Sang amuk Mai Thị Tuyết hu daok dang saong ngak mbang di bhum taneh Phú Tân, huyen Định Quán dahlau diah, (ini daok di xa Phú Vinh) labaih 20 thun. Hadar tal dom harei akaok meti, amuk Tuyết khan lac rahra tuk nan daok lapih daok takik, jalan mbak gluh baok, bruk nao mai biak kan kandah.

Nao tagok meng dua plak tangin saoh, diuk pasang amuk Tuyết ndam gam haong bruk ngak nong. Mai meng bruk kham merat saong thau kali kalih patak pataom, tal ini jien padai kaya ngui di dalam baoh sang amuk hu karo kajap, hu mbang hu ngui. Labik bein praong 10.000 m² hu 1.000 gok phun kophi brei jien mek tame kuhria rah tapa jaik 2 tan/thun, ba mai jien mek tame labaih 200 trieu ndong. Oh sa janih ieu lac yau nan, amuk Tuyết daok raong sa kapol pabui labaih 100 drei tui jalan raong dalam sang, ba mai kein laba yaok rituh trieu dong yaok mbang hu yaom.

 Maong mboh bruk salih bahrau di bhum palei, meng sa bhum taneh kan kathaot ini jeng hu jalan mbak hacih sa-at, sang bac, balai y te hu ginup, amuk Tuyết oh padauk hu bruk bui sambai di drei. Hadei bruk pagam jabat karja, amuk caong ka raidiuk di rahra dak harei dak siam lagaih jang:

"Caong khin di dahlak yau habar hu brei kein lagaih ka rahra daok pak halei jeng mbuan nao tal sang bac, sang iek ruak, pagap yau ye harak bao hiem meda hu ba nao tal labik karei halei jeng hu brei taduon ka rahra.”

Ong Nguyễn Thiện Nhân jeng biak chreih chrai tuk khan ka bruk patagok di bhum palei. Ong brei thau lac, dahlau tuk pagam, xa Phú Vinh lac sa di dalam klau xa daok di Định Quán. Thun 2019, xa mek hu angan palei pala ngak nong bahrau tui pakat paglaong saong tal thun 2023, patui di nan daok mek hu angan palei pala bahrau brei yaih kieu mau. Rahra bhap bini palei daok hu mbang tui angan jak jeng hadei di dom thun kham merat. Ong Nhân hadar veik, Định Quán lac sa di dalam dom bhum atah bayah di Dong Nai, ngan haong kinh te hu makna lac bruk ngak nong. Bruk ngak ka ong Nhân takre abih lac bruk di 4/4 baoh sang bac dalam xa jeng mek hu tanut pakat negar, gam haong nan xa jeng mek hu tanut pakat negar ka gah y te. Bruk ini brei mboh bruk sangka iek praong di urang dang akaok tinh saong karja bhum palei ngan haong bruk patagok labik bhum palei, bhum ceik.

"Tuk bian halei urang bhum palei hu jien mek tame ye meng hu patagok dom gah kinh te, pablei salih… rah rah cakrok tagok. Nan lac bruk patagok hadei dom pluh thun taneh ia hu peih paha, harei ini jeng sa baoh xa hu rilo baoh jak jeng.”

Urak ini, hadei tuk pagam haong xa Phú Tân, xa Phú Vinh hu taneh jaik 70 km² saong rahra labaih 31.000 urang, rilo di dalam nan meng lac urang bangsa Lo. Gam saong bhum taneh hu kein lagaih ka bruk rah rivang main ieik sinh thai, xa daok hu rilo kein lagaih piah salih bahrau siam lagaih samar drah.

Ong Đào Văn Tuấn – Bi thu Ndang uy, Akaok HĐ Bhap bini xa Phu Vinh brei thau, tukvak mai meng anak tal, bhum palei brei pataom tame patagok bruk ngak nong karo kajap, ilamo ngak kong pakat glaong, pagam haong bruk padang angan je saong pambuak pablei taong abih ndap nda. Gam haong nan, xa brei mboh bruk rah rivang lac gah ngak kinh te hu makna bahrau, pataom tame jak ba dom gah daong prein piah pandar kein lagaih hu dahlau ini. Sa bruk hu makna karei lac pasiam karja saong salih lek taka so. Ong Tuấn ndom lac, jalan ngak lac padang sa Pasak Duh bruk karja bahrau, tantu cambaih laih piah duh ka rahra siam jang:

“Bruk ngak di Pasak duh bruk karja jeng khik kajap hu hatai caong di rahra. Dom harak gar hu langyah njauk tukvak, bruk su-uk javap calei, bayar bruk langyah blaoh jeng ngak njauk tui adat hukum. Tukvak anka tal, xa patui veik sangka buh jien tame piah Pasak duh bruk karja khik kajap ka gah ky thuat, ndap nda kaya, jalan papar piah duh hu siam abih ka rahra.”

Dom bruk jak jeng mek hu lac mai meng bruk daong prein, sa hatai di rahra saong karja xa Phú Vinh. Ini lac bruk karo kajap piah bhum palei patui bruk uak drei patagok, dui pachreih buh rilo jien tame, daong paglaong raidiuk rahra saong ngak brei gheih ghang brei ka mbaok meta di palei pala./.