Jeng ye dom xã daok di bhum taneh tinh An Giang, hadei di 2 bilan, karja xa Ô Lâm tame bruk karo, jak jeng, truh gah, bak hatai bhap bini rahra. Nyu brei thau lac mboh siam makre dalam bruk ngak daong bhap bini rahra pakar palei di urang jakar, urang pan akaok xa, ngak tui hatai chreih bahrau, mek bruk jak jeng daong bhap bini rahra yau ye gai dut siam makre, tapa di nan ngak siam dalam bruk ngak bahrau brei ka karja nagar, daong ba karja jaik taphia bhap bini rahra jang. Sa-ai Tô Long Sang mai Pasak ngak bruk nagar xa Ô Lâm, tinh An Giang piah ngak harak pasalih harak gar brei ka taneh khan brei thau lac:

“Ini lac ngak harak hadiah brei alin. Taneh ngak hamu apuh di ayah ama kadahlak hulin, salih tapa ka dahlak dang angan. Drei mai tal ini meng tuk 3, daok cang urang jakar iek harak, mboh di ini ngak bruk njuel njac saong drah samar, jaik si blaoh paje. Urang jakar di ini daong tacei abih hatai, pato kaot cih, patao sap janih, kurang hagait brei pabak brei ganap sampurana”. 

Mada mboh ralo baoh siam; min jeng hu daok dom baoh kan kandah, susah yau ye dom janih bruk kada ndap nda brei ngak bruk nyu klak; majam jamraik ngak kong gah khao tin, jalan internet oh karo; majam gah internet sa pabah mbang pambuak bruk karja nagar bhian klaoh padam… ngak cuang kandah tal bruk lek taka hóa jeng ye ramik harak gar online. Sa-ai Naéng Sa Vết, urang ngak mbang blei salih, Pasak ngak bruk nagar xa Ô Lâm, tinh An Giang brei tahu lac:

“Meng dalau dahlak hulin pan bruk taneh riya di dalam xa, ralo abih di nyu bruk nao langiu, urak ini jao bruk iek glang harak gar brei ka bhap bini rahra. Brei ka bruk ngak tuk camreip daok mboh kan bahrau kayau ngak tui ndien tu, min hadei di nan jeng mboh jeng karo. Ralo abih dalam nan ieu lac urang Khmer, tukik thau ralo gah harak gar, tuk mikva mai tal ini khol dahlak hulin pato mboh njauk hatai, njauk harak gar, njauk mangaok mala oh abih tukvak”.

Tui muk Neáng Sâm Bô, Phaok Akaok UB Bhap bini xa Ô Lâm lac mboh meng anak daok ralo kan kandah. Sa di dalam nan ieu lac manuac urang ngak bruk daok kurang ralo, jamraik mac moc jeng oh ka tame gauk; xa ye hu ralo urang bangsa Khmer, ilamu daok kurang, dalam nan hu bruk taduan rahra bhap bini ngak tui kong nghe khau tin, internet… Muk Neáng Sâm Bô lac, meng anak, xa caik hatai brei ka ndap nda brei ka bruk ngak, caik hatai brei bac magru, ilamu bruk ngak ngak ndom mayai nao mai mayao mayit piah ka urang jakar, urang pan bruk karja daong bruk taneh ia nagar ka siam makre. Dalam nan caik hatai tame bruk dakvah, dalam nan hu urang bangsa Khmer, tame bruk tahu bruk ngak bruk meng online.

“Xa daok dak brei mek tanut ngak lek taka hu meng 80% ba tagok. Brei ka gah manuac rang ngak bruk, xa daok pasiam patapak urang ngak jakar piah bruk ngak brei karo tani tanat njauk sinyia brei ka rahra. Dalau di ini, 1 phon di dalam xa Ô Lâm meng hu bruk taduon harak gar di palei ap, mboh bruk ngak siam gheih, xa mada brei patui ngak jeng ye brei peih praong. Xa jeng brei pandar phon di urang jakar ap piah taduon bruk, daong bruk brei ka harak gar online… piah daong ka rahra bhap bini siam lagaih di abih”.

Muk Neáng Sâm Bô brei thau lac, piah ngak dom bruk daok kan kandah, bruk kurang di bhum palei tuk masa ini, khin dom urang jakar urang pan akaok kham marat bac magru bruk ngak, salih barau manuk maneng bruk hit ka siam makre jang, mek bruk njauk hatai di bhap bini rahra yau ye gai dut njauk chung siam lagaih, patui di nan padang karja barau jak jeng karo daong bhap bini rahra./.