Puac tuk di biar harei, tuk mikva nao apuh mai, dom urang dalam mbang ta-eng pasang iek di mbon palei Ea Bông, Phuong Buon Ma Thuot rabha jeng kapul sit nao tal yaok sang pathau khan ka harei palih ruah 15/3 anak tal. Asal kadha oh lac pathau khan ka tukvak, labik buh harak phieu blaoh daok langyah cambaih laih ka quyen, ka bruk di urang buh harak pilih ruah urang ganap ilamu tanut di urang lambaok vakil saong dom bruk njauk hu di Hukum Palih ruah. Amuk H Chuyên Ênuôl, Akaok mbon palei Ea Bông brei thau, bruk ngak ini lagaih tui raidiuk di rahra dalam mbon palei.

“Kayua mikva di ini rilo meng lac urang ngak nong, drei pathau khan ye njauk nao tuk biar harei, sa kapul drei nao labaih 5 atau 10 sang”.

Gam haong pathau khan tapak, bruk khan khau tin daok hu ngak dalam dom var taom mbaok bhap bini saong tapa dom kapul pambuak gauk dalam mbon palei. Piah khik kajap thei thei jeng thau hu ka asal kadha, bruk pathau khan jeng hu pasiam ka lagaih. Ong Y Sil Ênuôl, urang hu angan je dalam mbon palei Ea Bông brei thau, bruk pathau khan hu khan meng sap Viet saong sap Randaiy piah lagaih ka yaok urang.

“Pathau khan brei ka mikva meng sap Viet saong sap bangsa. Kayua ndom meng sap Viet abih gaok mai mikva oh thau tanat, tuk khan meng sap bangsa ye mikva thau tanat saong thau ka hatai caong takre piah palih ruah urang ka njauk”.

Lac sa urang tui agama di Phuong Ea Kao, amuk H Pliêr Niê Kđăm brei thau, khau tin ka bruk palih ruah jeng hu khan rilo dalam dom var taom mbaok di agama saong taom gaok urang buh phieu harak pilih ruah di bhum palei.

“Jeng hu dom mbang kapul pathau khan, taom gaok urang buh phieu harak pilih ruah di dalam dom mbon palei. Di dalam nhà thờ ye cha xứ jeng kakei lac urang tui agama tal harei nan brei nao palih ruah ginup”.

Linh muc Nguyễn Minh Hảo, Saik Quản xứ Giáo xứ Mẫu Tâm, jammaah Buon Me Thuot ndom mayai lac, yaok urang tui agama lac sa rahra bhap bini saong bruk bad rei tame palih ruah lac bruk njauk ngak ngan haong taneh ia.

“Dom agama jeng lac rahra blaoh kayua nan bo hatai rahra mboh biak bui sambai tuk hu sa mbang palih ruah bahrau. Dahlak hulin biak abih hatai tianba drei tame ngak ka njauk bruk di drei. Pak banah rahra brei ngak ka ganap sampurna abih, nan lac sa panuac kakei di jammaah Hội thánh.”

Di dom xa tapen negar, kayua taneh riya praong laneing lanoi, rahra rabha sit di rilo labik, bruk pathau khan hu peih ngak lagaih jang. Tui sa-ai Lang Thị Son, Akaok Uy mban Mat tran Negar Viet Nam xa Ia Lốp, urang jakar Mat tran pambuak gam haong akaok palei, urang hu angan je mai tal yaok kapul rahra, brei harak pathau khan, tacei ba mikva pasang duah harak angan urang buh phieu hu mbat taok.

“Xa Ia Lốp lac xa hu taneh praong laneing lanoi, rahra takik nan oh tok lac pathau khan di dom mbang nyaom pataom atau angaok majam papar sap di xa, blaoh daok brei harak nao tal yaok baoh sang rahra. Tal urak ini hu thau tanat khau tin ka bruk palih ruah anak tal”.

Harei 15/3 anak jaik tal, urang buh phieu harak pilih ruah hu mbaok tame palih ruah urang ka Quoc hoi mbang XVI saong urang ka Hoi dong Bhap bini dom pakat, tukvak thun 2026-2031. Bruk ba khau tin palih ruah nao tal yaok mbon palei, xứ đạo di Dak Lak daong khik kajap ka abih urang buh phieu thau ginup ka adat hukum ka palih ruah. Tapa nan, ngak ginup quyen saong bruk di rahra dalam danak dak praong di taneh ia negar./.