Dalam rilo thun tapa, Sang Adaoh Hat Boi Ban raya Ho Chi Minh hu khik tani tanat dom mbang adaoh yaok adit di dom labik bhap bini rahra di ban raya, gam haong nan pambuak pagam haong dom sang bac, ba Adaoh Boi mai tal jaik jang haong urang sit thun umo.

Yaok mbang adaoh, yaom lac meda tok lac dom banah dalam sa kadha, min tuk halei jeng hu dom urang di sang adaoh veik rilo mbang, srap gap javap calei dom sua tangi di urang pang.

Kayua Meng dom hatai tian yau nan oh lac dom urang sit thun umo bo daok lac rahra dalam ban jeng chreih takre jang haong janih adaoh bhap bini ini.

Sa-ai kamei Nguyễn Công Dung, umo 38 thun, mbang akaok meti hu maong yau sa var adaoh hat boi di jalan tapuk Nguyễn Văn Bình, ndom meyai lac yaom lac hu pang urang ndom rilo ka adaoh boi-janih nghe thuat pagam haong cai luong, min ini lac mbang akaok meti hu maong iek tapak saong mboh biak chreih takre:

“Mbang akaok meti dalam raidiuk hu duah thau ka janih adaoh ini. Urak ini hu meta maong bahrau, bruk duah thau bahrau. Dahlau nan, hu maong kadha hu pambuak Hai Ba Trung, dahlak biak chreih takre haong sap hagar, ragam phling saong bruk parang iek karei di Adaoh hat Boi".

Ong Nguyễn Thanh Bình, Akaok bilik Kapul daoh tamia iek, Sang adaoh Seni Nghe thuat Adaoh hat Boi Ban raya Ho Chi Minh, brei thau ka bruk mek hu lagaih di sang adaoh: Yaok thun, Sang adaoh salah blaoh meng 150 tal 160 mbang adaoh parang iek, dalam nan hu dom danak dak hu daong jien saong dom mbang adaoh ma-in iek hu mek tame jien, kuhria rah tapa labaih 2 harei hu sa mbang adaoh parang iek.

Piah duh ka rilo tuai damuai dalam saong langiu negar, sang adaoh bhian peih mbang adaoh parang iek di puac adit di dom labik bhap bini rahra yau ye: Kalan Lăng Lê Văn Duyệt saong labik Kalan Po Hung (daok dalam Gilang khik drap ar Sajarah, dalam mblang Thao Cam Vien Sai Gon).

Langiu di nan, sang adaoh jeng hu nao duh dom raya adat kỳ yên di dom danaok palei saong dom danak dak adaoh hu pambuak tal asal kadha bac magru di dom inem mek sajarah:

"Tapa danak dak adaoh tamia iek di labik bhap bini, sang adaoh caong khin pambak tabiak seni nghe thuat Adaoh Boi bhap bini di bangsa negar, tapa nan khik ramik saong patagok hu ilamo siam gheih karei di nghe thuat Adaoh Boi. Ini jeng lac bruk piah yaih khan ka tuai damuai dalam saong langiu negar meng nan bo mai tal sang adaoh, atau mai iek dom danak dak pablei harak ve di sang adaoh dalam harei hadei.”

Janih seni nghe thuat bhap bini brei hu khik ramik saong patagok. Min dom urang ngak bruk ini jeng brei ka hu meta maong bahrau, salih bahrau piah njauk lagaih haong hatai caong di rahra dalam jaman ini.

Tui iek sa danak dak yaih khan nghe thuat adaoh hat boi di pasak ban raya, Lâm Hoàng Xuân Nghi, sinh vien university Kinh te Ban raya Ho chi Minh brei thau, dom banah dalam kadha adaoh boi jeng pagam haong sajarah padang saong khik ramik taneh ia di mukkei drei.

Xuân Nghi ralo mai daok iek abih banah adaoh parang iek, cih gilac thaik thaot, mbaok meta di dom urang dalam var adaoh parang iek nan kayua biak chreih takre.

Langiu di nan, Xuân Nghi jeng brei thau lac, piah janih bhap bini ini dui pachreih veik rilo urang, adaoh boi meda pambuak haong dom janih, asal kadha bahrau piah dui pachreih urang sit thun umo mai iek, gaok mai yaih khan hu di angaok dom nen tang mang xa hoi tapa dom urang paneh asal kadha:

"Meyah salih bahrau jang, rilo jang ye brei dui pachreih hu rilo bruk sangka jang. Dom ayut sit thun umo meng nan meda thau hu thau dom yaom kaom siam gheih di ilamo taneh ia drei.”

Tui ong Nguyễn Thanh Bình, piah dui pachreih saong daong rahra dunya mbuan maong iek jang, Sang Adaoh daok ngak danak dak ruah dom banah mboh takre abih ka nghe thuat hoa trang saong tamia, patakik jang panuac ndom, taong tame khang ka thaik thaot, daong tuai damuai jeng thau hu ka asal kadha.

Langiu jalan yaih khan thaik thaot, sang adaoh padang dom danak dak jirah rivang ba drei tame biak karei, yau photo tour atau dom tuor ba drei tame adaoh boi dui atah labaih 30 - 60 minit patui hatai caong di tuai damuai, meda pandar 2 sap bahsa (yau sap Viet – Anh atau Viet – Cina):

“Format ini daong tuai damuai hu ba drei tame, duah thau taom gaok dom urang nghe si meng luac jalan ngak jeng menuac urang dalam asal kadha tal tuk salah blaoh saong hu ba drei tame dom bruk ngak, panuac ndom meng nan mboh hu seni nghe thuat Adaoh hat Boi.”

Dom kham merat oh glaih glar ini hu taduan njauk lagaih. Bahrau blaoh, Sang Adaoh Seni Nghe thuat Adaoh hat Boi ban raya Ho Chi Minh hu hadah mbaok meta tuk hu So Ilamo saing Pahat padhih ban raya Ho Chi Minh pok meyaom lac 1 dalam 8 kapul hu rilo rik daong dalam danak dak kacah anit ranam taneh ia negar saong jhul tagok bruk cakrok patagok di gah Ilamo saong Pahat padih Ban raya.

Ini lac bruk brei mboh ka luac jalan ngak oh padeih, daong prein piah dom urang nghe si hu bruk pambak praong ilamo bangsa./.