Yaok thun, hadei di tuk tal harei Kate di angaok binong tamat blaoh, but pajaih baoh sang Po Gru Đổng Bạ jeng peih ngak adat duh paling lisei piah ieu da-a mukkei, ong amuk mei mai pataom mbaok haong anek taco. Taong abih anek taco dalam but pajaih jeng jum tangin rik daong, srap gap kaya paling saong gaong haong gauk ngak dom kaya mbang bhap bini pok paling mukkei, brei mboh hatai thau phol thau dhar saong hatai gul pataom di but pajaih. Po Gru Đổng Bạ - palei Mblang Kacak, xa Phuoc Hau ndom meyai lac:

“Yaok thun tame bilan 7 tui saka Cam hu peih harei Kate blaoh ye sang Po Adhia ngak adat duh paling lisei 15 salao."

Dalam adat duh paling lisei di baoh sang po gru, kaya paling tuk halei jeng hu caga tani tanat yau tapei nung, Sakaya, Ginraong Laya, tapei bilik, patei saong ahaar yamen. Dom kaya paling hu parang di angaok salao takai saong caik di angaok cieu. Tuk ngak adat, po gru daok payeng mbaok nao gah Pur, anak lac dom salao padang dom kaya paling. Ong Quảng Đại Hùng- Palei Baoh Dana, xa Phước Hậu brei thau: Tui bruk sahaneng di urang Cam, gah pur lac labik di mukkei, ong amuk mei mai pataom mbaok haong anek taco, raok thun bahrau dalam arthak la-I la-an di baoh sang.

“Tuk peih ngak blaoh harei Kate angaok bimong ye harei hadei dom po Adhia brei ngak adat duh paling lisei di sang.”

Daok tui Paok Po Gru Lưu Sanh Thanh – Palei Padra, xa Phước Hữu ye adat duh paling lisei, likau bruk salamat, klak tapa dom bruk chung dalam raidiuk, bayar abih sraiy jangaiy. Adat duh paling lisei tamat blaoh meng panuac kamaon likau salamat tal grauk urang.

“Hadei ngak Kate angaok bimong blaoh ye Po Adhia peih adat duh paling lisei.”

Lambaok ka but pajaih dalam gauk, po gru ieu da-a mukkei, ong amuk mei mai mbang dom kaya paling kayua anek taco paling tagok, likau mukkei sraong daong ka abih urang hu ginup bak prein yava, ngak mbang lagaih, anek taco nao bac jak jeng, baoh sang saong palei pala tuk halei jeng chreih bui. Dalam adat duh paling lisei, urang Cam payua caong takre ka sa raidiuk salamat, ginup bak saong haniem phol. Hadei adat duh paling, abih urang daok gilac haong gauk taphia salao lisei baoh sang, klah rabha bruk bui sambai, raok salam sa bilan Kate biak patuah jamo saong siam mekre salamat./.