Inem mek bimong Hoa Lai daok di xa Bac Phong, huyen Thuan Bac, tinh Ninh Thuan hu padang ngak meng abap VIII - IX, hu ilamo sang danaok padaok dar inem krung saong hu Thu tuong Pandana Rajaei brei angan inem mek pakat negar praong glaong tui harak ka 2499, harei 22/12/2016. Tukvak tapa dom gah jabat karja hu rilo bruk ngak piah patui khik saong patagok yaom di inem mek ini.

  Min, tui dom urang diuk rai jaik taphia labik inem mek ini jeng yau urang khik iek labik inem mek ini, pak di ini takik hu dom bruk ngak ilamo nghe thuat jeng yau dom bruk ngak tui hatai jia yau nan ye oh pachreih hu tuai damuai jirah mai rivang ma-in, lavik lavik meng hu sa dua kapul nyaom urang mai roh duah atau 1, 2 urang tuai damuai jirah mai rivang iek.

  Daok di labik inem mek bimong kalan Po Dam dalam xa Phu Lac, huyen Tuy Phong, tinh Binh Thuan jeng hu Karja brei angan Inem mek pakat negar di harei 28/6/1996.

     Hadei di dom mbang brei ngak pasiam, inem mek bimong Po Dam hu tỉnh Binh Thuan pasiam ngak gilac yau dahlau. Dalam taneh bimong Po Dam hu padang: mblang bein, sang parang iek… biak gheih mekre, pabak hu hatai caong khin jirah rivang iek di tuai damuai. Yau nan min, tuai damuai mai rivang iek takik yaok di angaok tuk tangin.

     Ong Ly Duy Tung, urang khik iek inem mek bimong Po Dam brei thau, pak di ini, urang Cam (Balamon) dalam bhum peih ngak le hoi Po Dam 3 thun sa mbang tui adat cambat tanarakun di puk palei dalam bilan 4 saka Cam (jaik bilan 7 saka aia harei), daok dom bruk ngak yang adat dalam harei Kate takik mboh. 

       Jeng di pak labik inem mek bimong Po Dam ini, dalam mbang roh duah mala taneh thun 2013 hu duah mboh Linga ameh hu nien dai jaik jaik abap VIII–IX saong hu brei angan lac Drap ar di negar. Abih di nyu lac pak ini daok hu khik piah 8 sac phong di jaman patao raja Nguyen.

            Amuk Lu Thai Tuyen, Phaok akaok Muyim tinh Binh Thuan brei thau, dalam dom thun tapa, hilang khik drap ar hu padang ngak paga pacang khik inem mek bimong Po Dam khik brei ka nyu oh glut jaleih saong khang kajap tui tukvak.

            Tui amuk Lu Thai Tuyen, bruk labik bimong Po Dam jeng oh ka hu rilo tuai damuai thau tal kayua nyu hu rilo makna. Dalam nan hu jalan mbak nao mai biak kan kandah.

“Yaom lac hu Mbang khik iek pak di ini, yau nan min mikva di puk palei, kayua yau nan ye bruk pandar siam dom bruk pathau khan, meyaih pambak praong thaik binguk inem mek bimon jeng oh ka mek hu baoh jeng siam mekre. Khaol drei njauk caik hatai tal bruk dak padang dom danak dak jirah tua tuyen, dom tua rivang ma-in sinh thai pambuak pagam haong bimong kalan bangsa Cam, jeng yau tuk nao rivang jirah labik inem mek bimong Po Dam, khaol drei njauk pambuak pagam haong bruk nao rivang dom palei Cam di labik ini nan ka meng pachreih hu tuai damuai jirah mai rivang iek.”

            Meyah lac bimong Po Dam pak di Binh Thuan daok di labik atah bayah, atah labik daok di bhap bani ye hu takik tuai damuai mai rivang ma-in lac kadha nyu mbuan si thau, ye bimong Hoa Lai di Ninh Thuan daok jaik taphia haong Jalan raya nagar 1A blaoh oh pachreih hu tuai damuai jirah jeng njauk brei ndom mayai biai. Ong Nguyen Van Hoa, Akaok So Ilamo, padhih saong rivang ma-in tinh Ninh Thuan brei thau, meng blaoh jabat jeng hu brei pok panuac khan ka UBND tinh buh tabiak phun jien piah pasiam viek inem mek bimon Hoa Lai pambuak pagam haong cak rok patagok  bruk rivang ma-in, ngak jeng labik rivang ma-in.

 “Gam tui inem mek bimong kalan Hoa Lai jeng yau inem mek bimong Po Klong Garai, urak ini jabat daok padang ngak danak dak piah ba tagok khan tal Raja-ei mboh tangin tame harak brei ka bruk pacang khik saong cakrok patagok yaom kaom ilamo di dua inem mek ini pambuak pagam saong bruk jirah rivang ma-in. Hadei di tuk padang danak dak hu mboh tangin blaoh meda buh tabiak phun jien meng di kadung jien puk palei saong jeng mada lac meng di pakat nagar piah pasiam, patagaok ngan saong dua inem mek ini pambuak pagam saong  bruk jirah rivang ma-in”.

        Tui dom urang hu angan gah jirah rivang ma-in, caong khin peih ngak hu bruk rivang ma-in di sa labik inem mek ye caong khin biak hu rilo kadha. Kadha oh kein laghaih saong kan di abih di nyu urak ini ieu lac di bimong Hoa Lai di Ninh Thuan saong bimong Po Dam di Binh Thuan kayua dom inem mek ini daok ta-eng drei, atah dhua haong dom tuyen, labik jirah rivang ma-in karei dalam tinh. Gam haong tui di nan, dom bruk ngak tui hatai jia di urang Cam pak di ini jeng oh ka ngak jeng tanut, taphia di nan bruk khik iek inem mek jeng oh ka hu sangka tal labik tal dhua di nyu./.