Tỉnh Quảng Nam hu labaih 100 drei kubao, limo njom ruak saluak cambuai tambaok akau

Pala birau 1 tỷ phun kayau hijao dalam 5 thun ngan saong kadha “Daong sa Viet Nam hijao” lac hatai sahneng mboh di Thủ tướng Rajaei hadei di dom mbang hijan ribuk saong glut jaleih taneh trak di bilan 9 saong bilan 10 di bhum kreh negar dalam thun 2020. Pachreih tui bruk Tết pala phun yaok thun jeng yau bruk ba tabiak di Thủ tướng, meng hadei di dom harei akaok thun anek sak kubao mbiah tal ini, bruk pala phun hu peih ngak di rilo bhum palei gam saong rilo janih phun, lagaih saong bhum taneh, caong khin ba mai rilo siam lagaih ka langik tasik jeng yau paglaong raidiuk di bhap bini dom tỉnh, ban. Urak ini hu 45 tĩnh, ban dalam taneh ia tut angan brei pala 1 tỷ phun hijao, gam saong dom sarak piah peih ngak siam danak dak nan.

Dah page ni 5/3, di jabat rajaei, Phó Thủ tướng Vũ Đức Đam, akaok mban pato tacei pakat negar pacang caga jit COVID-19 dang akaok bruk ginum biai di mban tacei pato piah ginum biai jalan pacang caga anak bruk njom mbak bahrau di jit. Dalam ginum biai, mban pato tacei hu pang pathau khan ka bruk jit ruak dalam negar, kuhria dahlau ka bruk jit ruak di dunya, ba tabiak bruk pasang iek prein dut iek, dom janih sinh phẩm dut iek daok hu pandar saong dom bruk pambuak tal peih bruk klauk vaccine pacang caga COVID-19.

Mbiah tal tukvak ini, tỉnh Quảng Nam hu labaih 100 drei kubao, limo njom ruak saluak cambuai tambaok akau di dom huyen Duy Xuyên, Đại Lộc saong ban Tam kỳ. Piah pacang caga jit ruak ka taphon athur, tỉnh Quảng Nam brei 7000 mbang vaccine saong jaik 100 lit jru ka dom palei ngak hacih labik raong. Tỉnh Quảng Nam tacei pato karja dom palei pathau khan ka urang raong glang paglaong akok sahaneng dalam bruk pacang caga jit. Tui nan, pakhang bruk tui iek, pasang iek catang bruk jit ruak, samar thau, langyah dom ruh jit ruak birau tamuh tabiak.

Yaom lac, kanja hu rilo sarak saong ba mai dom salih bahrau piah parilo manuac ngak gah y tế, min anak meta mboh lac, gah y tế, abih di nyu nan y tế bhum atah bayah jeng daok gaok rilo kan kandah dalam bruk patagok meng manuac tal pandap panda ba tal dom bruk daok kurang dalam iek glang prein yava bhap bini. Bruk kurang manuac ngak y tế saong menuac hu ilamo lac Bác sỹ di y tế cơ sở; menuac caga piah ngak y tế jeng daok lac bruk njauk duh hatai. Pagap yau di bhum taneran kraong Cửu Long saong Tây Nguyên, urang BS ka 10 ribau manuac lac takik di abih duk saong dalam negar.

Thanh tra Sở Y tế birau pambuak saong C.A TPHCM pasang iek saong hu mboh sa labik blaic raih ngak mekre lac labik padauk bruk ngak karei di labik 783, Trần Hưng Đạo, Phường 1, quận 5. Di tuk pasang iek, labik nan oh hu harak adat tut angan ngak mbang, oh hu Chứng chỉ ngak bruk, Harak adat ngak bruk. Abih di nyu nan lac, labik nan oh hu tuan bảng hiệu anak sang tui adat bo biển hiệu “Comeback Beauty” tok tuan di tal 1 labik hu duk bilik blaic raih. Bruk duah mboh labik blaic raih thẩm mỹ angan “Comeback Beauty” lac meng panuac khan di bhap bini. Kayua yau nan ye, Sở Y tế caong khin bhap bini brei thau veik saong khan ka Sở Y tế dom labik medil mboh ngak suan hukum piah urang jakar Sở sumu pacang saong langyah.

Dalam mbang ginum biai di dah page ni 5/3, kapul urang ilamu daong bruk ka rajaei Nhật Bản njauk hatai haong jalan ngak di rajaei brei dui atah jang 2 adit bruk samar drah kayua jit COVID-19 di ban ine Tokyo saong 3 tỉnh jaik taphia. Akaok mintri Tái thiết Kinh tế Yasutoshi Nishimura, urang iek gah bruk pacang caga jit COVID-19 di rajaei hu langyah ka makna rajaei brei dui atah bruk samar drak tal harei 21/3 lac kayua bruk trun dom urang njom bahrau di ban ine Tokyo daok suai damuai veik, meda lac padeih trun atau tagok veik dalam dom harei jaik di ni.

Meng tuk ong Joe Biden tagok ngak Tổng thống, dom kapal haok do thám di Mỹ hu peih 75 mbang par di tasik Biển Đông dalam bilan 2, lac bruk par rilo oh oh ka bhian mboh. Washington brei panuac ndem puac cagar veik dom bruk ngak po oh njauk di Bắc Kinh di Biển Đông, lac Trung Quốc khin mek Biển Đông ngak labik quân sự saong ngak kandah tal dom taneh ia jaik taphia yau Viet Nam, Philippines saong Malaysia. Urang pasang iek mboh lac karja di Tổng thống Biden oh pataom sit bruk cagar veik dom panuac oh njauk di Bắc Kinh ka quyền ngak po di tasik Biển Đông.

Cục khik ramik pandap panda Y tế pakat negar Trung Quốc (NMPA) harei kabroi brei thau lac hu brei ka 3 pandap pandap y học meng kan di Trung Quốc hu adat pablei piah taong ruak COVID-19. Dom pandap nan jeng lac jru phun kayau hu ngak jeng asar saong hu asal meng dom jru klak meng kan di Trung Hoa. Nyu hu cak rok patagok meng dom jalan taong ruak y học meng kan jang yau hu pandar meng aval dalam mbang tamuh jit di Hồ Bắc, Trung Quốc. Jeng tui panuac khan brei thau nan, klau pandap bahrau hu brei adat lac “asar ngak hacih saong ngak sa-at phổi”, “asar giải độc saong khử ẩm” haong “asar pambak praong saong giải độc phổi". Bruk salamat di y học meng kan dalam taong rauk COVID-19 tal urak ni jeng daok kamlah gauk di Trung Quốc, labik hu manuac pandar saong dom urang daok medil./.

Urang lang: Thu Thảo – Ái Nghiêm – 05/03 15:55:38