Piah duh ka bruk peih prong ngak mbang, kong ty TNHH Hyosung Viet Nam di Labik ngak kong Nhon Trach 5, xa Nhon Trach, tinh Dong Nai (dahlau diah dalam huyen Nhon Trach, tinh Dong Nai) caong khin palih ruah jaik 300 urang ngak. Piah ka bruk palih ruah mek hu baoh jeng siam mekre, oh sa janih brei padeih di dom jalan ngak meng kan, urang ngak mbang blei salih di ini daok peih ngak livestream angaok blah web piah langyah tapak dom cuang kandah saong taduan mek harak ba-ar likau bruk. Langiu yaom jien bilan saong sarak padeih padei tui adat, Hyosung daok hu radaih pajeng ba oh abih jien, suat mbang kreh ka saong dom bruk ma-in padhih brei ka urang ngak.

Kongti TNHH New Apparel Far Eastern Viet Nam, ngak gah jhik pet di jalan D1, labik ngak kong Bac Dong Phu, xa Dong Phu, tinh Dng Nai (dahlau diah dalam huyen Dong Phu, tinh Binh Phuoc) jeng daok pacok duah jaik 1.500 urang ngạ ka sang mac bahrau.

Yau nan min urak ini jabat ini tok palih ruah hu 50 urang. Piah langyah kadha kurang urang, kong ty hu ba tabiak pok jien mek tame meng 9 - 15 trieu ndong yaok bilan, pagam tui dom paok jien pok meyaom. Langiu di nan, daok hu paok jien pok meyaom ka urang ngak hu ilamu 500.000 - 2 trieu ndong ka yaok urang bahrau; daong raong anek sit 500.000 ndong sa bilan; jien pok meyaom pandiak ka urang meyaih khan urang jik bahrau ka kong ty ngan haong tanut 5 trieu ndong sa urang. Abih di nyu, kong ty daok pato tacei bruk ngak oh abih jien saong ba-yar 100% jien bac bruk ngak ka urang bahrau.

Sa-ai Thái Tôn Thiên Phát, Phaok akaok ngak gah halau urang ngak di Kong ty TNHH New Apparel Far Eastern Viet Nam brei thau, kong ty hu pang ngak labik pato tacei bruk ka urang ngak bahrau:

“Hadei di tuk urang ngak hu mbaok tame danak dak pato pathram saong bac blaoh, khaol dahlak peih bruk pakacah taong yaom ka baoh jeng siam mekre di bruk bac megru, taong yaom ilamu lagaih tui tanut nan ka meng brei nao tame ngak dalam kong ty. Khaol dahlak hu pok jien daong karei yau daong jien ngak bruk brei hu baoh jeng siam mekre ka urang ngak bahrau tuk yam tame kong ty ngak, paok jien pok meyaom takik abih nan lac 1,2 trieu ndong sa urang, ba-yar dalam 3 bilan."

Tui Pasak jit vuk bruk ngak tinh Dong Nai, hatai caong khin hu dalam thun 2026 tagok tal 173.000 urang ngak. Urak ini Pasak daok kham merat panduan salih taka piah pambuak pagam hatai caong khin saong bruk pabak brei. Dalam nan Pasak hu pandar dom kenh zalo, Fanpage saong glo akaok manuac ngak tabiak piah peih ngak dom me-jam giao dich bruk ngak, daong langyah meyaih khan bruk ngak. Langiu di nan dom mbang giao dich bruk ngak tui yaok bilan, Pasak daok peih ngak dom me-jam giao dich di dom xa, phuong pataom rilo labik ngak kong piah ka urang ngak mbuan taom gaok urang mai ngak. Bruk "Urang pambuak bruk daong bruk ngak" daok hu caong mong lac baoh tatua biak biai di abih. Ong Trần Anh Kỳ, Phaok Akaok Pasak Jit vuk bruk ngak tinh Ndong Nao lac:

“Gam gam haong bruk peih ngak mbang meyaih khan bruk ngak tani tanat saong bhian ngak, tinh jeng hu dom jalan ngak bahrau, yau ye dak padang hu urang pambuak bruk di dom pakat xa, pakat tinh ban piah mbuan pataom yaok saong meyaih khan urang ngak brei ka urang ngak mbang blei salih. Caong khin lac dom dom urang pambuak bruk ini nan lac sa baoh tatua pambuak pagam gam gam saong grap tanat piah pabak brei halau urang ngak ka dom urang ngak mbang blei salih".

Yaom mada hu jien bilan saong jien pok meyaom hu tagok, min tui urang lambaok dom urang ngak mbang blei salih lac, piah ka urang ngak pambuak pagam suai lavik saong bruk ngak, tinh Ndong Nai caong khin hu dom sarak ka nyu suai lavik jang. Ong Lê Đức Vinh, Akaok urang ngak Kong ty Electronic Tripod Viet Nam caong khin:

“Dahlak jeng caong khin So Noi vu brei pok panuac ka UBND tinh hu dom sarak pachreih urang ngak daok langiu tinh meng dom danak dak biak biai hu mboh di meta. Pagap yau sang daok rah ra, palagaih rai diuk, ndien, jalan, sang bac, balai saong patrun yaom jien gom ndien, aia ka dom labik sang daok. Tuk jalan diuk rai hu patagok, hu grap tanat, urang ngak langiu tinh meng abih hatai ndam gam piah diuk rai di Ndong Nai”.

Dalam tuk ndap nda pablei tabiak negar langiu patagok khang, bruk ngak di urang ngak mbang blei salih pambuak pagam haong sarak an sinh di puk palei nan lac gai pandeih daong ka darak pasar urang ngak Ndong Nai rak rok, grap tanat jalan cak rok patagok khang kajap dalam thun 2026./.