha vak ndom ka bruk ini:

Nghệ nhân Thổ Đồng daok di palei Châu Hanh, xã Phan Thanh, huyện Bắc Bình, tỉnh Bình Thuận  brei thau, piah thau cambaih abih ka bruk ngak, ong buh tabiak rilo tukvak piah duah gru bac megru, brei roh duah gam gam, bloah ong duah hu ilamu ngak Ghinăng, ngak kadait Saranai bo oh lac thei jeng ngak hu. " Thun 1976 dahlak bac taong Ghinăng, yuk kadait Saranai …" ong brei thau.

Ong Thổ Đồng suh sah lac, dom menuac thau ngak Ghinăng, kadait Saranai saong thau me-in dom janih alat ragam ini urak ini oh daok rilo saong biak takik hu dom urang Cam ranaih umo thun thau me-in piah khik veik ilamu meng kan hu meng yaok rabau thun. Urak ini, ong tok hu urang anek likei tui bruk saong daok ngak bruk di Sang daoh tamia Biển Xanh tỉnh Bình Thuận.

 Daok nghệ nhân Đào Tấn daok di palei Bình Minh, xã Phan Hoà, huyện Bắc Bình brei thau, meyah oh hu menuac patui veik, bruk me-in dom alat ragam Cam dak harei dak takik nao saong meda lahik nao di xã Phan Hoà ini.

" Oh mboh thei mai megru yuk kadait Saranai…, dahlau daih hu ba anek likei nao" 

Jeng dreih yau nghệ nhân Thổ Đồng, Đào Tấn daok di huyện Bắc Bình, ông Chế Quốc Minh, daok di palei Lạc Trị, xã Phú Lạc, huyện Tuy Phong, tỉnh Bình Thuận, lac sa dalam takik menuac di palei ini daok khik kajap bruk me-in Ghinăng, duh hatai lac: Oh thau ragu ragam Cam daok diuk hu tal habien tuk menuac me-in patui veik daok dak harei dak takik nao? Bruk khik ramik ilamu Cam yau ye: tamia Cam, taong Ghi năng, Paranưng, yuk kadait Saranai …

Tui Sở Ilamu - Thể thao saong Du lịch tỉnh Bình Thuận, piah khik ramik saong patagok alat ragam meng kan di urang Cam dalam tỉnh, gah ilamu daok peih ngak dom bruk parang me-in alat ragam meng kan di Pasak Parang iek ilamu Cam, mBan khik ramik inem mek bimaong Pô Sah Inư di harei senecar yaok adit saong dom harei rija, roya dalam thun piah duh, pamere bhap bini dalam palei saong tuai damuai.

Urak ini, Sở jeng daok padang ngak Danak dak pato pakai alat ragam meng kan di urang Cam di 4 xã harat urang Cam lac Phan Thanh, Phan Hoà, Phan Hiệp saong xã Phú Lạc dalam huyện Tuy Phong. Amuk Lư Thái Tuyên – Phaok Yam ndok Miuyim tỉnh Bình Thuận (di Sở Ilamu – Thể thao saong Du lịch tỉnh) brei thau:" Yaok thun jeng hu peih ngak bruk khik ramik saong patagok yaom glaong ilamu Cam".

 Ngan saong urang Cam, ragu ragam hu labik dang praong, lac prein pachreih ba mikva yam tapa kan kandah saong payua tame nan, dom caong khin, hatai jia tame raidiuk dak harei dak cakrok, trei sir. Kayua yau nan ye, nyu pachreih ba dom nghệ sĩ daok roh duah, sahneng tabiak dom kadha, dom ragu ragam piah ba tame raidiuk saong parang me-in di angaok dom sân khấu bahrau, duh ka raidiuk , ka ilamu di urang Cam, jeng yau ka menuac sia dalam taneh ia. Gam haong bruk sangka di karja palei, dom nghệ nhân, nghệ sĩ saong bhap bini daok paglaong bruk ngak di drei dalam pato pakai, khik ramik saong patagok ragu ragam Cam hadah krah./.