Vietnam Airlines meda peih veik jalan par TPHCM saong Vân Đồn (Quảng Ninh) hadei di sa tukvak padeih kayua jit Covid-19

Mentri Ngak nong saong patagok palei pala brei thau, 2 bilan akok thun, abih tih yaom jien pablei salih tame tabiak negar dom janih kaya glai, kaya ikan lac jaik 11 tỷ USD, pablei tabiak rilo jang 1,37 trieu USD, tagok 28,4% dut saong tukvak ini thun 2020. Dalam nan, dom janih pandap pablei tabiak negar langiu glaong jang dut saong tukvak ini thun blaoh lac cao su, te, asar pa-ok blait, njam patam saong dom janih pandap ngak meng kayau. Daok bruk pablei tabiak negar lingiu, dalam 2 bilan akaok thun, Hoa Kỳ daok lac darak pasar praong pablei hu rilo abih ngan saong jien mek tame labaih 2 tỷ USD, tagok 57,3% dut saong tukvak ini thun blaoh saong meblah 33,05% labik blei; patui di nan lac Trung Quốc, ASEAN, EU, Nhật Bản, Hàn Quốc…

UBND tỉnh Bình Phước bahrau hu harak pathau khan ka bruk nduac radaih di gah jalan ĐT 755B (jalan Sao Bọng - Đăng Hà) – lac jalan pambuak Bình Phước - Lâm Đồng hadei di tukvak pasiam bruk jaleih, glut mbaok jalan. Tui nan, tỉnh Bình Phước klaak bruk pakauk dom radaih pajeng pandap trak labaih 16 tấn nduac tapa meng Km 16+000 tal Km 21+369 jalan Sao Bọng - Đăng Hà.

Hãng Kapal haok negar Vietnam Airlines birau brei thau, meng harei 3 bilan 3, Vietnam Airlines meda peih veik jalan par TPHCM saong Vân Đồn (Quảng Ninh) hadei di sa tukvak padeih kayua jit Covid-19. Bruk peih veik jalan par meng tỉnh Quảng Ninh kayua urak ini pacang hu jit ruak Covid-19 dalam tỉnh, Mblang kapal haok Dunya Vân Đồn hu salamat saong peih gilac veik. Meng harei 3-3 tal harei 17 bilan 3, Vietnam Airlines peih sa mbang di harei But dalam sa adit. Meng harei 18 bilan 3 mbiah tal harei 31 bilan 12, hãng peih 3 mbang dalam sa adit di dom harei But, Suk saong Adit.

Jabat Cảnh sát pasang iek di mintri Công an bahrau ba tabiak bruk khởi tố bị can, pasang iek saong pacang cakak 11 urang dahlau deih lac urang jaka Sở Y tế Cần Thơ piah duah thau ka bruk "ngak cung adat ka bruk to yaom ba tal khat lahik trak" rahtabiak di Sở Y tế Cần Thơ saong dom kapul pambuak tal. Dalam 6urang njauk cap khik, hu Bùi Thị Lệ Phi, dahlau daih ngak Giám đốc Sở Y tế Cần Thơ.

Hadei di 2 bilan tui iek, kapol urang jakar gah khik iek darak apsar haong công an chap mek hu bruk pajeng ba dom janih akok dreih yau sâm Ngọc Linh hu padauk dalam dom thùng bingu phong lan dahlau di tuk hu mbat angan sâm Ngọc Linh tame piah pablei ka urang pandar. Sâm Ngọc Linh hu iew lac “Pandap negar” di Việt Nam, tamuh di bhum ceik glaong di Kon Tum saong Quảng Nam. Sâm Ngọc Linh biak hu yaom, yaok kilo yaom mneg yaok pluh tal sa rituh trieu đồng. Tukvak tapa, biak rilo urang pabei pambak tame angan je nan piah ngak pandap ja, pandap mblak tui piah pablei ngak jhak tal angan je sâm Ngọc Linh Kon Tum.

Harei 1/3, Philippines peih bruk klauk jru vaccine COVID-19 hadei di tuk taduan lô vaccine COVID-19 camriep meng Trung Quốc. Mbang klauk jru COVID-19 hu cang maong di Philippines hu peih tabiak di 6 labik di rajaei saong sa sang iek ruak kanja. Tổng thống Philippines, Rodrigo Duterte brei mboh hatai chreih chrai lac, Philippines meda jayah dalam bruk mesuh pacang jit praong ngan haong bruk hu 600.000 mbang vaccine Sinovac camriep saong rajaei ni sanya lac peih ngak samar drak bruk klauk jru piah yam tapa bruk kan kandah ni. Ni lac danak dak klauk jru praong abih meng dahlau mai di Philippines.

Tapa duah thau hatai sahaneng birau abih brei mboh Tổng thống Joe Biden urakni hu 60% bhap bini Mỹ njauk hatai tui. Tui duah thau bahrau di abih, meng harei tagok rai mbiah tal ini hu 39% bhap bini Mỹ oh pachreih tui ong Biden. Tapa duah thau jeng brei mboh bruk karei gauk cambaic laic di cử tri dua đảng. Ralo cư tri đảng Dân chủ njauk hatai tui ong Biden, dalam tuk nan tok hu 31% cử tri đảng Cộng hòa tui dut saong 69% urang oh njauk hatai.

Harei 1-3, di labik đô thị pakat glaong Angkor Phnom Penh, di quận Sen Sok, ban ine Phnom Penh, Campuchia, rahtabiak sa bruk cap khik manuac ndok jien loh 1 triệu USD. Meng di tuk thau hu bruk ni, akaok Hiến binh ban ine Phnom Penh samar drak brei ka dom kapul ngak bruk nao tal labik. Mmboh kapul chức năng daokmai tal di gah langiu, dom urang cap khik salih tapa blah mek drap ar, pametai dua diuk pasang po sang, 2 urang ngak pah saong pandar phao cuh veik urang jakar. Kapul hiến binh Phnom Penh njauk cuh phao pametai chip 4 urang nan./.

Urang lang: Ái Nghiêm – Thu Thảo – 02/03 15:06:58