Ong Nguyễn Văn Quỳnh, Yam ndok HTX Thiên Phú Hòa, xa Tân Hội, tinh An Giang brei thau, 2 thun tapa, ong saong dom urang karei dalam HTX hu mbaok tame Danak dak “Patagok karo kajap 1 trieu ha pala padai asar siam, tathuak nerak biar pagam haong cakrok patagok hijao bhum taneran kraong Cuu Long”, mbang akaok meti ba mai siam lagaih. Ong Quỳnh ndo meyai lac: “Bilan padai thu dong 2024 tal bilan dong xuan 2024-2025 saong bilan he thu 2025, tapa 3 bilan ngak ye mikva taong yaom lac patrun hu pajaih, brei mboh ka pajaih siam jang, ba tabiak mblang hamu ye siam lagaih, takik halak haling jang, phun hu khang kajap takik jaleih saong pablei hu yaom glaong jang… Yau nan ye ka sa lac patakik hu jien buh tabiak, ka dua lac tagok jien laba ka mikva, ka klau lac pambuak hu chuoi padai brah, ka pak lac daong mikva hu pasram magru, khan brei thau ka dom kein lagaih, kan kandah”.

Tui ong Nguyễn Thanh Hiệp, Phaok Yam ndok So Ngak nong saong Alam langik tinh An Giang, tinh hu peih 58 bruk ngak taong abih mbaok taneh labaih 20.000 ha brei siam lagaih, jak ba hu bruk ba drei tame di dom urang dalam chuoi ngak padai brah. Bruk daong patrun jien kuhria rah tapa hu labaih 4 trieu dong/ha, jien laba tagok hu meng 5 - 8 trieu dong/ha dut haong jalan pala klak, bruk ini daong takik tathuak nerak labaih 8 tan arthak CO2 samu haong 1 ha… Ong Nguyễn Thanh Hiệp brei thau yau nan.

“Meng taneh labaih 20 ribau ha pala tui yaom kaom, lagaih haong bruk langik salih karei, bilan anak tal An Giang brei tagok dua mbang lac meng 35-40 ribau ha. Saong tukvak, kham merat tagok 100 ribau ha ba tagok.

Yaom lac tukvak tapa, gah ngak nong di An Giang hu jalan patagok khang kajap, dalam nan hu gah padai brah; Min dalam bruk urak ini An Giang jeng gaok rilo kan kandah yau ye: Langik salih karei dak harei dak rah tabiak rilo, jien buh tabiak ngak tagok samar drah jang yaom pablei padai ngak ka jien laba di rahra oh lagaih…Bruk pandar ilamo ngak kong glaong oh ka biak hu samu, pambuak chuoi daok gap mbiah saong kurang dom gah ngak mbang pablei salih hu ginup khang piah ba jalan padang angan je brah tathuak nerak biar di tinh. Ong Hồ Văn Mừng, Akaok UB Bhap bini tinh An Giang brei thau: “Dalam co cau kinh te di tinh: gah ngak nong, ngak glai, ngak kaya ikan hadang dalam ia biak praong; dalam tuk nan gah ngak nong ye cakrok oh meda glaong. An Giang gam haong dalam negar ngak bruk biak praong glaong nan lac an ninh kaya mbang, nan lac khik tani tanat taneh ngak padai lagaih, min jeng brei caik ngak dahlau ka bruk patakik taneh pala padai, tagok tanut ka taneh ngak kong tagok piah patagok kinh te – xa hoi di tinh”.

Tui jalan ngak ini, An Giang pataom tame dui pachreih buh jien tame bruk ngak kong ngak ndap nda kaya, pagam khang kajap haong bhum pandap tamo pataom, ngak jeng chuoi ngak mbang kandauk. Jhuk samar salah blaoh ha tang duh ka bruk ngak mbang ngak ndap nda kaya, meng dom labik ngak kong, bhum ngak kong tal bhum pandap tamo. Rilo meng lac peih Danak dak Patagok karo kajap 1 trieu ha padai asar siam, tathuak nerak biar pagam haong cakrok patagok hijao bhum taneran kraong Cuu Long, pamaong tal thun 2030 hu labaih 351.000 ha. Gam haong di nan pandar khang kajap ilamo kong nghe lek taka so saong ilamo kong nghe glaong dalam bruk ngak mbang, ngak jeng bhum pandap tamo karo kajap, pambuak ngak mbang tui chuoi yaom kaom, pamaong tal darak pasar dalam dunya./.