Huyện Hóc Môn, bal raya Hồ Chí Minh bahrau brei thau lac ngak hu blaoh bruk ba aia hacih mai ka 100% baoh sang dalam huyện. Dua huyện kan kandah abih di bal raya nan lac Củ Chi saong Bình Chánh jeng daok ngak ka salah hồ sơ piah tabiak panuac lac taong abih baoh sang hu pandar aia hacih. Tết ini, bhap bani dom quận, huyện bhum tapen bal raya oh daok kuhri kuhria bruk kurang aia pandar yau dom thun dahlau.

     Dom harei ini, bhap bani xã Thới Tam Thôn, huyện Hóc Môn biak bui sambai tuk aia meng sang mac aia Kênh Đông hu ba mai tal yaok baoh sang. Yau nan lac meng ini nao, mikva oh daok kuhri kuhria njauk pandar aia bingun khoan njaom lakhun piah menei, papah, atau nao blei yaok bình aia suối piah mbang menyum yau dahlau diah. Piah ba hu aia hacih ka taong abih labaih 86.400 baoh sang bhap bani, huyện Hóc Môn hu jak ba ralo gah saong pandar ralo jalan ngak, dalam nan hu bruk xã hội hóa. Ta-eng thun ini, huyện ini hu ngak salah blaoh bruk ba aia hacih ka jaik 48.300 baoh sang. Ong Huỳnh Văn Chang, urang daok pak ấp Trung Đông, xã Thới Tam Thôn, huyện Hóc Môn lac: Ini lac aia hacih ka bhap bani mbang menyum, menei, papah. Dahlau diah aia di ini ô nhiễm trak, hu phèn, hu chì. Urak ini hu aia hacih ye drei pandar mboh sahanang hatai.

       Kadha bui sambai di ong Chang jeng lac kadha bui sambai di jaik 100.000 baoh sang di dom quận, huyện bhum tapen Bal raya Hồ Chí Minh hu pandar aia hacih dalam thun ini, tuk halau aia di sa bal praong abih dalam negar ini daok njauk ô nhiễm trak. Tapa pasang iek di gah y tế bal raya, dalam labaih 100 mẫu aia kraong, ribaong saong aia bingun khoan daok hu dom baoh sang pandar pak quận 9, quận Thủ Đức saong dom huyện Nhà Bè, Bình Chánh, Hóc Môn, Củ Chi jeng njauk njaom  sinh vật  biak glaong. Dalam labaih 97% mẫu aia ngầm di huyện Hóc Môn hu hàm lượng Amoni glaong jang tanut brei adat 16,4 mbang; độ PH biar jang tanut brei adat tal 3,75 mbang;  hàm lượng sắt glaong jang tanut brei adat tal 60 mbang. Meyah pandar aia ngầm di dom labik angaok nan piah mbang menyum, menei ye meda ba tal ruak ung thư saong kurang ô xy dalam darah. Kayua yau nan ye, bruk ba aia hacih mai tal bhap bani hu karja dom huyện Hóc Môn, Củ Chi, Bình Chánh thau lac bruk ngak prong. Ong Nguyễn Văn Cảm, Phaok Phòng Kinh tế huyện Củ Chi brei thau: Khaol dahlak peih bruk tacei pato, ba bhap bini, tổ trưởng, trưởng ấp saong urang jakar xã nao tal sang mac aia Kênh Đông, labik ba brei aia hacih, piah ka mikva hu mboh, hu pang; piah khang hatai jia saong pandar aia ini.

         Dalam 2 thun 2015-2016, bal raya hu buh labaih 20 ribau tỷ đồng piah padang ngak sang mac aia Thủ Đức 3, Sang mac aia Tân Hiệp 2, Sang máy aia Kênh Đông, pasiam dom sang mac aia dalam Pasak aia hacih saong vệ sinh môi trường palei pala piah patagok công suất ba brei aia di bal raya meng 1 triệu 700 ribau mét khối aia sa harei melam tagok tal 2 triệu 570 ribau mét khối aia sa harei melam. Bruk ngak nan hu ba mai siam mekre tuk hu jang labaih 18% baoh sang dalam bal raya hu pandar aia hacih. Ong Bùi Thanh Giang, Phaok Tổng Giám đốc Tổng Công ty Cấp nước Sài Gòn (Sawaco) brei thau: Khaol dahlak kham merat tal dahlau thun 2019 meda ngak salah blaoh bruk pagam đồng hồ aia tal yaok khách hàng. Dalam tukvak meng ini tal thun 2019 ye khaol dahlak meda ba brei aia hacih ka bhap bani pandar tui ralo jalan ngak yau: pagam đồng hồ tổng ka sa cụm khách hàng gam pandar haong gauk; atau meda ba caik dom baoh kavei bồn padang aia hacih ka bhap bani daok jaik nan mai mek aia hacih nao sang pandar.

      Bruk ba brei aia hacih di Bal raya Hồ Chí Minh daok gaok kan kandah tuk dua kraong Sài Gòn saong Đồng Nai njauk njaom mbak saong takik nao dalam bilan thu. Di dom xã bhum atah bayah, labik prong dalam dom huyện Cần Giờ, Bình Chánh, Củ Chi, Nhà Bè, menuac sia takik, daok atah di gauk ngak ka bruk ba aia hacih mai tal yaok baoh sang gaok ralo kan kandah. Piah pasiam veik bruk ini, ralo xã hu ceik bồn padang aia ka mikva. Yau nan min, kayua ralo mikva oh bhian randap pandar aia mac nan ye oh mek aia meng dom bồn nan nao pandar. Ong Lê Văn Khoa, Phaok Akaok Ủy ban bhap bani bal raya Hồ Chí Minh brei thau: Salih bruk bhian randap di mikva daok pandar aia bingun khoan meng kan mai tapa pandar aia mac ye njauk hu tukvak. Khaol drei patagok bruk pathau khan. Brei thau lac, meyaih pandar aia hacih ye siam ka pren yava, dua tra lac daong khik caga alam môi trường, kayua lac aia khoan lavik harei meda ngak glut jaleih dom tal taneh, oh ka ndom tal aia khoan meda njauk ô nhiễm. 

        Bal raya Hồ Chí Minh daok padang ngak Sang mac aia Kênh Đông 2 saong sang mac aia Thủ Đức 4 piah ba tame pandar dalam thun 2018, patagok abih tih công suất ba aia di bal raya tal 2,9 triệu mét khối sa harei melam. Dom gah cấp aia kham merat tal thun 2019 patagok dom jalan ống pakat 2, pakat 3 tal 1.551 km. Dalam tuk kadung jien karja takik, Ủy ban bhap bani Bal raya Hồ Chí Minh tacei pato dom gah chức năng jhul pakhang bruk xã hội hóa, peih talaih dom kan kandah piah pabak ginup aia hacih ka bhap bani./.