Tuk 9 page harei adit, di Kalan Ong Lê Văn Duyệt, arthak gindang yaok harei urak ini sameng tagok chreih chrai di sap hagar, sap kadait.

Sa mblang adaoh parang iek hu brei padang tagok, labik dom urang Adaoh hat boi cuk khan aw saong mat na rilo sambo bar daok srap gap ka var adaoh oh mek jien piah duh ka rahra.

Ala di binguk phun, tuai damuai rilo thun umo, meng urang taha tal dom baoh sang urang negar langiu, jeng chreih chrai cang maong.

Dalam dom urang iek bhian randap krein, hu sa-ai kamei Minh Thảo saong anek di sa-ai umo 5 thun. Sa-ai khan lac, anek thau tal Adaoh hat Boi dalam sa mbang hu nao me-in kalan Ong. Meng tuk nan, dua anek maik jeng “urang chreih takre”, tui iek tukvak adaoh parang iek yaok adit oh klak tuk halei.

Oh lac sa janih iek, anek dahlak daok ba drei tame dom danak dak yau bac pasram dom ragam tamia, cih mbaok mat na.

Sa-ai Thao khan brei thau, kayua bruk hadah krah di danak dak hu pabam tame hatai anek dahlak sa hatai anit ranam biak praong haong seni nghe thuat bangsa negar:

"Dahlak mboh ini lac sa danak dak biak siam saong hadah krah, ba sajarah, ilamo nghe thuat mai tal jaik jang haong grauk urang, oh lac urang dam dara. Bruk pambuak haong dom ayut ndoan vien dam dara dalam dom var adaoh parang iek dahlau diah lac sa bruk biak njauk daong prein.”

Gah lakuk mblang adaoh, nghe si Kiều My, urang hu 20 thun pagam haong bruk adaoh Hat Boi, samar chip uak mbaok hadei tuk adaoh salah blaoh banah kadha “Xử bá đao Từ Hải thọ”. Sa-ai brei thau, yaok var adaoh parang iek, dom urang nghe si brei mai tal drah 1-2 tuk piah ta-eng cih mbaok meta drei saong srap gap.

Yaom lac mbalng adaoh di langiu langik, oh hu gom hadah, min meng bruk hu mbaok di rahra lac sa kaya alin praong makna abih.

Mata maong di dom anek ranaih, dom pah tangin di rahra lac sa bruk daong prein biak praong prang, daong sa-ai saong dom adei sa-ai anit ranam saong kham merat khik apui ka seni nghe bhap bini. Nghe si Kiều My drut druai lac:

"Tuk mboh rahra mai iek saong pah tangin, urang nghe si mboh yau hu daong prein, bruk nan ngak dahlak anit nghe thuat bhap bini rilo jang, khin hu ngak veik rilo jang, patagok jang piah nyu dak harei dak hu nao tal jaik jang haong bol bhap.”

Danak dak adaoh parang iek di dom inem mek hu Sang adaoh nghe thuat Adaoh Hat Boi Ban raya Ho Chi Minh khik tani tanat labaih 3 thun tapa.

Tui ong Nguyễn Thanh Bình, Akaok jabat Peih bruk Adaoh parang iek, Sang adaoh Seni Nghe thuat Adaoh Boi Ban raya Ho Chi Minh, ini lac sa jalan ngak “pagam”: Gam yaih khan ilamo siam gheih di dom inem mek sajarah, gam brei kein lagaih piah Adaoh Hat Boi nao tal bhap bini lagaih di abih.

Yaok adit, dom banah kadha danei angan di sajarah, bhap bini… hu adaoh di dua labik lac Kalan Ong Lê Văn Duyệt saong Gilang Khik Drap Ar Sajarah Ban raya Ho Chi Minh.

Danak dak oh lac hu adaoh parang iek, bo daok pagam banah yaih khan ka sajarah, hagait karei di Adaoh Boi saong dom bruk yau rahra hu cih mat na, rahra hu adaoh hat boi… Ong Nguyễn Thanh Bình brei thau:

“Sa bruk mboh bui sambai lac dom urang iek lac urang sit thun umo, daok iek meng akaok tal puac abih danak dak. Khol dahlak hulin tok hu dom panuac ndom meyai biak siam meng danak dak, dom urang nan mai oh lac piah iek bo daok hu ba drei tame saong meng bruk nan ba mai bruk pambuak di seni nghe thuat meng kal mai saong rairah jaman urak ini.”

Kham marat biak praong hu makna ini oh lac mai meng Sang Adaoh hat Boi. Dom labik karei yau ye Sang adaoh Cai Luong Trần Hữu Trang jeng bhian peih bruk adaoh parang iek di dom labik bhap bini rahra, daong ngak jeng sa prein diuk bahrau ka seni nghe thuat bhap bini dalam ban raya hadah krah bahrau./.